ഫിഷ് ഇൻ പെപ്പർ ഗാർലിക് സോസ്
1. മീൻ മുള്ളില്ലാതെ കഷണങ്ങളാക്കിയത് – അരക്കിലോ
2. വെളുത്തുള്ളി അരച്ചത് – രണ്ടു വലിയ സ്പൂൺ
കുരുമുളകുപൊടി – ഒരു ചെറിയ സ്പൂൺ
നാരങ്ങാനീര് – ഒരു വലിയ സ്പൂൺ
ഉപ്പ് – പാകത്തിന്
3. വെണ്ണ – വറുക്കാൻ ആവശ്യത്തിന്
4. സ്പ്രിങ് അണിയൻ പൊടിയായി അരിഞ്ഞത് – രണ്ടു വലിയ സ്പൂൺ
5. മുട്ട – ഒന്ന്, അടിച്ചത്
പാൽ – ഒരു കപ്പ്
6. ഉപ്പ്, കുരുമുളകുപൊടി – പാകത്തിന്
7. സ്പ്രിങ് അണിയൻ ഇലകൾ അരിഞ്ഞത് – അലങ്കരിക്കാൻ
പാകം ചെയ്യുന്ന വിധം
∙ മീൻ കഷണങ്ങളിൽ രണ്ടാമത്തെ ചേരുവ പുരട്ടി കുറഞ്ഞത് ഒരു മണിക്കൂറെങ്കിലും വയ്ക്കുക. പിന്നീട് പാനിൽ വെണ്ണ ചൂടാക്കി മീൻ വറുത്തു മാറ്റി വയ്ക്കണം.
∙ അതേ വെണ്ണയിൽ സ്പ്രിങ് അണിയൻ വഴറ്റിയ ശേഷം പാ ൻ അടുപ്പത്തു നിന്നു വാങ്ങുക. ഇതിലേക്കു പാലും മുട്ടയും അടിച്ചു യോജിപ്പിച്ചത് ഒഴിച്ചു നന്നായി ഇളക്കി യോജിപ്പിക്കുക.
∙ തിരികെ അടുപ്പത്തു വച്ചു ചെറുതീയിലാക്കി തുടരെയിളക്കി കുറുക്കണം. കുറുകുമ്പോൾ പാകത്തിനുപ്പും കുരുമുളകുപൊടിയും ചേർത്തിളക്കുക.
∙ മീൻ വറുത്തത് ഒരു പരന്ന പാത്രത്തിൽ നിരത്തി, അതിനു മുകളിൽ സോസ് ഒഴിക്കണം. സ്പ്രിങ് അണിയൻ ഇലകൾ അരിഞ്ഞതു മുകളിൽ വിതറി അലങ്കരിച്ചു വിളമ്പാം.
മാംഗോ കോക്കനട്ട് ട്രൈഫിൾ പുഡിങ്
1. കസ്റ്റേർഡ് പൗഡർ – രണ്ടര വലിയ സ്പൂൺ
2. തേങ്ങാപ്പാൽ – രണ്ടു കപ്പ്
3. പഞ്ചസാര – നാലു വലിയ സ്പൂൺ
4. സ്പഞ്ച് കേക്ക് – 200–250 ഗ്രാം, സ്ലൈസ് ചെയ്തത്
5. മാംഗോ ജ്യൂസ് – ഒരു കപ്പ്
6. മാംഗോ ജാം – കാൽ കപ്പ്, അൽപം വെള്ളം ചേർത്തു കുറുകിയ പരുവത്തിലാക്കിയത്
7. മാമ്പഴം കഷണങ്ങളാക്കിയത് – പാകത്തിന്
8. ബദാം കുതിർത്തു തൊലി കളഞ്ഞു സ്ലൈസ് ചെയ്തത് – കാൽ കപ്പ്
9. തേങ്ങ ചുരണ്ടിയത് – മുക്കാൽ കപ്പ്
പഞ്ചസാര – ഒരു വലിയ സ്പൂൺ
പാകം ചെയ്യുന്ന വിധം
∙ കസ്റ്റേർഡ് പൗഡർ അൽപം തേങ്ങാപ്പാലിൽ കലക്കിയ ശേഷം ബാക്കി തേങ്ങാപ്പാലും പഞ്ചസാരയും ചേർത്ത് അടുപ്പത്തു വച്ചു കുറുക്കി കസ്റ്റേർഡ് പരുവത്തിലാക്കി വാങ്ങണം. ഇതു ചൂടാറാനായി മാറ്റി വയ്ക്കുക.
∙ സ്പഞ്ച് കേക്ക് സ്ലൈസുകൾ മാംഗോ ജ്യൂസില്‍ കുതിർത്ത ശേഷം സെറ്റ് ചെയ്യാനുള്ള ബൗളിന്റെ അടിയിലും വശങ്ങളിലും നിരത്തണം.
∙ ഇതിനു മുകളിൽ ജാം മിശ്രിതം നിരത്തിയ ശേഷം മാങ്ങാക്കഷണങ്ങൾ നിരത്തുക.
∙ ഇതിനു മുകളില്‍ ചൂടാറിയ കസ്റ്റേർഡ് മിശ്രിതം ഒഴിച്ച ശേ ഷം ബദാം അരിഞ്ഞതു നിരത്തണം.
∙ ഇങ്ങനെ വീണ്ടും പല നിരകൾ തയാറാക്കി, ഏറ്റവും മുകളി ൽ മാങ്ങാക്കഷണങ്ങൾ നിരത്തണം.
∙ തേങ്ങ ചുരണ്ടിയതു പഞ്ചസാരയും ചേർത്തിളക്കി ഇളംബ്രൗൺ നിറത്തിൽ വറുത്തു പുഡിങ്ങിനു മുകളിൽ വിതറി ഫ്രിജിൽ വച്ചു തണുപ്പിച്ചു വിളമ്പാം.
- ഫോട്ടോ : സരുൺ മാത്യു. ഫോട്ടോയ്ക്കു വേണ്ടി വിഭവങ്ങൾ തയാറാക്കിയത്: അനൂപ് ജോസഫ്, സീനിയർ സിഡിപി, ക്രൗൺ പ്ലാസ, കൊച്ചി.
