ഭക്ഷണം കഴിച്ചിട്ട് വായ കഴുകിയില്ലേ, എന്തൊരു വായ്നാറ്റമാ ഇത്...’ കൊഞ്ചിയരികെ എത്തിയ കുട്ടിയുടെ മനസ്സു വിഷമിക്കാൻ ഇതിൽ കൂടുതൽ ഒന്നും വേണ്ട. കുഞ്ഞുങ്ങളിലെ വായ്നാറ്റം പലപ്പോഴും മാതാപിതാക്കളുടെ അശ്രദ്ധ കൊണ്ടാകാം ഉണ്ടാകുന്നത്. അറിയാം വായ്നാറ്റത്തിന്റെ കാരണങ്ങളും പരിഹാരങ്ങളും.
∙ ദന്തക്ഷയം (പുഴുപ്പല്ല്), മോണരോഗം, വായിൽ ഭക്ഷണ അവശിഷ്ടം പറ്റിപിടിച്ചിരിക്കുക എന്നിവ വായ്നാറ്റത്തിനു കാരണമാകാം. വായിൽ ഉമിനീര് വേണ്ടത്ര ഉണ്ടാകാതിരിക്കുക, നാവ് വൃത്തിയാക്കാതിരിക്കുക, വായിലൂടെ ശ്വസിക്കുക, ദഹനപ്രശ്നങ്ങൾ ഇവയും വായ്നാറ്റത്തിലേക്കു നയിക്കാം.
∙ ചോക്‌ലെറ്റ്, മധുരപലഹാരം എന്നിവയുടെ അമിത ഉപയോഗം വായ്നാറ്റം വരുത്താം. ഇവ വായിൽ ഒട്ടിപ്പിടിച്ചിരിക്കും എന്നതാണ് കാരണം.
∙ ശരിയായി ബ്രഷ് ചെയ്യുന്നതും മോണ വൃത്തിയാക്കുന്നതും പതിവാക്കണം. കൂടാതെ ആറു മാസത്തിലൊരിക്കൽ ദന്തഡോക്ടറെ കണ്ട് പരിശോധന നടത്തുകയും വേണം.
∙ ആറാം മാസത്തിലാണ് കുഞ്ഞിന് ആദ്യത്തെ പാൽപല്ല് വന്നു തുടങ്ങുന്നത്. ഈ പ്രായം മുതലാണ് മുലപ്പാലിനൊപ്പം കുറുക്കു രൂപത്തിലുള്ള ഭക്ഷണം കുഞ്ഞിന് നൽകിത്തുടങ്ങുന്നതും. അതിനാൽ പല്ലും വായും വൃത്തിയാക്കുന്നതിൽ ശ്രദ്ധ ചെലുത്തണം. ഈ സമയത്ത് ഫിംഗർ ബ്രഷ് ഉപയോഗിക്കാം. ഒരു വയസ്സാകുമ്പോൾ മുതൽ വീട്ടിലുണ്ടാക്കുന്ന എല്ലാ ഭക്ഷണവും കുട്ടികൾ കഴിച്ചു തുടങ്ങും. ഈ സമയത്ത് വായ വൃത്തിയാക്കുന്നതിൽ മാതാപിതാക്കളുടെ ശ്രദ്ധ വേണം.
∙ രണ്ടു വയസ്സാകുമ്പോഴേക്കും കുട്ടികൾ ശരിയായി തുപ്പാൻ പഠിക്കും. ഈ പ്രായം മുതൽ തനിയെ ബ്രഷ് ചെയ്യാൻ പഠിപ്പിക്കാം, രാവിലെയും രാത്രിയും പല്ലു തേക്കുന്നത് ശീലമാക്കാം. ഫ്ലൂറൈഡ് ഇല്ലാത്ത ടൂത്ത്‌പേസ്റ്റ് വേണം തിരഞ്ഞെടുക്കാൻ. ഒപ്പം നാക്കു വൃത്തിയാക്കുന്നതും പ്രധാനമാണ്. നാലു വയസ്സു മുതൽ ഫ്ലൂറൈഡ് കലർന്ന ടൂത്പേസ്റ്റുകൾ ഉപയോഗിക്കാം.
∙ ഇലക്കറികളും നാരുള്ള ഭക്ഷണവും ധാരാളമായി കഴിക്കണം. ഇതു ദഹനം സുഗമമാക്കുകയും വായ്നാറ്റം അകറ്റിനിർത്തുകയും ചെയ്യും. കൂടാതെ ധാരാളം വെള്ളം കുടിപ്പിക്കാനും ശ്രദ്ധിക്കണം.
