വെയിലും പൊടിയുമേറ്റു ചർമം വരണ്ടുണങ്ങിയാൽ മൃദുവാക്കാൻ, മേക്കപ്പണിയുന്നതിനു മുമ്പ് മുഖം വൃത്തിയാക്കാൻ, കിടക്കും മുമ്പ് മേക്കപ്പ് തുടച്ചു നീക്കാൻ, ചർമത്തിലെ മൃതകോശങ്ങളും അഴുക്കും നീക്കം ചെയ്യാൻ... ഇങ്ങനെ പലവിധ ഉപയോഗങ്ങളുണ്ട് ക്ലെൻസിങ് മിൽക്കിന്. ഈ ക്ലെൻസിങ് മിൽക്ക് നമുക്കു വീട്ടിൽ തന്നെ തയാറാക്കാവുന്നതേയുള്ളൂ.
∙ ഒരു ചെറിയ സ്പൂൺ ഓറഞ്ചുതൊലി ഉണക്കിപ്പൊടിച്ചത് കാൽ കപ്പ് തണുത്ത പശുവിൻപാലിൽ അരമണിക്കൂർ ഇട്ടു വയ്ക്കുക. ഇതിൽ മുക്കിയ പഞ്ഞിക്കഷണം കൊണ്ടു മുഖം മസാജ് ചെയ്ത ശേഷം ഇളം ചൂടുവെള്ളത്തിൽ കഴുക. ഫ്രിഡ്ജിൽ വച്ചിരുന്നാൽ ഒരാഴ്ചയോളം ഉപയോഗിക്കാം.
∙ അര ലീറ്റർ കുപ്പിയിൽ കാൽ കപ്പ് തേനും സമം ഗ്ലിസറിനും ചേർക്കുക. ഇതിലേക്ക് ഏതെങ്കിലും ലിക്വിഡ് സോപ്പ് കൂടി യോജിപ്പിച്ചു സൂക്ഷിക്കുക. ഈ ബോഡി ക്ലെൻസർ ഉപയോഗിച്ചു കുളിച്ചാൽ ശരീരം വൃത്തിയാകും, ചർമം മൃദുവാകും.
∙ മേക്കപ്പ് തുടച്ചു നീക്കാൻ ഒലീവ് ഓയിലോ ബദാം എണ്ണയോ ഉപയോഗിക്കാം. എണ്ണ മുഖത്തു പുരട്ടിയ ശേഷം ടിഷ്യൂപേപ്പർ ഉപയോഗിച്ച് തുടച്ചു നീക്കണം.
∙ രണ്ടു വലിയ സ്പൂൺ കറ്റാർവാഴ ജെല്ലിൽ ഒരു ചെറിയ സ്പൂൺ തേനും അൽപം എണ്ണയും യോജിപ്പിക്കുക. മേക്കപ്പ് നീക്കാൻ ഈ അലോവെര ക്ലെൻസർ ഉപയോഗിക്കാം.
∙ തിളപ്പിക്കാത്ത പശുവിന്‍പാൽ ഫ്രിഡ്ജിൽ വച്ചു തണുപ്പിച്ച ശേഷം മുഖത്തു പുരട്ടി കഴുകിക്കളയാം. വരണ്ട ചർമമ്മുള്ളവർക്ക് നല്ലൊരു ക്ലെൻസറാണിത്.
∙ എണ്ണമയമുള്ള ചർമക്കാർ തേനും നാരങ്ങാനീരും സമാസമമെടുത്തു മുഖത്തു ക്ലെൻസറായി ഉപയോഗിക്കുക. സാധാരണ ചർമമാണെങ്കിൽ തേനും പാലും സമാസമം യോജിപ്പിച്ച് ഉപയോഗിക്കുക. ഇതിനൊപ്പം ഒരു ചെറിയ സ്പൂൺ പഞ്ചസാര കൂടി ചേർത്താൽ സ്ക്രബുമായി.
∙ ഒലീവ് ഓയിലും മുന്തിരിനീരും തുല്യ അളവിലെടുത്ത് ക്ലെൻസറായി മുഖത്തു പുരട്ടാം. എണ്ണമയമുള്ള ചർമമുള്ളവർ മുന്തിരിനീരിനൊപ്പം നാരങ്ങാനീരും ഒരു മുട്ടവെള്ളയും ചേർത്തോളൂ. നന്നായി മസാജ് ചെയ്ത ശേഷം കഴുകിക്കളയുക.
∙ പച്ചക്കറികളെയും ക്ലെൻസറാക്കി മാറ്റാം. നാലു വലിയ സ്പൂൺ വീതം തക്കാളി നീരും കുക്കുമ്പർ നീരുമെടുത്ത് മുഖത്തു പല തവണ പുരട്ടി മസാജ് ചെയ്യുക. തണുത്തവെള്ളത്തിൽ കഴുകാം. ചർമം മൃദുവാകും.
∙ മുഖം വൃത്തിയാകുന്നതിനൊപ്പം ചർമവും സുന്ദരമാകാൻ ഈ ക്ലെൻസിങ് മിൽക്ക് സഹായിക്കും. മൂന്നു ബദാമും രണ്ടു വലിയ സ്പൂൺ അരിയും തരിയില്ലാതെ പൊടിച്ചു വയ്ക്കുക. വായു കടക്കാത്ത പാത്രത്തിലാക്കി സൂക്ഷിച്ചാൽ ആവശ്യാനുസരണം അൽപം പാൽ ചേർത്തു യോജിപ്പിച്ചു മുഖം വൃത്തിയാക്കാൻ ഉപയോഗിക്കാം.
