സംസ്ഥാന ജൂനിയർ അത്ലറ്റിക് മീറ്റിനിടെ ഹാമർ തലയിൽ വീണു പരുക്കേറ്റ് ചികിത്സയിലായിരുന്ന വിദ്യാർഥി മരിച്ചു. പാലാ സെന്റ് തോമസ് ഹയർസെക്കൻഡറി സ്കൂളിലെ പ്ലസ് വണ് വിദ്യാർഥിയായ അഫീൽ ജോണ്സനാണ് (16) മരിച്ചത്. മേലുകാവ് ചെവ്വൂർ കുറിഞ്ഞംകുളം ജോർജ് ജോണ്സന്റെ മകനാണ് അഫീൽ.
കോട്ടയം മെഡിക്കൽ കോളജ് ആശുപത്രിയിൽ തീവ്രപരിചരണ വിഭാഗത്തിൽ ചികിത്സയിലായിരുന്നു അഫീൽ. കഴിഞ്ഞ കുറച്ച് ദിവസങ്ങളായി അഫീലിന്റെ ആരോഗ്യനിലയിൽ നേരിയ പുരോഗതി കണ്ടിരുന്നു. എന്നാൽ ന്യൂമോണിയ ബാധിച്ചതോടെ സ്ഥിതി ഗുരുതരമായി.
ഒക്ടോബർ നാലിനാണ് അഫീലിന് ഹാമർ തലയിൽ വീണ് പരുക്കേറ്റത്. ഉടൻതന്നെ ആശുപത്രിയിൽ എത്തിച്ച് രണ്ടുതവണ ശസ്ത്രക്രിയ നടത്തി. സംഭവത്തിൽ പാലാ പൊലീസ് കേസ് രജിസ്റ്റർ ചെയ്തിരുന്നു. സംഭവവുമായി ബന്ധപ്പെട്ട് സംസ്ഥാന കായികവകുപ്പ് അന്വേഷണം നടത്തിവരുകയാണ്.