ഫ്രൂട്ട് പായസം
1. നെയ്യ് – 200 ഗ്രാം
2. കശുവണ്ടിപ്പരിപ്പ് – 100 ഗ്രാം
ഉണക്കമുന്തിരി – 100 ഗ്രാം
3. മട്ടിപ്പഴം (പകരം കദളിപ്പഴം ഉപയോഗിക്കാം) – 15 ചെറുതായി അരിഞ്ഞത്
4. പൈനാപ്പിൾ – ഒരു ചെറുത്, ചെറുതായി അരിഞ്ഞത്
5. ഈന്തപ്പഴം – അരക്കിലോ, ചെറുതായി അരിഞ്ഞത്
6. ശർക്കര – മുക്കാൽ കിലോ, ഉരുക്കിയത്
7. തേങ്ങ ചുരണ്ടിപ്പിഴിഞ്ഞ രണ്ടാംപാൽ – അഞ്ചു കപ്പ്
8. തേങ്ങ ചുരണ്ടിപ്പിഴിഞ്ഞ ഒന്നാംപാൽ – രണ്ടു കപ്പ്
9. ഏലയ്ക്കാപ്പൊടി – രണ്ടു ചെറിയ സ്പൂൺ
കൽക്കണ്ടം – കാൽ കപ്പ്
പാകം ചെയ്യുന്ന വിധം
∙ ഒരു ഉരുളിയിൽ മൂന്നു വലിയ സ്പൂൺ നെയ്യ് ചൂടാക്കി കശുവണ്ടിപ്പരിപ്പും ഉണക്കമുന്തിരിയും വഴറ്റുക.
∙ ഇവ മൂത്തു തുടങ്ങുമ്പോൾ മട്ടിപ്പഴം/കദളിപ്പഴം ചേ ർത്ത് അഞ്ചു മിനിറ്റ് വഴറ്റുക.
∙ ഇതിലേക്കു പൈനാപ്പിൾ ചേർത്തു രണ്ടു മിനിറ്റ് വ ഴറ്റിയ ശേഷം ഈന്തപ്പഴം അരിഞ്ഞതും ചേർത്തു രണ്ടു മിനിറ്റ് വഴറ്റണം.
∙ ഇതിലേക്കു ശർക്കര ഉരുക്കിയതു ചേർത്തു രണ്ടു മിനിറ്റ് വരട്ടുക. ഇടയ്ക്കിടെ നെയ്യ് ചേർത്തു കൊടുക്കണം.
∙ പഴങ്ങൾ വരട്ടിയത് ഉരുളിയിൽ നിന്നു വിട്ടു വരുന്ന പാകമാകുമ്പോൾ രണ്ടാംപാൽ ചേർത്തിളക്കി തിളപ്പിക്കുക.
∙ പായസം കുറുകിത്തുടങ്ങുമ്പോൾ ഒന്നാംപാലും ചേർത്തിളക്കുക. തിള വന്നു തുടങ്ങുമ്പോൾ അടുപ്പിൽ നിന്നു വാങ്ങി ഏലയ്ക്കാപ്പൊടിയും കൽക്കണ്ടവും വിതറി വിളമ്പാം.
∙ ശർക്കര ഉരുക്കാൻ ഏകദേശം അരക്കപ്പ് മാത്രം വെള്ളം ഉപയോഗിക്കുക. വെള്ളം അധികം ചേർത്താൽ വ രട്ടിയെടുക്കാൻ കൂടുതൽ സമയം വേണ്ടി വരും.
പഞ്ഞപ്പുല്ലു പായസം
1. പഞ്ഞപ്പുല്ല് (റാഗി) – അരക്കപ്പ്
2. വെള്ളം – നാലു കപ്പ്
3. ശർക്കര ചുരണ്ടിയത് – ഒന്നരക്കപ്പ്
4. പഞ്ചസാര – അരക്കപ്പ്
5. കട്ടിത്തേങ്ങാപ്പാൽ – ഒരു കപ്പ്
ഏലയ്ക്കാപ്പൊടി – അര ചെറിയ സ്പൂൺ
6. നെയ്യ് – രണ്ടു വലിയ സ്പൂൺ
7. കശുവണ്ടിപ്പരിപ്പ് – 25 ഗ്രാം
ഉണക്കമുന്തിരി – 25 ഗ്രാം
8. തേങ്ങ ചുരണ്ടിയത് – ഒരു കപ്പ്
പാകം ചെയ്യുന്ന വിധം
∙ പഞ്ഞപ്പുല്ല് രണ്ടു മണിക്കൂർ കുതിർത്ത ശേഷം അരച്ചു പിഴിഞ്ഞ് അരിച്ചെടുക്കുക. ഇതിൽ നാലു കപ്പ് വെള്ളം ചേർത്തിളക്കി അടുപ്പത്തു വച്ചു ചെറുതീയിൽ തുടരെ ഇളക്കി കുറുക്കണം.
∙ കുറുകിത്തുടങ്ങുമ്പോൾ ശർക്കര ചുരണ്ടിയതു ചേർത്തു നന്നായി വഴറ്റുക.
∙ ശർക്കര മുഴുവൻ ഉരുകിച്ചേര്ന്നു വരണ്ടു വരുമ്പോൾ പഞ്ചസാര ചേർത്തു വീണ്ടും അഞ്ചു മിനിറ്റ് വരട്ടുക.
∙ ഇതിലേക്കു കട്ടിത്തേങ്ങാപ്പാലും ഏലയ്ക്കാപ്പൊടിയും ചേ ർത്തിളക്കി യോജിപ്പിച്ചു ചെറുതായി തിളച്ചു തുടങ്ങുമ്പോൾ തന്നെ അടുപ്പിൽ നിന്നു വാങ്ങുക.
∙ പാനിൽ നെയ്യ് ചൂടാക്കി കശുവണ്ടിപ്പരിപ്പും ഉണക്കമുന്തിരിയും വറുത്തു കോരുക. ഇതേ നെയ്യിൽ തേങ്ങ ചുരണ്ടിയതു ചേർത്തു ഗോൾഡൻ നിറത്തിൽ വറുത്തെടുക്കണം.
∙ വറുത്ത ചേരുവകൾ പായസത്തിനു മുകളിൽ വിതറി വിളമ്പാം.