ലോകത്തിന്റെ വിവിധ ഭാഗങ്ങളിൽ നിന്നുള്ള 128 സൈക്ലിസ്റ്റുകൾ പങ്കെടുക്കുന്ന ’ടൂർ ഓഫ് നീൽഗിരീസ്’ പത്താമത് എഡിഷൻ ഡിസംബർ 10 മുതൽ 17 വരെ നടക്കും. സൈക്കിൾ യാത്രകൾ പ്രോത്സാഹിപ്പിക്കൽ, വിനോദം, സാമൂഹികമാറ്റം എന്നിവ ലക്ഷ്യമിട്ട് പ്രവർത്തിക്കുന്ന റൈഡ് എ സൈക്കിൾ ഫൗണ്ടേഷന്റെ നേതൃത്വത്തിലാണ് പരിപാടി. ബെംഗളൂരുവിൽ നിന്ന് ആരംഭിക്കുന്ന യാത്ര മൈസൂരു, മടിക്കേരി, സുൽത്താൻ ബത്തേരി, ഉദഗമണ്ഡലം എന്നിവ പിന്നിട്ട് മൈസൂരുവിൽ തന്നെ സമാപിക്കും.
കർണാടക, കേരള, തമിഴ്നാട് എന്നീ സംസ്ഥാനങ്ങളിലൂടെ കടന്നുപോകുന്ന രീതിയിലാണ് യാത്രാ പ്ലാൻ. ഹൈറേഞ്ച് ഉൾപ്പെടെ ദുർഘടമായ പാതകൾ താണ്ടുന്ന യാത്ര ഏതാണ്ട് ആയിരം കിലോമീറ്ററിൽ കൂടുതലുണ്ട്. ടൂർ ഓഫ് നീൽഗിരീസിൽ പങ്കെടുക്കുന്ന 128 പേരിൽ 8 പേർ വനിതകളാണ്.ഇതിൽ 110 പേർ ഇന്ത്യക്കാരാണ്. ബാക്കിയുള്ളവർ നെതർലാൻഡ്, ജർമനി, സ്വീഡൻ, ഡെൻമാർക്ക്, ഓസ്ട്രേലിയ, യു എസ് എ, റഷ്യ എന്നിവിടങ്ങളിൽ നിന്നുള്ളവരാണ്.
സൈക്ലിസ്റ്റുകളിൽ കൂടുതൽ പേരും വിവിധ സ്ഥാപനങ്ങളിൽ ജോലി ചെയ്യുന്ന പ്രൊഫഷണലുകളാണ്. 1984 ലെ ഒളിമ്പിക്സിൽ സൈക്ലിങ്ങിൽ സ്വർണ മെഡൽ നേടിയ ഇന്തോ അമേരിക്കൻ സൈക്ലിസ്റ്റ് അലക്സിഗ്രിവാൽ യാത്രയിൽ പങ്കെടുക്കുന്നുണ്ട്. റേസ് എ ക്രോസ് അമേരിക്ക ആദ്യമായി പൂർത്തീകരിച്ച ഇന്ത്യക്കാരൻ ലെഫ്. കേണൽ ഡോ. ശ്രീനിവാസ് ഗോകുൽ നാഥും ടൂർ ഓഫ് നീൽഗിരീസിൽ പങ്കാളികളാകും.
