പ്രായപൂര്ത്തിയാകാത്ത മകനെ അമ്മ ലൈംഗികമായി പീഡിപ്പിച്ചുവെന്ന വാര്ത്ത വലിയ ഞെട്ടലാണ് ഉണ്ടാക്കിയത്. സംഭവത്തില് വക്കം സ്വദേശിയായ യുവതിയെ പോക്സോ നിയമപ്രകാരം കടയ്ക്കാവൂര് പോലീസ് അറസ്റ്റുംചെയ്തു. മകനെ ലൈംഗികമായി പീഡിപ്പിച്ചെന്ന കേസില് അമ്മ അറസ്റ്റിലാകുന്നത് സംസ്ഥാനത്ത് തന്നെ ആദ്യമാണെന്നായിരുന്നു പൊലീസിന്റെ വിശദീകരണം. ഇപ്പോഴിതാ സംഭവത്തില് അപ്രതീക്ഷിത ട്വിസ്റ്റ് സംഭവിക്കുകയാണ്. അമ്മയ്ക്കെതിരെ മൊഴി നല്കാന് അച്ഛന് സഹോദരനെ നിര്ബന്ധിച്ചിരുന്നതായി ഇളയകുട്ടി മനോരമ ന്യൂസിനോട് പറഞ്ഞു.
ഭര്ത്താവിന്റെ രണ്ടാം വിവാഹത്തെ എതിര്ത്തതിന്റെ വൈരാഗ്യത്തില് കേസില് കുടുക്കിയതാണെന്ന് മാതാപിതാക്കളും പരാതിപ്പെട്ടു. ഭാര്യയ്ക്കെതിരെ പരാതിയുമായെത്തിയ ഭര്ത്താവ് നിയമപരമായി വിവാഹമോചനം നേടാതെയാണ് മറ്റൊരു വിവാഹം കഴിച്ചതെന്നും കുടുംബം ആരോപിക്കുന്നു. 14 കാരനായ മകനെ ലൈംഗികമായി പീഡിപ്പിച്ച അമ്മ അറസ്റ്റില് എന്ന കേരളമനസാക്ഷിയെ ഞെട്ടിച്ച ആ വാര്ത്തയുടെ പിന്നാമ്പുറം തേടിയാണ് ജയിലില് കിടക്കുന്ന 37കാരിയുടെ വീട്ടില് മനോരമ ന്യൂസ് സംഘം എത്തിയത്. പതിനേഴും പതിനാലും പതിനൊന്നും വയസുള്ള മൂന്ന് ആണ്കുട്ടികളും 6 വയസുള്ള പെണ്കുട്ടിയുമാണ് കുറ്റാരോപിതയായ യുവതിക്കുള്ളത്. പ്രണയവിവാഹമായിരുന്നെങ്കിലും നിരന്തര പീഡനമായതോടെ മൂന്ന് വര്ഷമായി ഭര്ത്താവുമായി വേര്പെട്ടാണ് താമസം.
ഇതോടെ ഭര്ത്താവ് മറ്റൊരു വിവാഹം കഴിച്ചു. അതിന് ശേഷം മൂന്ന് കുട്ടികളെ ഭര്ത്താവിനൊപ്പം കൊണ്ടുപോയി. ഇതിലൊരു കുട്ടിയുടെ മൊഴിയിലാണ് കേസും അറസ്റ്റും. എന്നാല് മകനെ കൊണ്ട് ഭര്ത്താവ് പറഞ്ഞ് പറയിപ്പിച്ചതാണെന്ന് യുവതിക്കൊപ്പമുള്ള കുട്ടിയുടെ വാക്കുകള് സൂചിപ്പിക്കുന്നു.
നിയമപരമായി വിവാഹമോചനം നേടാതെ രണ്ടാം വിവാഹം കഴിച്ചതിനെ എതിര്ത്തും ജീവനാംശം ആവശ്യപ്പെട്ടും യുവതി പരാതി നല്കിയിരുന്നു. ഇതിലെ വൈരാഗ്യമാണ് പരാതിക്ക് കാരണമെന്നും ആക്ഷേപമുണ്ട്. മകളുടെ നിരപരാധിത്വം തെളിയിക്കാനുള്ള നെട്ടോട്ടത്തിലാണ് പ്രായമായ ഈ മാതാപിതാക്കളും അവര്ക്കൊപ്പമുള്ള നാട്ടുകാരും.
വിവരങ്ങള്ക്കും ദൃശ്യങ്ങള്ക്കും കടപ്പാട്: മനോരമ ന്യൂസ്