ഡിന്നറിനു കൊതിപ്പിക്കുന്ന രുചിയില് കണ്ണുപത്തിരിയും ചിക്കന് നിറച്ചതും തയാറാക്കിയാലോ? ഈസി റെസിപ്പി ഇതാ..
കണ്ണുപത്തിരി
1. മൈദ, ഗോതമ്പുപൊടി – ഒരു കപ്പ് വീതം
നെയ്യ് – ഒരു വലിയ സ്പൂണ്
ഉപ്പ് – പാകത്തിന്
2. വെള്ളം – പാകത്തിന്
3. നെയ്യ് – പാകത്തിന്
4. എണ്ണ – വറുക്കാനാവശ്യത്തിന്
പാകം ചെയ്യുന്ന വിധം
∙ ഒന്നാമത്തെ ചേരുവ യോജിപ്പിച്ചു പാകത്തിനു വെള്ളം ചേര്ത്തു ചപ്പാത്തിമാവിന്റെ പരുവത്തില് കുഴയ്ക്കുക.
∙ അരമണിക്കൂറിനു ശേഷം ഉരുളകളാക്കി ചപ്പാത്തിയുടെ വലുപ്പത്തില് പരത്തണം. ഇതിനു മുകളില് അല്പം നെയ്യ് പുരട്ടി നാലു വശങ്ങളും നടുവിലേക്കു മടക്കുക.
∙ ഇതു കൈ കൊണ്ടു മെല്ലേ ഒന്നു പരത്തിയ ശേഷം അല്പം നെയ്യ് തൂവി നാലു കോണും ഒരുമിച്ചു നടുവിലേക്കു വച്ച് അമര്ത്തണം. ഇതു നാലു കണ്ണു പോലെ വരും.
∙ വീണ്ടും പരത്തി ചൂടായ എണ്ണയില് തിരിച്ചും മറിച്ചുമിട്ടു വറുത്തെടുക്കാം.
ചിക്കന് നിറച്ചത്
1. ചിക്കന് – ഒരു ഇടത്തരം
2. കശ്മീരിമുളകുപൊടി – ഒരു വലിയ സ്പൂണ്
മഞ്ഞള്പ്പൊടി – അര ചെറിയ സ്പൂണ്
ഉപ്പ് – പാകത്തിന്
3. ചുവന്നുള്ളി – 10
ഇഞ്ചി – ഒരു കഷണം
വെളുത്തുള്ളി – 10 അല്ലി
മഞ്ഞള്പ്പൊടി – അര ചെറിയ സ്പൂണ്
കശ്മീരി മുളകുപൊടി – രണ്ടു വലിയ സ്പൂണ്
ഗരംമസാലപ്പൊടി – അര ചെറിയ സ്പൂണ്
നാരങ്ങാനീര് – ഒരു നാരങ്ങയുടേത്
4. എണ്ണ – പാകത്തിന്
5. സവാള – രണ്ട്, അരിഞ്ഞത്
പച്ചമുളക് – മൂന്ന്, അരിഞ്ഞത്
ഇഞ്ചി – വെളുത്തുള്ളി പേസ്റ്റ് – ഒരു വലിയ സ്പൂണ്
6. കറിവേപ്പില – പാകത്തിന്
മല്ലിയില – പാകത്തിന്
മുളകുപൊടി – അര ചെറിയ സ്പൂണ്
മഞ്ഞള്പ്പൊടി – കാല് ചെറിയ സ്പൂണ്
മല്ലിപ്പൊടി – കാല് ചെറിയ സ്പൂണ്
ഗരംമസാലപ്പൊടി – കാല് ചെറിയ സ്പൂണ്
7. മുട്ട – ഒന്ന്, പുഴുങ്ങിയത്
8. എണ്ണ – പാകത്തിന്
പാകം ചെയ്യുന്ന വിധം
∙ ചിക്കന് മുഴുവനോടെ കഴുകി വൃത്തിയാക്കി നന്നായി വരഞ്ഞെടുക്കണം.
∙ ചിക്കനില് രണ്ടാമത്തെ ചേരുവ നന്നായി തേച്ചു പിടിപ്പിച്ച ശേഷം ചിക്കന് ലെഗ്സും വിങ്സും ചിക്കന്റെ നെഞ്ചുഭാഗത്തോടു ചേര്ത്തു കൂട്ടിക്കെട്ടുക.
∙ ചിക്കന് പ്രഷര് കുക്കറിലാക്കി അല്പം വെള്ളവും ചേര്ത്ത് ഒരു വിസില് വരും വരെ വേവിച്ചെടുക്കണം.
∙ മൂന്നാമത്തെ ചേരുവ നന്നായി അരച്ചു ചിക്കനില് തേച്ചു പിടിപ്പിക്കണം.
∙ ചൂടായ എണ്ണയില് അഞ്ചാമത്തെ ചേരുവ വഴറ്റിയ ശേ ഷം ആറാമത്തെ ചേരുവ ചേര്ത്തു നന്നായി വഴറ്റിയെടുക്കുക.
∙ ഇതും മുട്ട പുഴുങ്ങിയതും ചിക്കനില് നിറച്ച ശേഷം ചൂടായ എണ്ണയില് തിരിച്ചും മറിച്ചുമിട്ടു നന്നായി വറുത്തെടുക്കാം.