വീടിന്റെ മുറ്റത്ത് പാർക്ക് ചെയ്തിരിക്കുന്ന കാറിനുള്ളിൽ അണ്ണാൻ ശേഖരിച്ചു സൂക്ഷിച്ചത് 158 കിലോയോളം വാൽനട്ട്. അമേരിക്കയിലെ നോർത്ത് ഡക്കോട്ടയിലാണ് ഈ വിചിത്ര സംഭവം നടന്നത്. വാൽനട്ട് മരത്തിനു സമീപമായിരുന്നു ഉടമ വാഹനം പാർക്ക് ചെയ്തിരുന്നത്. ഒരാഴ്ചയോളമായി വാഹനം സ്റ്റാർട്ട് ചെയ്തിരുന്നില്ല. ചുരുങ്ങിയ ദിവസത്തിനുള്ളിലാണ് റെഡ് സ്ക്വിറൽ വിഭാഗത്തിൽ പെട്ട അണ്ണാൻ ഇത്രയധികം ഭക്ഷണം ശേഖരിച്ചത്.
വാഹനത്തിന്റെ എൻജിനുള്ളിലും റേഡിയേറ്ററിലും അടക്കം വിവിധ ഭാഗങ്ങളിലായാണ് അണ്ണാൻ ഭക്ഷണം ശേഖരിച്ചു വച്ചത്. ഒട്ടേറെ ബക്കറ്റുകളിലാക്കി ഏറെ പണിപ്പെട്ടാണ് ഉടമ ഇതെല്ലാം നീക്കം ചെയ്തത്. ഏകദേശം 158 കിലോയോളം വാൽനട്ട് അണ്ണാന്റെ ശേഖരത്തിലുണ്ടെന്ന് ഉടമ വ്യക്തമാക്കി.
മഞ്ഞുകാലം ആരംഭിക്കുന്നതിനു മുൻപായുള്ള തയാറെടുപ്പിലായിരുന്നു അണ്ണാൻ. ഡക്കോട്ടയിൽ മഞ്ഞുകാലം ആരംഭിക്കാൻ ഇനി രണ്ടാഴ്ച കൂടിയുണ്ട്. കാറിനുള്ളിലുള്ളത് ഉടമ നീക്കം ചെയ്തതോടെ അണ്ണാന് ഇനി മറ്റൊരു സ്ഥലം കണ്ടെത്തി ഭക്ഷണം ശേഖരിക്കേണ്ടി വരും. ഒരു മണിക്കൂറിൽ 25 വാൽനട്ടോളം ശേഖരിക്കാൻ ഇവയ്ക്ക് കഴിവുണ്ട്.
