എന്നാ രുചിയാ! കല്ലുവിന്റെ കൺട്രോൾ കളഞ്ഞ മാഹി ചെമ്മീൻ ചോർ അടുക്കളയിൽ പരീക്ഷിച്ചാലോ...
ചേരുവകൾ
ചെമ്മീൻ – ഒരു കിലോ, വൃത്തിയാക്കിയത്
മുളകുപൊടി – മൂന്നു വലിയ സ്പൂൺ
ഉപ്പ് – പാകത്തിന്
സൺഫ്ലവർ ഓയിൽ – പാകത്തിന്
നെയ്യ് – അരക്കപ്പ്
സവാള – എട്ട്, ഇടത്തരം അരിഞ്ഞത്
തക്കാളി – അഞ്ച്, ഇടത്തരം അരിഞ്ഞത്
പച്ചമുളക് – 10, അരച്ചത്
ഇഞ്ചി – രണ്ടു കഷണം, അരച്ചത്
വെളുത്തുള്ളി – ഒരു കുടം, അരച്ചത്
ഗരംമസാലപ്പൊടി – രണ്ടു വലിയ സ്പൂൺ
മല്ലിയില – 25 ഗ്രാം, അരിഞ്ഞത്
വെള്ളം – പത്തു കപ്പ്
കൈമ അരി – ഒരു കിലോ
പാകം ചെയ്യുന്ന വിധം
∙ ചെമ്മീനിൽ രണ്ടു വലിയ സ്പൂൺ മുളകുപൊടിയും പാകത്തിന് ഉപ്പും പുരട്ടി വേവിക്കുക.
∙ ഒരു പാനിൽ എണ്ണ ചൂടാക്കി വേവിച്ച ചെമ്മീൻ വറുത്തെടുക്കുക.
∙ ചുവടുകട്ടിയുള്ള പാത്രത്തിൽ കാൽ കപ്പ് നെയ്യൊഴിച്ച് ചൂടാക്കി സവാള വഴറ്റുക. ഗോൾഡൻ ബ്രൗൺ നിറമാകണം.
∙ ഇതിലേക്കു തക്കാളി ചേർത്തു വഴറ്റിയശേഷം പച്ചമുളക്, ഇഞ്ചി, വെളുത്തുള്ളി എന്നിവ അരച്ചതു ചേർത്തു വഴറ്റുക.
∙ ഇനി വറുത്തു വച്ചിരിക്കുന്ന ചെമ്മീൻ ചേർത്തിളക്കുക.
∙ ഗരംമസാലപ്പൊടിയും ഒരു വലിയ സ്പൂൺ മുളകുപൊടിയും ചേർത്തിളക്കിയ ശേഷം മല്ലിയില ചേർക്കുക. അൽപം വെള്ളം തളിച്ചു രണ്ടു മിനിറ്റ് മൂടി വയ്ക്കുക. ഇതാണ് ചെമ്മീൻ മസാല.
∙ ചുവടുകട്ടിയുള്ള പാത്രത്തില് കാൽ കപ്പ് നെയ്യും രണ്ടു വലിയ സ്പൂൺ സൺഫ്ലവർ ഓയിലും ചൂടാക്കിയ ശേഷം വെള്ളം ചേർത്തു തിളപ്പിക്കുക.
∙ നന്നായി തിളച്ചശേഷം അരിയും ഉപ്പും ചേർത്തിളക്കുക.
∙ വെള്ളം വറ്റി പകുതിയാകുമ്പോൾ തയാറാക്കി വച്ചിരിക്കുന്ന ചെമ്മീൻ മസാല ചേർത്തിളക്കി മൂടി വയ്ക്കുക.
∙ വെള്ളം നന്നായി വറ്റി ചെമ്മീൻ ചോറു വെന്തു പാകമായശേഷം വിളമ്പാം.