കൃത്യമായ പരിചരണമാണ് സൗന്ദര്യ സംരക്ഷണത്തിനുള്ള പ്രധാന മാർഗം. ചർമത്തിനു തിളക്കവും പുതുജീവനും നൽകാൻ ആറു കാര്യങ്ങൾ ഇതാ..
∙ ഒരു ചെറിയ സ്പൂൺ ബദാം പൊടിച്ചതിൽ അൽപം വെളിച്ചെണ്ണ ചേർത്തു മുഖത്തു പുരട്ടുന്നത് മുഖത്തെ മൃതചർമ്മങ്ങളെ ഇല്ലാതാക്കും. അഞ്ച് മിനിറ്റ് മസാജ് ചെയ്തതിന് ശേഷം തണുത്ത വെള്ളമോ റോസ് വാട്ടറോ കൊണ്ടു കഴുകുക. ഇരുണ്ടതും വരണ്ടതുമായ ചർമത്തിനു നിറവും മൃദുത്വവും നൽകാൻ ഈ പായ്ക്ക് ഉപകരിക്കും.
∙ തൈര്, നാരങ്ങാനീര്, തേൻ ഇവ ഓരോ ചെറിയ സ്പൂൺ വീതെമടുത്തു മിശ്രിതമാക്കി മുഖത്തു പുരട്ടി ഇരുപത് മിനിറ്റ് കഴിഞ്ഞു കഴുകി വൃത്തിയാക്കണം.
∙ കടലമാവ്, മഞ്ഞൾപ്പൊടി ഇവ ഒരു ചെറിയ സ്പൂൺ വീതമെടുത്ത് അരക്കപ്പ് തൈരിൽ ചേർത്തു മുഖത്തു പുരട്ടുക. 20 മിനിറ്റ് കഴിഞ്ഞ് ഇളംചൂട് വെള്ളത്തിൽ കഴുകുക.
∙ ഒരു വലിയ സ്പൂൺ മഞ്ഞൾപ്പൊടിയിൽ ഒരു ചെറിയ സ്പൂൺ പാൽപ്പാട ചേർത്തു മുഖത്തും ചുണ്ടുകളിലും പുരട്ടിയാൽ നിറം വർധിക്കും.
∙ ഓട്സ് പൊടിച്ചതു രണ്ടു ചെറിയ സ്പൂണ്‍ എടുക്കുക. ഇതിൽ ഒരു ചെറിയ സ്പൂൺ തക്കാളി നീര് ചേർത്തു മിശ്രിതമാക്കി മുഖത്തും ചുണ്ടുകളിലും പുരട്ടുക. പതിനഞ്ച് മിനിറ്റ് കഴിഞ്ഞു കഴുകിക്കളയണം.
∙ ഒരു തക്കാളിയുടെ ഇടത്തരം വലുപ്പമുള്ള കഷണം അരച്ചെടുക്കുക. ഇതിൽ രണ്ടോ മൂന്നോ ചെറിയ സ്പൂൺ നാരങ്ങാനീര് ചേർക്കുക. മുഖത്തും ചുണ്ടുകളിലും പുരട്ടി പതിനഞ്ച് മിനിറ്റിനുശേഷം വെള്ളം കൊണ്ട് കഴുകുക.
