ഡോ. അബ്ദുൾ ലത്തീഫ് .കെ, എംവിഎസ്ഇ ക്ലിനിക്കൽ മെഡിസിൻ, വെറ്ററിനറി സർജൻ
യുവജനങ്ങളുടെ ഇടയിൽ താരപദവിയുള്ള അരുമജീവിയാണ് ഇഗ്വാന. ഭംഗിയും വൃത്തിയും ഉണ്ട്. ഒട്ടും ആക്രമണ സ്വഭാവമില്ല താനും. അതിനാൽ വീട്ടിലെ കുട്ടികൾക്കു പോലും പരിപാലിക്കാവുന്നതേയുള്ളൂ.
∙ മെക്സിക്കോ, ബ്രസീ ൽ, അർജന്റീന തുടങ്ങിയ രാജ്യങ്ങൾ ആണ് ഇവരുടെ സ്വദേശം. വളരെ ശാന്തസ്വഭാവിയായ സസ്യഭുക്കാണ് ഇഗ്വാന.
∙ ഏകദേശം രണ്ടാഴ്ച കൊണ്ട് തന്നെ വീട്ടിലെ അംഗങ്ങളുമായി ഇഗ്വാന നന്നായി ഇണങ്ങും.
∙ പതിനായിരത്തിൽ താഴെ മാത്രം വില വരുന്ന ഗ്രീൻ ഇഗ്വാനയാണ് എണ്ണത്തിൽ കൂടുതലെങ്കിലും നീല, മഞ്ഞ, ചുവപ്പ് എന്നീ നിറങ്ങളിലുള്ള ഇഗ്വാനയും ലഭ്യമാണ്. വില താരതമ്യേന കൂടുമെന്ന് മാത്രം.
∙ ചീര, മല്ലിയില, ചെമ്പരത്തിപൂവ്, മത്തൻ ഇവയൊക്കെയാണ് ഇഷ്ടഭക്ഷണം. അതിനൊപ്പം ആവശ്യത്തിന് വെയിൽ കൊള്ളാനുള്ള സൗകര്യവുമുണ്ടെങ്കിൽ ഇഗ്വാനയ്ക്ക് അധികം ആരോഗ്യപ്രശ്നങ്ങൾ ഉണ്ടാകാറില്ല.
∙ രണ്ടര വയസ്സിലാണ് ഇവ പ്രായപൂർത്തി ആകുന്നത്. ബ്രീഡിങ് സീസണിൽ 50 മുട്ടകൾ വരെ ഇടും.
∙ പൊതുവേ കുറഞ്ഞ പരിചരണമേ ആവശ്യമുള്ളൂവെങ്കിലും ഭക്ഷണക്കാര്യത്തിലും വെയിൽ ഏൽക്കാനുള്ള അവസരമൊരുക്കുന്നതിലും പ്രത്യേക ശ്രദ്ധ പുലർത്തണം.
വിരലുകളുടെയോ വാലിന്റെയോ അറ്റം കൊഴിഞ്ഞു പോകുന്ന നേക്രോസിസ്, ത്വക്ക് രോഗങ്ങൾ, വായിൽ അൾസർ, വൈറ്റമിൻ ലഭിക്കാത്തത് കൊണ്ടുള്ള അസുഖങ്ങൾ, എല്ലുരോഗങ്ങൾ തുടങ്ങിയവ ഇവയിൽ അപൂർവമായി കാണപ്പെടുന്നുണ്ട്.
