Monday 19 February 2018 03:10 PM IST : By രാഹുൽ രവീന്ദ്ര

80 ശതമാനം നിർമാണസാമഗ്രികളും പ്രകൃതിദത്തം; യാഹ്‌വി എന്ന വീടു വ്യത്യസ്തമാകുന്നത് ഇങ്ങനെ!

calicut-homeplan4 ചിത്രങ്ങൾ: അരുൺ പയ്യടിമീത്തൽ

ആർക്കിടെക്ട് ബിജു ബാലന്റെ സ്വന്തം വീടായ ‘ചമൻ’ പൊതു ജനങ്ങളിലേക്കെത്തുന്നത് വനിത വീട് മാസികയുടെ താളുകളിലൂടെയാണ്. വീടും പ്രകൃതിയും മനുഷ്യനുമെല്ലാം ഒന്നാകുന്നൊരു പ രീക്ഷണം. അതായിരുന്നു ചമൻ. ചുറ്റുപാടുകളും വീടും  ഇടകലർന്നൊരു ഡിസൈൻ. നിരവധി അംഗീകാരങ്ങൾ തേടിയെത്തിയ ആ വീടിനെ പലരും പിന്നീട് മാതൃകയാക്കുകയുണ്ടായി.

calicut-plan9

കോഴിക്കോട് സ്വദേശിയും സോഫ്റ്റ്‌വെയർ എൻജിനീയറുമായ സജി വീട് നിർമിക്കാൻ സ്ഥലം വാങ്ങിയത് ബിജുവിന്റെ അയൽപക്കത്തായിരുന്നു. ചമൻ കണ്ടതോടെ സജി മറ്റൊരു ആർക്കിടെക്ടിനെ തേടിയില്ല. അങ്ങനെ ചമന്റെ ആശയങ്ങൾ ഉൾക്കൊണ്ട ‘യാഹ്‌വി’ക്ക് തുടക്കമായി. മൂന്നു മാസങ്ങൾക്ക് മുമ്പ് പൂർത്തിയായ വീട്ടിലെ നിർമാണസാമഗ്രികളിൽ ഭൂരിഭാഗവും പ്രകൃതിദത്തമാണ്. സ്ഥലപരിമിതിയുള്ള പ്ലോട്ടിൽ എങ്ങനെ മികച്ച ഡിസൈൻ സൃഷ്ടിക്കാമെന്നും ഈ വീട് കാട്ടിത്തരുന്നു.

calicut-home-plan67

മൂന്നര സെന്റാണ് പ്ലോട്ടിന്റെ വിസ്തീർണം. നിയമപ്രകാരം വശങ്ങളിൽ നിന്നുള്ള സ്ഥലം വിട്ടാൽ വീടുപണി ദുഷ്ക്കരമാകും. അയൽക്കാരുടെ അനുവാദത്തോടെ ഒരു വശത്തെ അതിര് വീടിനോട് ചേർത്തെടുത്തു. അങ്ങനെ പിൻവശത്തെ ഭിത്തി ചുറ്റുമതിലിന്റെ ഭാഗമായി. എക്സ്റ്റീരിയറിന് ഭാവങ്ങൾ പലതാണ്. പോർച്ചിന്റെ ഒരു ഭാഗത്ത് സ്റ്റീൽ കമ്പികൾ തിരശ്ചീനമായി നൽകി. അതിൽ ചെടികൾ തൂക്കി കിടിലനൊരു വെർട്ടിക്കൽ ഗാർഡൻ ചെയ്തിട്ടുണ്ട്.  പോർച്ചിൽ നിന്ന് അടുക്കളയിലേക്ക് കയറാൻ മറ്റൊരു വാതിലും നൽകി.

calicut-plan10

ചെങ്കല്ല് എക്സ്പോസ് ചെയ്ത ഭാഗമാണ് എക്സ്റ്റീരിയറിന്റെ പ്രധാന ഹൈലൈറ്റ്. മണ്ണും പശയും ചോർന്ന മിശ്രിതമാണ് കല്ലുകൾക്കിടയിലെ ജോയിന്റിൽ നൽകിയത്. മെറ്റൽ ചിപ്സ് പാകിയ മുറ്റത്ത് ചെറിയൊരു ആമ്പൽക്കുളവും ഒരുക്കി. സിറ്റ്ഒൗട്ടിലേക്കുള്ള പടികൾക്ക് കടപ്പ സ്റ്റോൺ നൽകിയപ്പോൾ സിറ്റ്ഒൗട്ടിൽ വിരിച്ചത് കോട്ടാസ്റ്റോൺ. ഇവിടത്തെ ഭിത്തിയിൽ കോൺക്രീറ്റിന്റെ പരുക്കൻ ടെക്സ്ചർ കൊടുത്തതും വ്യത്യസ്തമായ കാഴ്ചയാണ്.

calicut-home-plan898

ഇന്റീരിയറിലെ വിരുന്ന്

രണ്ടടി താഴ്ത്തി ചെയ്ത ലിവിങ്സ്പേസാണ് ഉള്ളിലേക്ക് നമ്മെ വരവേൽക്കുന്നത്. ഇവിടെ കോൺക്രീറ്റ് കൊണ്ടൊരു ബിൽറ്റ് ഇൻ സോഫ ഉണ്ടാക്കിയിട്ടുണ്ട്. ഇരിപ്പിടത്തിന് കോട്ടാസ്റ്റോണും നൽകി. പഴയൊരു ബോട്ടിന്റെ പലകകൾ പുനരുപയോഗിച്ചതാണ് ടീപോയ് ആയി മാറിയത്. ഇത് മാത്രമല്ല, ഇവിടത്തെ എല്ലാ തടി ഫർണിച്ചറും റീസൈക്ക്ൾ ചെയ്തെടുത്തതാണ്. ലിവിങ്, ഡൈനിങ് സ്പേസിന് ചുറ്റുമുള്ള ഭാഗങ്ങളിലും ചെങ്കല്ല് പുറമേക്ക് കാണുന്ന രീതിയിലാണ് ഭിത്തി ഡിസൈൻ ചെയ്തിരിക്കുന്നത്. ലിവിങ്ങിന്റെ സീലിങ്ങിൽ ഒരിഞ്ച് കനമുള്ള സിമന്റ് ബോർഡ് കൊടുത്തിരിക്കുന്നു.

calicut-plan7

ഡൈനിങ് സ്പേസിന് നേരെ എതിർവശത്തുള്ള വാഷ് ഏരിയയാണ് ഇന്റീരിയറിന്റെ ബ്യൂട്ടിസ്പോട്ട്. ഒരു കോർട്‌യാർട് പോലെ ഒരുക്കിയിരിക്കുന്ന വാഷ് ഏരിയയിൽ പെബിൾസ് വിരിച്ച് ഭംഗിയാക്കിയിട്ടുണ്ട്. കരിങ്കല്ലിൽ കടഞ്ഞെടുത്ത ബേസിൻ ഇറക്കുമതി ചെയ്തത് ബാലിയിൽ നിന്ന്. വാഷ്ഏരിയ മാത്രമല്ല, ബാൽക്കണിയും അടിപൊളിയൊരു കോർട്‌യാർഡ് തന്നെ. വീട്ടുകാരുടെ ആവശ്യപ്രകാരം താഴെ ഒന്നും മുകളിൽ രണ്ടും കിടപ്പുമുറികളാണ് ഒരുക്കിയത്.  ഇവിടേക്കെത്തുമ്പോൾ വീടിന്റെ കഥ പിന്നെയും മാറുകയാണ്. മാസ്റ്റർ ബെഡ്റൂമിന്റെ ഒരു ഭിത്തിയിൽ പാനലിങ് ചെയ്തിരിക്കുന്നത് കവുങ്ങിൻ തടി കൊണ്ട്! ഇതിന്റെ താഴ്ഭാഗത്ത് പെബിൾസ് വിരിച്ച് ചെടികളും നട്ടുപിടിപ്പിച്ചു. ക്രോസ് വെന്റിലേഷന് വേണ്ടി ജനാലയും നൽകിയിട്ടുണ്ട്.  മുകളിലെ ബെഡ്റൂമിന്റെ ഹെഡ്ബോർഡ്  ചെയ്തത് ‘ബോട്ട്തടി’ കൊണ്ട്. ബങ്ക്ബെഡും സ്റ്റഡ്ഏരിയയുമായി കുട്ടികളുടെ മുറിയും സജീവമാണ്.

calicut-homre-plan45

ബാത്റൂമുകളിലെ ഡ്രൈ ഏരിയകളിൽ സാധാരണ ഗ്രാനൈറ്റ് വിരിച്ചപ്പോൾ ഗ്രിപ്പ് കിട്ടാൻ വെറ്റ് ഏരിയയിൽ ഫ്ലെയിംഡ് ഗ്രാനൈറ്റാണ് നൽകിയത്. ഭിത്തികളിൽ സ്ലേറ്റ് സ്റ്റോണിന്റെ ക്ലാഡിങ് കൊടുത്തു. സീലിങ് ഫാനുകൾ ആരോഗ്യത്തിന് ഗുണകരമല്ലെന്ന ആർക്കിടെക്ടിന്റെ അഭിപ്രായത്തെ മാനിച്ചതിനാൽ വീട്ടിൽ പെഡസ്റ്റൽ ഫാനുകൾക്കേ സ്ഥാനം കിട്ടിയുള്ളൂ. മുമ്പുണ്ടായിരുന്ന ശ്വാസസംബന്ധമായ ചില അസുഖങ്ങൾ പുതിയ വീട്ടിലെത്തിയപ്പോൾ മാറിയെന്ന് ഉടമസ്ഥൻ സജിയും അനുഭവസാക്ഷ്യം പറയുന്നു.

calicut-plan11

IDEA

1. സിമന്റിന്റെ  ഉപയോഗം കഴിവതും  കുറച്ചതിനാൽ വലിയൊരു തുക ലാഭിക്കാനായി.  ചെങ്കല്ലിന്റെ തനതു ഭംഗി എടുത്തുകാട്ടാനായി എന്നതാണ് മറ്റൊരു  മേന്മ.

2. മേൽക്കൂര വാർക്കാതെ ജിെഎ റൂഫിങ് ഷീറ്റ് കൊടുത്തു. പിന്നിലേക്ക് ചരിവുള്ള രീതിയിൽ നൽകിയതിനാൽ  സന്ദർശകരുടെ കണ്ണിൽ പെടില്ല. ഉള്ളിൽ ജിപസം ബോർഡ് നൽകി ഫോൾസ് സീലിങ് ചെയ്തിട്ടുണ്ട്.

3. പോർച്ചിൽ നിന്ന് നേരെ അടുക്കളയിലേക്ക് കയറാൻ വാതിൽ കൊടുത്തിട്ടുണ്ട്.  ഗ്യാസ്കുറ്റിയും അരിച്ചാക്കും പോലുള്ള ഭാരമേറിയ വസ്തുക്കൾ ലിവിങ്റൂം വഴി കൊണ്ടുപോകുന്നതിന്റെ ബദ്ധപ്പാട് ഒഴിവാക്കാം.

calicut-homeplan5

4. കോൺക്രീറ്റ് ചെയ്ത് കടപ്പ സ്റ്റോൺ പാകിയ ലിവിങ്ങിലെ ഇൻബിൽറ്റ് സോഫയാണ് മറ്റൊരു ചെലവുചുരുക്കൽ പരീക്ഷണം.  ഇതേ വലുപ്പത്തിലൊരു ഫാബ്രിക് സോഫ വാങ്ങണമെങ്കിൽ 50,000 രൂപയെങ്കിലും ചെലവാകും.  പുനരുപയോഗിച്ചെടുത്ത തടി കൊണ്ട് നിർമിച്ച മറ്റ് ഫർണിച്ചറും ലാഭത്തിന്റെ കണക്കിൽപെടും.

5. ഇരൂൾത്തടി കൊണ്ട് നിർമിച്ച ഭാരം കുറ‍ഞ്ഞ കോണിപ്പടിയും ഇന്റീരിയറിനോട് ഇണങ്ങി നിൽക്കുന്നു.  കൈവരികൾക്ക് ഗ്ലാസ് നൽകിയെന്നതും ശ്രദ്ധേയം.

6. കോണിപ്പടിയുടെ  ഒരു ഭാഗത്ത്  ഭിത്തി ഒഴിവാക്കി.  പകരം അവിടെ സ്റ്റീൽ ബാറുകളും  ടഫൻഡ് ഗ്ലാസും നൽകി.  സ്വാഭാവിക വെളിച്ചത്തിന് വഴിയൊരുക്കാനുള്ള ഈ െഎഡിയ നൂറ് ശതമാനം ഫലപ്രദമാണ്.

calicut-homeplan56

7. മാസ്റ്റർ ബെഡ്റൂമിന്റെ ഒരു വശത്തെ  ഭിത്തിയുടെ മുകൾഭാഗത്ത് ഗ്ലാസ് കൊടുത്തതിനാൽ വെളിച്ചത്തിന് മുട്ടില്ല.  അത്രയും ഭാഗത്തെ ചെങ്കല്ലും ലാഭമായി.

8. ഒരു മുറിയിൽ പോലും സീലിങ് ഫാൻ നൽകിയിട്ടില്ല.  ആയിനത്തിൽ  ചെലവാകേണ്ടുന്ന വയറിങ് ഉപകരണങ്ങളുടെ തുക ലാഭിച്ചെടുക്കാൻ സാധിച്ചു.  

9. ബാത്റൂമിലെ വാതിലുകൾക്ക് ഫ്രോസ്റ്റഡ് ഗ്ലാസ് നൽകിയതിനാൽ ഈർപ്പം അധിക നേരം തങ്ങി നിൽക്കില്ല.

calicut-plan5

10. വീടിന്റെ പിൻവശത്തെ ഭിത്തിയുടെ തുടർച്ചയായാണ് കോംപൗണ്ട് വോൾ നിർമിച്ചത്. ഇതിന്റെ  മുകൾഭാഗം ഗ്രില്ലിട്ട് വീടിനോട് ബന്ധിപ്പിച്ച് സുരക്ഷ വർധിപ്പിച്ചു.

11. കോണിപ്പടിക്ക് സമീപമുള്ള ഭിത്തിയുടെ മുകൾഭാഗത്ത് കാറ്റാടിക്കഴകൾ  ലൈറ്റപ്പ് ചെയ്ത് അലങ്കരിച്ചിരിക്കുന്നു. തൊട്ടുചേർന്നുള്ള ഭിത്തിയിൽ നീഷ് സ്പേസ് നിർമിച്ച് കളർബോട്ടിലുകൾ വച്ചിട്ടുണ്ട്.

12. ഗെസ്റ്റ് ബെഡ്റൂമിന്റെ ഒരു ഭിത്തി നിർമിച്ചത് ഗ്ലാസ് ബ്രിക്കുകൾ കൊണ്ടാണ്. ഭംഗിക്കു പുറമേ ബാത്റൂം പെട്ടെന്ന്് ഉണങ്ങിക്കിട്ടും, നല്ല പോലെ വെളിച്ചവും  ലഭിക്കും.

calicut-homeplan2 "കാർബൺ ഫൂട്ട്പ്രിന്റ് കഴിവതും കുറയ്ക്കുക എന്ന ലക്ഷ്യം മനസ്സിൽ വച്ചാണ് ഒാരോ വീടും രൂപകൽപന ചെയ്യുന്നത്." - ബിജു ബാലൻ, ആർക്കിടെക്ട്. സജിയും കുടുംബവും.

13. കിഡ്സ്റൂമിനോട് ചേർന്നുള്ള ബാൽക്കണി ഗ്രിൽ ഇട്ട് സുരക്ഷിതമാക്കിയിട്ടുണ്ട്. തുണികൾ ഇസ്തിരിയിടാനും  അയ കെട്ടാനും ഇവിടെ സൗകര്യമുണ്ട്.

14. മാസ്റ്റർ ബെഡ്റൂമിലെ ഒരു ഭിത്തിയുടെ  മുകൾഭാഗത്ത്  ഗ്ലാസ്  നൽകിയതിനാൽ സ്വാഭാവിക വെളിച്ചം ഇഷ്ടം പോലെ. വായുസഞ്ചാരത്തിന് ചെറിയൊരു ജനാലയും കൊടുത്തു.

calicut-plan1