ഹാരപ്പൻ സംസ്കാരത്തിന്റെ ഭാഗമായിരുന്ന ഗുജറാത്തിലെ ധോലവീര യുനെസ്കോയുടെ ലോകപൈതൃകപ്പട്ടികയിൽ ഇടം നേടി. ഈ മാസം 16 ന് ആരംഭിച്ച യുനെസ്കോയുെട ഓൺലൈൻ യോഗമാണ് പുതിയ പട്ടിക പുറത്തിറക്കിയത്. ധോലവീര കൂടി ഉൾപ്പെട്ടത്തോടെ ഗുജറാത്തില്‍ നിന്നു മാത്രം നാല് ഇടങ്ങളുണ്ട് യുനെസ്കോ പൈതൃകപട്ടികയിൽ.. ചമ്പാനിർ, റാണി കി വാവ്, അഹമ്മദാബാദ് നഗരം തുടങ്ങിയവയാണ് മറ്റുള്ളവ.
ബിസി 2500 ൽ സിന്ധുനദീതീരത്ത്, ഇന്നത്തെ പാക്കിസ്ഥാൻ, ഇന്ത്യ, അഫ്ഗാനിസ്ഥാൻ പ്രദേശങ്ങളിൽ നിലനിന്ന സിന്ധു നദീതട സംസ്കാരത്തിന്റെ ഭാഗമായിരുന്നു ഹാരപ്പ. മോഹൻജൊദാരോ, ഹാരപ്പ എന്നിവ അക്കാലത്തെ വൻ നഗരങ്ങളും കാളിബംഗൻ, ധോലവീര, ലോത്തൽ തുടങ്ങിയവ പ്രശസ്ത പട്ടണങ്ങളുമായിരുന്നു എന്നാണ് കണക്കാക്കുന്നത്.
ധോലവീര കൂടി ഉൾപ്പെട്ടത്തോടെ ഇന്ത്യയിൽ നിന്ന് ലോക പൈതൃകപട്ടികയിൽ സ്ഥാനം നേടിയ ഇടങ്ങൾ 40 ആയി. തെലങ്കാനയിലെ വാറങ്കലിലുള്ള രാമപ്പ ക്ഷേത്രവും കഴിഞ്ഞ ദിവസം പട്ടികയിൽ ഉൾപ്പെട്ടിരുന്നു.
