മകൾക്ക് ഹൃദയം തൊടുന്ന ജൻമദിനാശംസകളുമായി അവതാരകയും അഭിനേത്രിയുമായ അശ്വതി ശ്രീകാന്ത്. മകളുടെ ചിത്രം പങ്കുവച്ച് അശ്വതി ഇൻസ്റ്റഗ്രാമിൽ കുറിച്ചത് ഇതിനോടകം വൈറൽ ആണ്. ‘ഈ ഡ്രസ്സ് മതിയോന്ന്, ഈ കമ്മൽ ചേരുമോന്ന്, ഈ ഫോട്ടോ നന്നായില്ലേന്ന് ചോദിക്കാൻ പറ്റുന്ന കൂട്ടുകാരി. പൊട്ടും പൂവും കുഞ്ഞു രഹസ്യങ്ങളും പങ്കു വയ്ക്കുന്ന കൂട്ടുകാരി’. എന്നാണ് മകളെ അശ്വതി വിശേഷിപ്പിക്കുന്നത്.
അശ്വതിയുടെ കുറിപ്പ് –
ഈ ഡ്രസ്സ് മതിയോന്ന്, ഈ കമ്മൽ ചേരുമോന്ന്, ഈ ഫോട്ടോ നന്നായില്ലേന്ന് ചോദിക്കാൻ പറ്റുന്ന കൂട്ടുകാരി. പൊട്ടും പൂവും കുഞ്ഞു രഹസ്യങ്ങളും പങ്കു വയ്ക്കുന്ന കൂട്ടുകാരി.
കരഞ്ഞ് കുറുകി തോളിൽ കിടന്നിരുന്നവൾ പെട്ടെന്നൊരു ദിവസം അടുത്തിരുന്ന് അഭിപ്രായങ്ങൾ പറയുന്നു. വ്യക്തമായ ചോയ്‌സുകൾ ഉണ്ടാവുന്നു. പിണങ്ങിപ്പോക്കുകളുടെ എണ്ണം കുറയുന്നു. ‘അമ്മ പോകണ്ടാ’...ന്നു വാശിക്കരച്ചിൽ കരഞ്ഞവൾ ‘പോയിട്ടമ്മ വേഗം വന്നാൽ മതി’ എന്ന് നിലപാട് മാറ്റുന്നു.
അമ്മയുടെ തലവേദനയ്ക്ക് നെറ്റി തടവി ‘മരുന്നുമ്മ’ തന്നു കൂട്ടിരിക്കുന്നു. അമ്മക്കുട്ടിയായി അച്ഛനെ വേലി കെട്ടി ദൂരെ നിർത്തിയിരുന്നവൾ പിറന്നാളിന് അച്ഛൻ അടുത്തില്ലാത്ത സങ്കടം പറഞ്ഞ് കണ്ണ് നിറയ്ക്കുന്നു. We miss him, അല്ലേ അമ്മാ ന്ന് ഇടയ്ക്കിടെ ഓർമ്മിപ്പിക്കുന്നു.
ഉള്ളിൽ നിന്നും, കൈയ്യിൽ നിന്നും, ഒക്കത്തു നിന്നും, മടിയിൽ നിന്നും ഇറങ്ങി ഒപ്പം വിരൽ തൂങ്ങി നടന്നവൾ മുന്നേ നടക്കാൻ പഠിക്കുന്നു...!!
പെൺമക്കൾ വളർന്ന് പതിയെ പതിയെ കൂട്ടുകാരികളാവുന്നൊരു ട്രാൻസിഷൻ ഉണ്ട്.
എന്തൊരു ഭംഗിയാണതിനെന്നോ.
Happy Birthday to our little woman ?
Be bold, smart and beautiful inside...We love you.
