‘ധ്യാന്‍ ശ്രീനിവാസന്റെ പ്രതികരണം വിഷമമുണ്ടാക്കി, ഞങ്ങളുടെ മുഖത്ത് കരി വാരിതേക്കുകയാണ്’: പ്രതികരിച്ച് ശോഭ

വിദേശത്ത് നടന്ന ഫാഷന്‍ ഷോയില്‍ വിധികര്‍ത്താക്കളായ ശോഭ വിശ്വനാഥും ലക്ഷ്മി നക്ഷത്രയും മല്‍സരാര്‍ഥിയോട് ചോദിച്ച ചോദ്യവും അതിനെ പരിപാടിയിൽ അതിഥിയായി പങ്കെടുത്ത നടൻ ധ്യാന്‍ ശ്രീനിവാസൻ പരിഹസിച്ചതും ചർച്ചയായിരുന്നു.

മഞ്ജു വാരിയറിനെയാണോ കാവ്യാ മാധവനെയാണോ ഇഷ്ടം എന്നായിരുന്നു ശോഭ വിശ്വനാഥും ലക്ഷ്മി നക്ഷത്രയും ചോദിച്ച ചോദ്യം. അടുത്ത ചോദ്യം ദിലീപിനെയാണോ പള്‍സര്‍ സുനിയെ ആണോ ഇഷ്ടം എന്നാവും എന്നാണ് താന്‍ വിചാരിച്ചതെന്നാണ് ധ്യാന്‍ പരിഹസിച്ചത്. ഇതു വലിയ ചര്‍ച്ചയായി മാറിയിരുന്നു. ഇപ്പോഴിതാ സംഭവത്തില്‍ ശോഭ വിശ്വനാഥിന്റെ പ്രതികരണമാണ് വൈറൽ.

ചോദ്യങ്ങള്‍ നേരത്തെ തയ്യാറാക്കിയവയാണ്. വിവാദം ഉണ്ടാക്കുന്ന ചോദ്യങ്ങളാണെന്ന് സംഘാടകരോട് പറഞ്ഞതാണ്. എന്നാല്‍ മനപ്പൂര്‍വ്വം വിവാദമുണ്ടാക്കാനുള്ള ശ്രമത്തിന്റെ ഭാഗമായി ആ ചോദ്യം ഉള്‍പ്പെടുത്തി. പൈസ തന്നാല്‍ എന്തും ചോദിക്കുമോ എന്ന് പലരും വിമര്‍ശിക്കുന്നുണ്ട്. എന്നാല്‍ ഞങ്ങള്‍ അഞ്ചിന്റെ പൈസ വാങ്ങാതെയാണ് ആ പരിപാടിയില്‍ പങ്കെടുത്തത്. പബ്ലിസിറ്റിക്കു വേണ്ടി ഞങ്ങളുടെ മുഖത്ത് കരിവാരിതേക്കുകയാണ്. ഞങ്ങളുടെ തലയില്‍ കൊണ്ടിട്ടത് ശരിയായില്ലെന്ന് സംഘാടകരോട് പറഞ്ഞിട്ടുണ്ട്. വിയോജിപ്പിച്ച് അറിയിച്ചു. മറ്റുള്ളവരുടെ കാര്യം അറിയില്ല. മഞ്ജു വാരിയരും കാവ്യ മാധവനും ശക്തരായ രണ്ട് സ്ത്രീകളാണ്. രണ്ടു പേരും ജീവിതത്തില്‍ ശക്തമായ തീരുമാനങ്ങളെടുത്തവരാണ്. പള്‍സര്‍ സുനിയെയോ ഇരയേയോ വച്ച് താരതമ്യം ചെയ്യാന്‍ പാടില്ലായിരുന്നുവെന്നും ശോഭ പറയുന്നു. വളരെ സെന്‍സിറ്റീവായ വിഷയമാണിത്. അത് വിഷമമുണ്ടാക്കി. ധ്യാന്‍ ശ്രീനിവാസന്റെ പ്രതികരണം വിഷമമുണ്ടാക്കി. ധ്യാനിനെ താന്‍ സഹോദരെ പോലെയാണ് കണ്ടത്. അങ്ങനൊരു സഹോദരനില്‍ നിന്നു പബ്ലിസിറ്റിക്കു വേണ്ടി തങ്ങളെ മോശക്കാരാക്കിയത് വിഷമമുണ്ടാക്കിയെന്നും ശോഭ പറയുന്നു.