ബീഫ് സ്റ്റ്യൂ
1.ബീഫ് – അരക്കിലോ
2.കുരുമുളകുപൊടി – കാൽ ചെറിയ സ്പൂൺ
ഗരംമസാലപൊടി – അര ചെറിയ സ്പൂൺ
ഉപ്പ് – പാകത്തിന്
വെള്ളം – മൂന്നു വലിയ സ്പൂണ്
3.ഉരുളക്കിഴങ്ങ് – രണ്ട്, ചതുരക്കഷണങ്ങളാക്കിയത്
കാരറ്റ് – ഒന്ന്, ചതുരക്കഷണങ്ങളാക്കിയത്
ബീന്സ് – മൂന്ന്, അരിഞ്ഞത്
ഉപ്പ് – പാകത്തിന്
4.വെളിച്ചെണ്ണ – രണ്ടു വലിയ സ്പൂൺ
5.കുരുമുളക് – അര ചെറിയ സ്പൂൺ
ഏലയ്ക്ക – മൂന്ന്
ഗ്രാമ്പൂ – നാല്
കറുവാപ്പട്ട – അരയിഞ്ചു കഷണം
6.ഇഞ്ചി അരിഞ്ഞത് – രണ്ടു ചെറിയ സ്പൂൺ
വെളുത്തുള്ളി അരിഞ്ഞത് – രണ്ടു ചെറിയ സ്പൂൺ
പച്ചമുളക് – അഞ്ച്, പിളർന്നത്
കറിവേപ്പില – രണ്ടു തണ്ട്
ഉപ്പ് – പാകത്തിന്
7.സവാള – ഒന്ന്, അരിഞ്ഞത്
8.തേങ്ങ ചുരണ്ടിപ്പിഴിഞ്ഞെടുത്ത രണ്ടാം പാൽ – മുക്കാൽ കപ്പ്
9.കട്ടിത്തേങ്ങാപ്പാൽ – അരക്കപ്പ്
കുരുമുളകുപൊടി – പാകത്തിന്
ഗരംമസാല പൊടി – കാൽ ചെറിയ സ്പൂൺ
10.നെയ്യ് – രണ്ടു ചെറിയ സ്പൂൺ
11.കശുവണ്ടിപ്പരിപ്പ്, ഉണക്കമുന്തിരി – രണ്ടു വലിയ സ്പൂൺ വീതം
പാകം ചെയ്യുന്ന വിധം
∙ബീഫ് വൃത്തിയാക്കി കഷണങ്ങളാക്കി രണ്ടാമത്തെ ചേരുവ ചേർത്തു വേവിച്ചു വയ്ക്കണം.
∙പാനിൽ പാകത്തിനു വെള്ളം തിളപ്പിച്ച് മൂന്നാമത്തെ ചേരുവ വേവിച്ചൂറ്റി വയ്ക്കുക.
∙പാനിൽ വെളിച്ചെണ്ണ ചൂടാക്കി അഞ്ചാമത്തെ ചേരുവ മൂപ്പിക്കുക.
∙ആറാമത്തെ ചേരുവ ചേർത്തു വഴറ്റി പച്ചമണം മാറുമ്പോൾ സവാള വഴറ്റണം.
∙സവാള കണ്ണാടിപ്പരുവമാകുമ്പോൾ വേവിച്ചു വച്ചിരിക്കുന്ന ബീഫും പച്ചക്കറികളും ചേർത്തിളക്കി യോജിപ്പിക്കുക.
∙രണ്ടാം പാൽ ചേർത്തിളക്കി തിളച്ചു കുറുകി വരുമ്പോൾ ഒൻപതാമത്തെ ചേരുവ ചേർത്തിളക്കി വാങ്ങുക.
∙നെയ്യിൽ കശുവണ്ടിപ്പരിപ്പും ഉണക്കമുന്തിരിയും വറുത്തു കറിയിൽ ചേർത്തു വിളമ്പാം.
