പ്രോൺ ഡോനട്ട്സ്!
1. യീസ്റ്റ് - ഒന്നര ചെറിയ സ്പൂൺ
പാൽ - കാൽ കപ്പ്
2. പഞ്ചസാര - രണ്ടു ചെറിയ സ്പൂൺ
ഉപ്പ് - ഒരു നുള്ള്
3. മൈദ - 250 ഗ്രാം
വെണ്ണ - 50 ഗ്രാം
ബേക്കിങ് പൗഡർ - ഒരു ചെറിയ സ്പൂൺ
മുട്ട - ഒന്ന്
4. ചെമ്മീൻ - 100 ഗ്രാം
5. എണ്ണ - പാകത്തിന്
6. സവാള - ഒന്ന്, പൊടിയായി അരിഞ്ഞത്
ഇഞ്ചി - അരയിഞ്ചു കഷണം
പച്ചമുളക് - രണ്ട് - മൂന്ന്, ചെറുതായി അരിഞ്ഞത്
7. മുളകുപൊടി - ഒരു ചെറിയ സ്പൂൺ
മഞ്ഞൾപ്പൊടി - അര ചെറിയ സ്പൂൺ
8. ഉപ്പ് - പാകത്തിന്
മല്ലിയില അരിഞ്ഞത് - അരക്കപ്പ്
9. എണ്ണ - വറുക്കാൻ ആവശ്യത്തിന്
പാകം െചയ്യുന്ന വിധം
∙ യീസ്റ്റ് ചെറുചൂടുള്ള പാലിൽ കലക്കുക. ഇതിൽ ഉപ്പും പഞ്ചസാരയും ചേർക്കുക. മൂന്നാമത്തെ ചേരുവയും യീസ്റ്റ് മിശ്രിതവും ചേർത്തു, കുഴച്ചു, മയമുള്ള മാവു തയാറാക്കുക.
∙ നന്നായി കുഴച്ചു മാറ്റി വയ്ക്കുക. മാവ് ഇരട്ടി വലുപ്പത്തിൽ പൊങ്ങി വരണം.
∙ ചെമ്മീൻ വൃത്തിയാക്കി വയ്ക്കുക.
∙ എണ്ണ ചൂടാക്കി സവാള, ഇഞ്ചി, പച്ചമുളക് എന്നിവ വഴറ്റി മൃദുവാകുമ്പോൾ ഏഴാമത്തെ ചേരുവ ചേർക്കുക.
∙ പൊടികൾ മൂത്തമണം വരുമ്പോൾ, ഇതിലേക്ക് ചെമ്മീൻ ചേർത്തു തുടരെയിളക്കുക. മുഴുവൻ വെള്ളവും വലിയണം.
∙ പാകത്തിന് ഉപ്പും മല്ലിയിലയും ചേർത്തു വാങ്ങി വയ്ക്കുക. ഇതാണ് ഫില്ലിങ്.
∙ തയാറാക്കി വച്ചിരിക്കുന്ന മാവിൽ നിന്നു ചെറിയ ഉരുളകൾ ഉണ്ടാക്കുക.
∙ ഓരോ ഉരുളയുടെയും നടുവിൽ കുഴിയുണ്ടാക്കി, അതിൽ തയാറാക്കി വച്ചിരിക്കുന്ന ഫില്ലിങ് വച്ച് ഉരുട്ടുക.
∙ മയംപുരട്ടിയ ഒരു ട്രേയിൽ ഈ ഉരുളകൾ നിരത്തി വയ്ക്കുക. ഇരട്ടി വലുപ്പത്തിൽ പൊങ്ങി വരും.
∙ ചൂടായ എണ്ണയിൽ ഗോൾഡൻ ബ്രൗൺ നിറമാകും വരെ വറുത്തു കോരുക.
∙ ഏതെങ്കിലും സോസിനൊപ്പം വിളമ്പുക.