കണ്ണിൽ കണ്ടതും കേട്ടുകേൾവിയില്ലാത്തതുമായ കാര്യങ്ങൾ കൊണ്ട് തള്ളാനുള്ള കുപ്പയാണ് ചിലർക്ക് സോഷ്യൽ മീഡിയ. നിന്ന നിൽപ്പിൽ മനുഷ്യനെക്കൊല്ലുന്ന സോഷ്യൽ മീഡിയയുടെ പുതിയ കണ്ടെത്തലാണ് 'ആസാമിൽ ജനിച്ച രാക്ഷസക്കുഞ്ഞ്.' സത്യമെന്ത് മിഥ്യയേത് എന്നറിയാതെ സോഷ്യൽ മീഡിയയിൽ ആ രാക്ഷസക്കുഞ്ഞും അതിനു പിന്നിലെ നട്ടാൽ കുരുക്കാത്ത നുണയും ഇപ്പോഴും ഓടിക്കൊണ്ടേയിരിക്കുന്നു. ഈ സാഹചര്യത്തിൽ യാഥാർത്ഥ്യം വിശദമാക്കുകയാണ് ഡോക്ടർ ഷിംന അസീസ്. ഫെയ്സ്ബുക്കിലൂടെയാണ് ഷിംനയുടെ കണ്ണുതുറപ്പിക്കുന്ന കുറിപ്പ്.
സിനിമയിലെ റൊമാന്റിക് രംഗങ്ങൾ മാറിനിൽക്കും, പ്രണയം നിറച്ച് ഈ കല്യാണക്കുറിമാനം
ഫെയ്സ്ബുക്ക് കുറിപ്പ് വായിക്കാം;
'ആസാമിൽ ജനിച്ച രാക്ഷസക്കുഞ്ഞ്' എന്ന പേരിൽ പ്രചരിക്കുന്ന വാട്ട്‌സാപ്പ്‌ സന്ദേശം നിങ്ങളിൽ മിക്കവർക്കും കിട്ടിയിട്ടുണ്ടാകും. ചിത്രത്തിൽ കാണുന്ന കുഞ്ഞിന്റെ വീഡിയോയും കാണും കൂടെ. വീഡിയോയുടെ കൂടെയുള്ള ഓഡിയോയിൽ ഭാവനാസമ്പന്നനായ വേറെ പ്രത്യേകിച്ച്‌ പണിയൊന്നുമില്ലാത്ത ചേട്ടൻ പറയുന്നതിന്റെ പ്രസക്‌തഭാഗങ്ങൾ ഇതാണ്‌- " ഈ കുഞ്ഞിനെ പതിനൊന്നാം മാസത്തിലാണ്‌ സിസേറിയൻ ചെയ്‌ത്‌ പുറത്തെടുത്തത്‌. അപ്പോൾ എട്ടു കിലോ ഭാരമുണ്ടായിരുന്ന കുഞ്ഞ്‌ വന്നപ്പോൾ തന്നെ അമ്മയുടെ കുടൽ മുഴുവൻ തിന്ന്‌ തീർത്തിരുന്നു, അമ്മ അപ്പഴേ മരിച്ചു. ഈ കുട്ടി ഒരു ദിവസം കൊണ്ട് പതിമൂന്ന്‌ കിലോയായി ഭാരം കൂടി. മൂന്നാം ദിവസം കുഞ്ഞ്‌ ഒരു നേഴ്‌സിന്റെ കൈയിൽ കേറിപ്പിടിച്ചു. അവരും ദിവസങ്ങൾക്കകം മരിച്ചു. പിന്നെ പതിനേഴ്‌ ഇഞ്ചക്ഷൻ വെച്ചാണ്‌ അതിനെ കൊന്നത്‌."
ഹെന്താല്ലേ !!
സത്യം ഇതാണ്‌- ഈ കുഞ്ഞ്‌ രാക്ഷസനും കുട്ടിചാത്തനും ഒന്നുമല്ല. അത്യപൂർവ്വമായി മാത്രം ജനിതകമായി വരുന്ന 'ഹാർലെക്വിൻ ഇക്‌തിയോസിസ്‌' എന്ന രോഗമായിരുന്നു ആ കുഞ്ഞിന്‌. ചർമകോശങ്ങൾ കൊഴിഞ്ഞ്‌ പോകുന്നതിന്‌ പകരം ശൽക്കങ്ങളായി മാറി വിണ്ട്‌ കീറി കുഞ്ഞിന്റെ ശരീരതാപനിയന്ത്രണവും പ്രതിരോധശേഷിയും എല്ലാം നഷ്‌ടപ്പെടുന്ന അവസ്‌ഥ. കണ്ണും മൂക്കും ചെവിയും എന്ന്‌ തുടങ്ങി സകല അവയവങ്ങളുടേയും ആകൃതി പോലും വികലമാകും. പൊതുവേ ഈ കുട്ടികൾക്ക്‌ വലിയ ആയുസ്സ്‌ ഉണ്ടാകാറില്ല. എന്നാൽ, ആധുനിക ചികിത്സാസൗകര്യങ്ങൾ കൊണ്ട് നിലവിൽ ഈ മക്കളുടെ ആയുസ്സ്‌ അൽപമെങ്കിലും നീട്ടിക്കൊണ്ട്‌ പോകുക സാധ്യമാണ്‌.
നമ്മുടെ വാട്ട്‌സാപ്പ്‌ കഥയിലെ കുഞ്ഞ്‌ ജനിച്ചത്‌ ഈ വർഷം ജൂണിലാണ്‌ എന്നാണ്‌ കരുതുന്നത്‌, ഇന്ന്‌ ജീവിച്ചിരിപ്പില്ല താനും. ആടിനുണ്ടായ മനുഷ്യക്കുഞ്ഞ്‌, അന്യഗ്രഹജീവിക്കുഞ്ഞ്‌ (എന്താണോ എന്തോ?) എന്നുള്ള വേർഷനുകളും കേട്ടു.
കഥയുണ്ടാക്കുന്നതൊക്കെ വളരെ നല്ല കഴിവാണ്‌. അത്‌ പക്ഷേ, വല്ലോർക്കും ആറ്റുനോറ്റുണ്ടായ കൊച്ചിനെ ചെകുത്താൻ കുട്ടി ആക്കിക്കൊണ്ടാകരുത്‌. നാണമാകില്ലേ ഈ 2019ൽ ഇതൊക്കെ പറഞ്ഞോണ്ട്‌ നടക്കാൻ? ഉണ്ടാക്കിയവരോട്‌ മാത്രമല്ല, ഫോർവാർഡ്‌ ചെയ്യുന്നവരോടും പറഞ്ഞ്‌ നടക്കുന്നവരോടും കൂടിയാണ്‌.
കഷ്‌ടമുണ്ട്‌ മനുഷ്യമ്മാരേ ?
