Saturday 01 October 2022 02:50 PM IST : By സ്വന്തം ലേഖകൻ

‘അവിടെ മരണം, ഇവിടെ ഒളിച്ചോട്ടം..’. ‘ഒപ്പീസു ചൊല്ലാൻ വരട്ടെ’ ഒന്നാന്തരം; വൈറലായി ഹ്രസ്വചിത്രം

oppeesu

പ്രേക്ഷക മനംനിറച്ച് പുതിയ ഷോർട്ട് ഫിലിം 'ഒപ്പീസ് ചൊല്ലാൻ വരട്ടെ!' ഉണ്ണി ലാലു, ദീപ തോമസ് എന്നിവർ കേന്ദ്ര കഥാപാത്രങ്ങളായ 'ചിത്രം ചിരിയുടെ മാലപ്പടക്കമാണ് സോഷ്യൽ മീഡിയയിൽ തീർക്കുന്നത്. സൂരജ് കെ ആർ സംവിധാനം ചെയ്ത ചിത്രം 13 കോടിയിലേറെ കാഴ്ചക്കാരുമായാണ് മുന്നേറുന്നത്.

'കളർ പടം' എന്ന ഷോർട്ട് ഫിലിമിന് ശേഷം ബ്ലോക്ക്ബസ്റ്റർ ഫിലിംസ് നിർമ്മിച്ച 'ഒപ്പീസ് ചൊല്ലാൻ വരട്ടെ'യിൽ ഷിൻസ് ഷാൻ, ജോർഡി പൂഞ്ഞാർ, ആദർശ് സുകുമാരൻ, ആരോമൽ ദേവരാജ് എന്നിവരും ശ്രദ്ധേയമായ കഥാപാത്രങ്ങളെ അവതരിപ്പിച്ചിരിക്കുന്നു. റൊമാൻസ് കോമഡി വിഭാഗത്തിൽ പെടുന്ന ഹ്രസ്വചിത്രത്തിൽ, തളർന്നു കിടക്കുന്ന അപ്പാപ്പനെ നോക്കാനെത്തുന്ന ഹോം നഴ്സ് ആയാണ് ഉണ്ണി ലാലു എത്തുന്നത്.

മുൻപ് 'ഫ്രീഡം ഫൈറ്റ്' എന്ന ചിത്രത്തിലൂടെ പ്രേക്ഷക പ്രശംസ ഏറ്റുവാങ്ങിയ ഉണ്ണിക്കൊപ്പം, കരിക്ക് വെബ് സീരീസിലൂടെ ശ്രദ്ധേയയായ ദീപ തോമസ് നായികാ കഥാപാത്രത്തെ അവതരിപ്പിക്കുന്നു. പൂർണമായും കൊച്ചിയിൽ ചിത്രീകരിച്ച ഈ ഹ്രസ്വചിത്രത്തിന്റെ രചന സംവിധായകനായ സൂരജ് തന്നെ നിർവ്വഹിച്ചിരിക്കുന്നു. ക്യാമറ കൈകാര്യം ചെയ്തിരിക്കുന്നത് ആശംസ് എസ് പി, എഡിറ്റിംഗ് നബു ഉസ്മാൻ. സംഗീതവും പശ്ചാത്തല സംഗീതവും നിർവ്വഹിച്ചിരിക്കുന്നത് അലോഷ്യ പീറ്റർ. സൗണ്ട് ഡിസൈൻ മണികണ്ഠൻ എസ്. പ്രൊജക്റ്റ്‌ ഡിസൈനിങ്ങ് ഗ്രിഫിൻ ആന്റണി.