Tuesday 07 April 2020 11:31 AM IST : By സ്വന്തം ലേഖകൻ

മറ്റ് ആര്‍ട്ടിസ്റ്റുകള്‍ക്കൊപ്പം ഫോട്ടോ എടുത്തിട്ടും ശശിയേട്ടന്റെ കൂടെ ഒരു സെല്‍ഫിയെടുക്കാന്‍ കുറച്ചു സമയമെടുത്തു...! പ്രിയപ്പെട്ട ആശാന്റെ ഓര്‍മയില്‍ രാമകൃഷ്ണന്‍

rrrgvvydd

അന്തരിച്ച പ്രിയനടന്‍ ശശി കലിംഗയുടെ ഓര്‍മകള്‍ പങ്കുവച്ച് കലാഭവന്‍ മണിയുടെ സഹോദരനും നടനും നര്‍ത്തകനുമായ ആര്‍എല്‍വി രാമകൃഷ്ണന്‍. കലാഭവന്‍ മണിയുമായുള്ള ശശിയുടെ സൗഹൃദത്തെക്കുറിച്ചും ഒന്നിച്ചഭിനയിച്ചതിന്റെ ഓര്‍മകളുമാണ് രാമകൃഷ്ണന്‍ ഫെയ്‌സ്ബുക്കില്‍ കുറിച്ചിരിക്കുന്നത്. പോസ്റ്റ് ഇതിനോടകം ശ്രദ്ധേയമായിക്കഴിഞ്ഞു.

ആര്‍എല്‍വി രാമകൃഷ്ണന്റെ കുറിപ്പ് വായിക്കാം; 

ശശിയേട്ടന് പ്രണാമം. ശശിയേട്ടന്‍ മണി ചേട്ടന്റെ നല്ലൊരു സുഹൃത്തായിരുന്നു. അദ്ദേഹം പല തവണ പാഡിയില്‍ വന്നിട്ടുണ്ട് ഞാന്‍ ശശിയേട്ടനെ അടുത്തറിയുന്നത് തീറ്ററപ്പായിയുടെ ലൊക്കേഷനില്‍ വച്ചാണ്.ഷൂട്ടിങ്ങ് ലൊക്കേഷനിലേക്ക് ആദ്യമായി ചെല്ലുമ്പോള്‍ ആദ്യമായി കണ്ടത് ശശിയേട്ടനെയായിരുന്നു. അന്ന് ശശിയേട്ടന്റെ കൂടെയുള്ള ഒരു സീനായിരുന്നു നിശ്ചയിച്ചിരുന്നത്. 

എപ്പോഴും സ്‌നേഹത്തോടെ ശാസനകളോടെ പരിഭവങ്ങളോടെ ഒക്കെയാണ് ശശിയേട്ടന്റെ പെരുമാറ്റം. ഉള്ള കാര്യം വെട്ടിതുറന്ന് പറയും. സെല്‍ഫി എടുക്കുന്നത് അത്ര ഇഷ്ടമായിരുന്നില്ല അതുകൊണ്ടുതന്നെ മറ്റു ആര്‍ട്ടിസ്റ്റുകള്‍ക്കൊപ്പം ഫോട്ടോ എടുത്തിട്ടും ശശിയേട്ടന്റെ കൂടെ ഒരു സെല്‍ഫി എടുക്കാന്‍ കുറച്ചു സമയമെടുത്തു.. ഒരു ദിവസം ആശാന്‍ തന്നെ വന്ന് കെട്ടി പിടിച്ച് ഒരു ഫോട്ടോ എടുക്കാന്‍ ഫോട്ടോഗ്രാഫറോട് പറഞ്ഞു. ആ ഫോട്ടോയാണിത്. എനിക്ക് കിട്ടിയ മറക്കാനാവാത്ത സമ്മാനം. 

ഒരു ദിവസം വീട്ടിലേക്ക് വരാം.അവിടെ വന്നാല്‍ എനിക്ക് കുറച്ച് കഞ്ഞി തന്നാമതി എന്നൊക്കെ പറഞ്ഞാണ് യാത്രയായത് 'സ്വതസിദ്ധമായ, ലളിതമായ അഭിനയശൈലിയുടെ വാക്താവായിരുന്നു ശശിയേട്ടന്‍. ഒരു നോട്ടം. കവിള്‍ കോട്ടിയുള്ള ഒരു ചിരി, അത്രയൊക്കെ മതി ശശിയേട്ടനിലൂടെയുള്ള ആശയങ്ങള്‍ പുറത്തേക്കെത്താന്‍ മലയാള സിനിമയിലെന്ന പോലെ ഇംഗ്ലീഷ് സിനിമയിലും തന്റെ കഴിവു തെളിയിച്ച നടനാണ് ശശിയേട്ടന്‍'.തന്റെതായ ശൈലിയിലൂടെ തന്റെ ഇടം കണ്ടെത്തിയ കലാകാരന്‍. ശശിയേട്ടന് യാത്രാമൊഴി...

Tags:
  • Movies