മറുനാടൻ മലയാളികള്‍ പ്രിയ വിഭവങ്ങൾ പങ്കു വയ്ക്കുന്നു. ഇത്തവണ ഗോന്ദ്ഗം ലഡ്ഡു. തയാറാക്കിയത് അബുദാബി മലയാളി ലക്ഷ്മി അജിത്...
ഗോന്ദ്ഗം ലഡ്ഡു ചേരുവകള്‍
1. നെയ്യ് - 300 ഗ്രാം
2. ബദാം - 100 ഗ്രാം
കശുവണ്ടിപ്പരിപ്പ് - 50 ഗ്രാം
ഹെയ്സല്‍ നട്ട് - 50 ഗ്രാം
3. എഡിബിള്‍ ഗം (ഗോന്ദ് ഗം) - 100 ഗ്രാം
4. ഗോതമ്പുപൊടി - 100 ഗ്രാം
5. തേങ്ങ ചുരണ്ടി അവ്നിൽ വച്ചു വെള്ളം വലിയിച്ചത് - 50 ഗ്രാം
6. ശര്‍ക്കര പൊടിച്ചത് - 100 ഗ്രാം
ഏലയ്ക്ക പൊടിച്ചത് - ഒരു ചെറിയ സ്പൂൺ
പാകം ചെയ്യുന്ന വിധം
∙ ഒരു വലിയ പാനില്‍ അൽപം നെയ്യൊഴിച്ചു ബദാമും അണ്ടിപ്പരിപ്പും ഹെയ്സല്‍ നട്ടും വെവ്വേറെ വറുത്തു കോരുക. ഇതു മിക്സിയിലാക്കി തരുതരുപ്പായി പൊടിച്ചെടുത്തു മാറ്റി വയ്ക്കുക.
∙ ഇതേ പാനിൽ ബാക്കി നെയ്യൊഴിച്ചു ഗോന്ദ് ഗം കുറേശ്ശയായി വറുത്തു കോരുക. ഇതും മിക്സിയിൽ പൊടിച്ചെടുത്തു മാറ്റി വയ്ക്കണം.
∙ ഈ പാനിലേക്കു ഗോതമ്പുപൊടി ചേർത്തു നന്നായി വറുത്തെടുത്തു മാറ്റി വയ്ക്കുക.
∙ ഇതേ പാനിൽ പൊടിച്ചു വച്ച ബദാമും അണ്ടിപ്പരിപ്പും ഹെയ്സല്‍ നട്ടും ചേർത്തിളക്കിയ ശേഷം തേങ്ങ ചേർത്തിളക്കുക.
∙ തേങ്ങാപ്പൊടിക്കു പകരം കൊപ്ര ചെറുതായി നുറുക്കിയെടുത്തു മിക്‌സിയില്‍ പൊടിച്ചെടുത്തതോ തേങ്ങ ചുരണ്ടിയതു വറുത്തു പൊടിച്ചതോ ചേർക്കാം.
∙ ഇതിലേക്കു ഗോന്ദ് ഗം പൊടിച്ചതും ഗോതമ്പുപൊടിയും ചേര്‍ത്തു നന്നായി യോജിപ്പിക്കുക.
∙ ഇനി ശര്‍ക്കര പൊടിച്ചതും ഏലയ്ക്ക പൊടിച്ചതും കൂടി ചേര്‍ത്തു നന്നായി ഇളക്കി യോജിപ്പിച്ചതിനു ശേഷം അടുപ്പിൽ നിന്നു വാങ്ങുക.
∙ കൈയില്‍ അൽപം നെയ്യ് പുരട്ടി, ചെറുചൂടുള്ള മിശ്രിതം അൽപാൽപം വീതമെടുത്തു ചെറുനാരങ്ങാ വലുപ്പത്തിൽ ഉരുട്ടി എടുക്കുക.
∙ പാത്രത്തിൽ നിരത്തി അലങ്കരിച്ചു വിളമ്പാം.
