മധുരഗാനങ്ങൾ ബാക്കിയാക്കി മടക്കം! ചുനക്കര രാമൻകുട്ടി അന്തരിച്ചു

അധിപനിലെ ‘ശ്യാമമേഘമെ നീ...’ കോട്ടയം കുഞ്ഞച്ചനിലെ ‘ഹൃദയവനിയിലെ ഗായികയോ...’ തുടങ്ങി നിരവധി ഹിറ്റ്ഗാനങ്ങൾ മലയാളത്തിന് സമ്മാനിച്ച, കവിയും ഗാനരചയിതാവുമായ ചുനക്കര രാമൻകുട്ടി അന്തരിച്ചു. 84 വയസ്സായിരുന്നു. തിരുവനന്തപുരത്തെ സ്വകാര്യ ആശുപത്രിയിലായിരുന്നു അന്ത്യം.

1978 ൽ ആശ്രമം എന്ന ചിത്രത്തിലെ അപ്സരകന്യക... എന്നാരംഭിക്കുന്ന ഗാനം എഴുതിക്കൊണ്ടാണ് സിനിമ രംഗത്തേക്ക് കടന്നുവന്നത്. 75ഓളം സിനിമകൾക്കായി 200ലധികം ഗാനങ്ങൾ എഴുതി.

1936 ജനുവരി19 ന് മാവേലിക്കര, ചുനക്കര കാര്യാട്ടിൽ വീട്ടിലാണ് ജനനം. പന്തളം എൻ.എസ്.എസ് കോളജിൽ നിന്നു മലയാളത്തിൽ ബിരുദം നേടി.