നാലുമണി കാപ്പിക്കൊപ്പം എന്തെങ്കിലും കൊറിക്കുക മലയാളികൾക്ക് പണ്ടേയുള്ള ശീലമാണ്. നാലുമണി നേരം ആഘോഷമാക്കാൻ ഇതാ മധുരവും എരി വും നിറഞ്ഞ രണ്ടു വ്യത്യസ്ത തരം സ്നാക്സ്.
ഡയമണ്ട് കട്ട്സ്
1. വെണ്ണ – 80 ഗ്രാം
2.മുട്ട – ഒന്ന്
പഞ്ചസാര പൊടിച്ചത്
– 50 ഗ്രാം
3. ഉപ്പ് – ഒരു നുള്ള്
പാൽ
– മൂന്നു വലിയ സ്പൂൺ
4. മൈദ – 250 ഗ്രാം
5. എണ്ണ – വറുക്കാൻ
6. പഞ്ചസാര പൊടിച്ചത്
– പാകത്തിന്
പാകം ചെയ്യുന്ന വിധം
∙വെണ്ണ ഉരുക്കി വയ്ക്കുക.
∙ഒരു പാത്രത്തിൽ മുട്ടയും പഞ്ചസാരയും യോജിപ്പിച്ചു നന്നായി അടിക്കുക.
∙ഇതിലേക്ക് ഉരുക്കി വച്ചിരിക്കുന്ന വെണ്ണ ചേർത്തു നന്നായി യോജിപ്പിക്കുക.
∙ ഇതിൽ ഉപ്പും പാലും ചേർത്ത ശേഷം മൈദ ചേർത്തു നന്നായി കുഴച്ചു മൂടി വയ്ക്കുക.
∙ഒരു മണിക്കൂറിനു ശേഷം വീണ്ടും കുഴയ്ക്കുക.
∙വീണ്ടും ഒരു മണിക്കൂർ അനക്കാതെ വച്ച ശേഷം വീണ്ടും കുഴച്ചു വീണ്ടും ഒരു മണിക്കൂർ വയ്ക്കുക.
∙പിന്നീട് പരത്തി, ഡയമണ്ട് ആകൃതിയിൽ മുറിച്ചു ചൂടായ എണ്ണയിലിട്ടു വറുത്തു കോരുക.
∙പഞ്ചസാര പൊടിച്ചതു നന്നായി തൂവി ഉപയോഗിക്കാം.
കൽകൽ
1. മൈദ – ഒരു കപ്പ്
വെണ്ണ ഉരുക്കിയത് – രണ്ടു വലിയ സ്പൂൺ
ഉപ്പ് – പാകത്തിന്
കുരുമുളകുപൊടി – മുക്കാൽ ചെറിയ സ്പൂൺ
2. വെള്ളം – പാകത്തിന്
3. എണ്ണ – വറുക്കാൻ ആവശ്യത്തിന്
4. മുളകുപൊടി – കാൽ ചെറിയ സ്പൂൺ
പാകം ചെയ്യുന്ന വിധം
∙ഒരു വലിയ പാത്രത്തിൽ ഒന്നാമത്തെ ചേരുവ യോജിപ്പിച്ചു പാകത്തിനു വെള്ളം ചേർത്തു നന്നായി കുഴച്ച് ഒരു മണിക്കൂർ വയ്ക്കുക
∙ഇതിൽ നിന്നു ചെറിയ നെല്ലിക്ക വലുപ്പമുള്ള ഉരുളകൾ തയാറാക്കി വയ്ക്കുക.
∙ഒരു ഫോർക്ക് എടുത്ത്, കമഴ്ത്തിപ്പിടിച്ച് ഓരോ ഉരുളയായി ഫോർക്കിന്റെ മുള്ളുള്ള ഭാഗത്തു വച്ച് കൈകൊണ്ടു പരത്തുക. ഇനി ഒരറ്റത്തു നിന്നു പായ ചുരുട്ടുന്നതു പോലെ ചുരുട്ടിയെടുക്കണം.
∙ഇതു ചൂടായ എണ്ണയിലിട്ടു വറുത്തുകോരി, മുളകുപൊടി ചേർത്തിളക്കി ഉപയോഗിക്കാം.
