അമ്പതുവയസ്സിനു ശേഷം ആരോഗ്യസംരക്ഷണത്തിൽ പ്രത്യേക ശ്രദ്ധ വേണം. പുതിയ കോശങ്ങൾ ഉണ്ടാകാത്തതുകൊണ്ട് നിലവിലുള്ളതിനെ സംരക്ഷിച്ച് നിർത്തേണ്ടത് ആവശ്യമാണ്. അതിനു ചിട്ടയായൊരു ജീവിതക്രമവും ശരീരപരിചരണവും ആവശ്യമാണ്. ഇതാ ആയുർവേദം നിഷ്കർഷിക്കുന്ന മാർഗങ്ങളിലൂടെ അസുഖങ്ങളെ മാറ്റി നിർത്താം ഒപ്പം പുത്തൻ ഉന്മേഷം കൈവരിക്കാം.
∙കൂടുതൽ ഭക്ഷണം കഴിക്കുന്നത് ഈ പ്രായത്തിൽ പല രോഗങ്ങൾക്കും കാരണമാകും. ആൺകുട്ടികളുടെ ഇരുപത്തിമൂന്നു വയസ്സിനുള്ളിലും പെൺകുട്ടികളുടെ പത്തൊമ്പത് വയസ്സിനുള്ളിലും ശരീരം പൂർണവളർച്ച എത്തിയിരിക്കും. അതിനുശേഷം ശരീരപ്രവർത്തനങ്ങൾക്ക് ആവശ്യമായ ഭക്ഷണമാണ് നാം കഴിക്കേണ്ടത്.
∙നാരുകളടങ്ങിയ പച്ചക്കറികളും പഴങ്ങളും ഭക്ഷണത്തിൽ ഉൾപ്പെടുത്തുക. അതു മലബന്ധത്തെ കുറയ്ക്കും.
∙നാരങ്ങാനീര് ഇഞ്ചിനീരു ചേർത്തു കഴിക്കുക,കടുക്ക പൊ ടിച്ചു ചൂടുവെള്ളത്തിൽ ചേർത്തു കഴിക്കുക, ആവണക്കെണ്ണ പാലിൽ ചേർത്തു കഴിക്കുക എന്നിവയെല്ലാം മലബന്ധത്തിനുള്ള പ്രതിവിധികളാണ്.
∙ഏലയ്ക്കാ പൊടിച്ച് ചൂടുവെള്ളത്തിൽ ചേർത്തു കുടിക്കുന്നതും ജാതിക്ക അരച്ച് തേനിൽ സേവിക്കുന്നതും ദഹനക്കേടിനുള്ള ഔഷധമാണ്.
∙ഇഞ്ചിനീരിൽ കുരുമുളകും ജീരകവും തുല്യ അളവിലെടുത്ത് പൊടിച്ച് ചേർത്തുപയോഗിക്കുന്നതും അയമോദകവും ഇന്തുപ്പും കൂടി പൊടിച്ചു ചൂടുവെള്ളത്തിൽ കഴിക്കുന്നതും ദഹനത്തിന് നല്ലതാണ്.
∙ധ്യാനവും യോഗയും മനസ്സിനു ശാന്തിയേകാൻ വാർധക്യകാലത്തു കൂടുതൽ സഹായകമാകും.
∙പച്ചനെല്ലിക്കയുടെ നീര് അറുപതു മില്ലി എടുത്ത് ഒരു സ്പൂൺ നെയ്യും അര സ്പൂൺ തേനും ചേർത്തു സേവിച്ചാ ൽ ദേഹബലം വർധിക്കും.
∙ഉറക്കകുറവിനു തലയിൽ നന്നായി എണ്ണതേച്ച് കുളിക്കുന്നത് പ്രയോജനം ചെയ്യും. അതോടൊപ്പം ശരീരത്തിലും എ ണ്ണയോ കുഴമ്പോ തേച്ച് കുളിക്കാം.
∙ഇളനീർകുഴമ്പ് ദിവസവും കണ്ണിലെഴുതുന്നത് നേത്രരോഗങ്ങളെ തടയും. എന്നാൽ പ്രമേഹരോഗികൾ ഡോക്ടറുടെ നിർദേശപ്രകാരമേ ഇളനീർകുഴമ്പ് ഉപയോഗികാവൂ..
∙ചുക്ക്,ജീരകം,പഞ്ചസാര എന്നിവ തുല്യ അളവിലെടുത്തു പൊടിച്ചു ഇടയ്ക്കിടെ കഴിക്കുക. ചുമയും കഫക്കെട്ടും മാറും.
∙ഈന്തപ്പഴം കുരുകളഞ്ഞ് പാലിലിട്ട് നന്നായി തിളപ്പിച്ച് അ രിച്ച് കുടിച്ചാൽ ക്ഷീണം മാറും.
വിവരങ്ങൾക്കു കടപ്പാട്: ഡോ.ബി.രാജ്കുമാർ, സീനിയർ മെഡിക്കൽ ഒാഫിസർ, വെഞ്ഞാറമൂട്,
ഗവ. ആയുർവേദ ഡിസ്പെൻസറി
ഡോ.എം.എൻ. ശശിധരൻ,ചീഫ് ഫിസിഷ്യൻ, അപ്പാവു വൈദ്യൻ ആയുർവേദിക്സ്, കോട്ടയം
ഡോ. സി.വി. അച്ചുണ്ണി വാരിയർ,കോട്ടയ്ക്കൽ ആര്യവൈദ്യശാല