കാക്കനാട് ഇൻഫോപാർക്കിനു സമീപത്തെ ഫ്ലാറ്റിലെ മാലിന്യക്കുഴലുകൾ കടന്നുപോകുന്ന ഭാഗത്തു തിരുകിയ നിലയിൽ യുവാവിന്റെ മൃതദേഹം കണ്ടെത്തിയതിന്റെ ഞെട്ടലിലാണ് കൊച്ചി. മൃതദേഹത്തിനു രണ്ടു ദിവസത്തെ പഴക്കമുണ്ട്.
മലപ്പുറം വണ്ടൂര് അമ്പലപ്പടി പുത്തന്പുര വീട്ടില് രാമകൃഷ്ണന്റെ മകന് സജീവ് കൃഷ്ണനാണ് കൊല്ലപ്പെട്ടത്. 22 വയസ്സായിരുന്നു.
ഹോട്ടല് ജീവനക്കാരനാണ് സജീവ്. സജീവിനെ വെട്ടിക്കൊന്ന് മൃതദേഹം പ്ലാസ്റ്റിക് കവറിലും ബെഡ്ഷീറ്റിലും പൊതിഞ്ഞ് ഒളിപ്പിക്കുകയായിരുന്നു. ഇന്ഫോപാര്ക്കിനു സമീപം ഇടച്ചിറ വല്യാട്ട് അമ്പലത്തിനടുത്തെ ഒക്സോണിയ ഫ്ലാറ്റിലെ 16-ാം നിലയിലാണ് സംഭവം. ഇയാള്ക്കൊപ്പമുണ്ടായിരുന്ന പയ്യോളി സ്വദേശി അര്ഷാദിനെ കാണാനില്ല.
ഫ്ളാറ്റില് സജീവും അര്ഷാദും അടക്കം അഞ്ചുപേരാണ് താമസിച്ചിരുന്നത്. മറ്റു മൂന്നുപേര് ടൂര് പോയി തിങ്കളാഴ്ചയാണ് തിരിച്ചുവന്നത്. ബെല്ലടിച്ചിട്ടും വാതില് തുറന്നില്ല. തുടര്ന്ന് സജീവിനെ വിളിച്ചെങ്കിലും എടുത്തില്ല. അര്ഷാദിനെ ബന്ധപ്പെടാന് ശ്രമിച്ചെങ്കിലും ഫോണ് കട്ട് ചെയ്ത ശേഷം സ്ഥലത്തില്ല എന്ന സന്ദേശമയയ്ക്കുകയായിരുന്നത്രെ. ഇതേത്തുടര്ന്ന് മൂവരും സമീപത്തെ ഹോട്ടലില് മുറിയെടുത്ത് താമസിച്ചു. പിന്നീട് അര്ഷാദിന്റെയും സജീവിന്റെയും ഫോണുകള് സ്വിച്ച് ഓഫായി.
സംശയം തോന്നിയതോടെ ചൊവ്വാഴ്ച ഉച്ചയോടെ ഡ്യൂപ്ലിക്കേറ്റ് താക്കോല് ഉപയോഗിച്ച് മൂവരും ഫ്ലാറ്റിനകത്ത് പ്രവേശിച്ചു. മുറിയില് രക്തക്കറ കണ്ടതിനെ തുടര്ന്നുള്ള അന്വേഷണത്തിലാണ് സജീവിന്റെ മൃതദേഹം കവറും ബെഡ്ഷീറ്റും ഉപയോഗിച്ച് പൊതിഞ്ഞ നിലയില് കണ്ടത്. ബാല്ക്കണിയില് ഫ്ലാറ്റിലെ പൈപ്പ് ഡക്ടില് ഒളിപ്പിച്ച നിലയിലായിരുന്നു മൃതദേഹം.
കാണാതായ ആൾ കൊലപാതകം നടത്തി കടന്നു കളഞ്ഞെന്നാണു പൊലീസിന്റെ പ്രാഥമിക നിഗമനം. കൃത്യം നിർവഹിച്ചു കടന്നുകളഞ്ഞെന്നു കരുതുന്ന യുവാവിന്റെ കൈവശമാണു കൊല്ലപ്പെട്ട സജീവിന്റെ ഫോണെന്നു സംശയമുണ്ട്.
കഴുത്തിലും നെഞ്ചിലും വെട്ടേറ്റിട്ടുണ്ട്. മുറിയിലെ രക്തക്കറ കഴുകിക്കളഞ്ഞ ലക്ഷണമുണ്ട്. ഒപ്പം താമസിച്ചിരുന്ന യുവാക്കളെ പോലീസ് ചോദ്യം ചെയ്യുകയാണ്. ഇന്ഫോപാര്ക്കിനു സമീപത്തെ സ്വകാര്യ ഹോട്ടലിലെ ജീവനക്കാരനായിരുന്നു മരിച്ച സജീവ്. അമ്മ: ജിഷ. സഹോദരന്: രാജീവ്.