പ്രമേഹരോഗികൾ ഇൻസുലിൻ കുത്തിവയ്പിനെ പേടിക്കേണ്ട... വരുന്നു ഇൻസുലിൻ ഇൻഹേലർ Understanding Inhaled Insulin: How It Works

ഇന്നു ഭാരതത്തിൽ 110 ദശലക്ഷത്തിലധികം പ്രമേഹരോഗികളുണ്ടെന്നാണ് ഔദ്യോഗിക കണക്കു സൂചിപ്പിക്കുന്നത്. പ്രമേഹരോഗികൾ രക്തത്തിലെ പഞ്ചസാര കൂടി നിൽക്കുകയാണെങ്കിൽ അൽപം പോലും വൈകാതെ ഇൻസുലിൻ ആരംഭിക്കണമെന്ന അറിവു പുതിയതല്ല. എന്നാൽ പലർക്കും ഇൻസുലിൻ കുത്തിവയ്പിനെ ഭയമാണ്. ഈ ഭയം കാരണം കുത്തിവയ്പ് എടുക്കാതെ രോഗം വഷളാകുന്നു. എന്നാൽ കുത്തിവയ്പിന്റെ കാലം കഴിയുന്നു. ഇൻസുലിൻ ഇൻഹേലർ രൂപത്തിൽ രംഗത്ത്.

ചരിത്രം അറിയാം
പൗഡർ രൂപത്തിലുള്ള ഇൻസുലിൻ ഇൻഹേലർ 2025-ൽ ആണു ഭാരതത്തിൽ വിപണിയിൽ എത്തുവാൻ പോകുന്നത്. ഈ ഔഷധം ആഗോളവിപണിയിൽ പുതിയതല്ല. ഏകദേശം 18 വർഷങ്ങൾക്കു മുൻപു മരുന്നു പരീക്ഷണത്തിന്റെ ഭാഗമായി തിരുവനന്തപുരത്തു ജ്യോതിദേവ്സ് ഡയബറ്റിസ് ആൻഡ് റിസർച് സെന്ററിൽ ഇൻഹേലർ ഇൻസുലിൻ നിരവധി രോഗികൾക്കു കൊടുത്തിട്ടുണ്ട്.
ആഗോള ക്ലിനിക്കൽ ട്രയൽസിന്റെ ഭാഗമായി കേന്ദ്രസർക്കാർ അനുമതിയോടെ നടക്കുന്ന മരുന്നു പരീക്ഷണത്തിൽ ജ്യോതിദേവ്സ് ഡയബറ്റിസ് ആൻഡ് റിസർച് സെന്ററും ഭാഗമായിരുന്നു. അത് 2006 -ാം ആണ്ടിലായിരുന്നു. ഒട്ടേറെ കാരണങ്ങളാൽ ഇൻഹേലർ ഇൻസുലിൻ വിപണിയിൽ എത്തുവാൻ പിന്നീടും പതിറ്റാണ്ടുകൾ വേണ്ടിവന്നു.
അഫ്രീസ എന്ന പേരിലുള്ള ഇൻഹേൽഡ് ഇൻസുലിൻ വർഷങ്ങളായി അമേരിക്കയിൽ ലഭ്യമാണ്. മാൻകൈൻഡ് (Mannkind) എന്ന അമേരിക്കൻ മരുന്ന് ഉൽപാദകരാണ് ഈ ഗവേഷണം നടത്തുകയും വിപണിയിൽ അഫ്രീസ എത്തിക്കുകയും ചെയ്‌തിട്ടുള്ളത്. സൂചിയില്ല, വേദനയില്ല, രക്തം വാർന്ന് ഒഴുകുന്നില്ല, കുത്തിവയ്‌പിന്റേതായ ബുദ്ധിമുട്ടുകൾഒന്നുമില്ല, കാത്തിരിപ്പില്ല. അങ്ങനെ നിരവധി സൗകര്യങ്ങളും സവിശേഷതകളുമാണ് അഫ്രീസയ്ക്ക് അവകാശപ്പെടുവാനുള്ളത്.

ഇൻഹേലറിന്റെ പ്രത്യേകത
ഭക്ഷണം കഴിച്ചു 30 മിനിറ്റു മുതൽ ഒരുമണിക്കൂർ ആകുമ്പോൾ രക്തത്തിലെ പഞ്ചസാര കൂടി തുടങ്ങും. ഭക്ഷണം കഴിച്ചു രണ്ടു മണിക്കൂർ കഴിയുമ്പോൾ പരമാവധി അനുവദിച്ചിരിക്കുന്ന അളവ് 180 മില്ലിഗ്രാം വരെ മാത്രമാണ്. ഇവിടെയാണു ഫലപ്രദമായ ഒരു മരുന്നിന്റെ ആവശ്യം വേണ്ടത്. ആഹാരത്തിനുശേഷം ഉണ്ടാകുന്ന രക്തത്തിലെ പഞ്ചസാരയുടെ പെട്ടെന്നുള്ള ഗണ്യമായ വർധന രക്തധമനികളിൽ വ്യതിയാനം വരുത്തുന്നു, അങ്ങനെ ഹൃദ്രോഗ വൃക്കരോഗ സാധ്യതകൾ വർധിപ്പിക്കുന്നു, സ്ട്രോക്കിന്റെ സാധ്യതയും വർധിപ്പിക്കുന്നു. ഇവിടെയാണ അഫ്രീസ മറ്റു മരുന്നുകളിൽ നിന്നും വ്യത്യസ്തമായി, കൂടുതൽ ഫലപ്രദമായി രക്തത്തിലെ പഞ്ചസാര നിയന്ത്രിക്കുന്നത്.
അഫ്രീസ എന്ന ഇൻഹേൽഡ് രൂപത്തിലുള്ള ഇൻസുലിൻ വായിലൂടെ വലിച്ചെടുത്താൽ ഒരുമിനിറ്റിനുള്ളിൽ തന്നെ രക്തത്തിൽ എത്തിച്ചേരുന്നു. എന്നാൽ മറ്റ് ഇൻസുലിൻ കുത്തിവയ്പുകൾ എടുത്തു കഴിഞ്ഞാൽ അതു രക്തത്തിൽ എത്തിച്ചേർന്നു പ്രവർത്തനം തുടങ്ങുവാൻ ഏകദേശം 15 മിനിറ്റു മുതൽ ഒരുമണിക്കൂർ വരെ വേണ്ടിവരുന്നു. ഇൻഹേലർ ഇൻസുലിൻ ആണെങ്കിൽ പഞ്ചസാര നിയന്ത്രിക്കുവാനായി ഏകദേശം 12 മിനിറ്റിനുള്ളിൽ തന്നെ സാധിക്കും.

ആർക്കെല്ലാം ഉപയോഗിക്കാം?
അഫ്രീസ ടൈപ്പ് 1 ഡയബറ്റിസിനും ടൈപ്പ് 2 ഡയബറ്റിസിനും ഉപയോഗിക്കാം. ആഹാര ശേഷം രക്തത്തിലെ പഞ്ചസാര പെട്ടെന്ന് ഉയരുന്നതു നിയന്ത്രിക്കാനാണ് ഇത് ഉപയോഗിക്കുന്നത്. ഇതു കാരണം ദിവസത്തിൽ ഒരുനേരം ഉപയോഗിക്കുന്ന ദീർഘനേരം പ്രവർത്തിക്കുന്ന ബേസൽ ഇൻസുലിൻ കുത്തിവയ്പായി പല രോഗികൾക്കും എടുക്കേണ്ടി വരും.
അഫ്രീസ കാട്രിഡ്ജുകളായിട്ടാണു ലഭിക്കുന്നത്. ഇൻസുലിൻ കുത്തിവയ്പായി എടുക്കുന്ന കാട്രിഡ്ജ് പേനയിലിട്ട് ഉപയോഗിക്കുന്നതു പോലെ ഈ കാട്രിഡ്ജും നമുക്ക് ഇൻഹേലറിൽ ഇട്ട് ഉപയോഗിക്കുവാൻ സാധിക്കും.
ശ്വാസകോശത്തിലൂടെ ഉള്ളിലേക്കു കടക്കുന്ന ഔഷധമായതിനാൽ ശ്വാസകോശ രോഗമുള്ളവർക്ക്, ആസ്മ, സിഒപിഡി, തുടങ്ങിയ ശ്വാസകോശരോഗമുള്ളവർക്ക് ഇൻഹേൽഡ് ഇൻസുലിൻ ഉപയോഗിക്കാൻ സാധിക്കില്ല. അതോടൊപ്പം പുകവലിക്കുന്നവർക്കും ഇത് ഉപയോഗിക്കാൻ സാധിക്കില്ല. അഫ്രീസ നിർദേശിക്കുന്നതിനു മുൻപു പ്രമേഹചികിത്സാവിദഗ്‌ധർ ശ്വാസകോശ രോഗമുണ്ടോ എന്നുള്ള പരിശോധനയും നടത്തേണ്ടതായി വരും.