‘ചേച്ചി ശ്വാസം കിട്ടാതെ...

പ്രിയപ്പട്ടവളുടെ മരണം ഏൽപിച്ച ആഘാതത്തെക്കുറിച്ചും മരണകാരണത്തെക്കുറിച്ചും വികാരാധീനനായി സംസാരിച്ച് നടൻ ദേവൻ. ഐസ്ക്രീമിൽ നിന്ന് അലർജിയുണ്ടായി ശ്വാസകോശത്തെ ബാധിച്ചതാണ് ഭാര്യയുടെ മരണകാരണമെന്നു ദേവൻ പറയുന്നു. ആശുപത്രിയിലെത്തിച്ചെങ്കിലും ജീവൻ രക്ഷിക്കാനായില്ലെന്ന വേദനയും ദേവൻ പങ്കുവയ്ക്കുന്ുണ്ട്. ദ് ന്യൂ ഇന്ത്യൻ എക്സ്പ്രസിന് നൽകിയ അഭിമുഖത്തിലാണ് ദേവൻ മനസുതുറന്നത്. സംവിധായകൻ രാമു കാര്യാട്ടിന്റെ മകളാണ് ദേവന്റെ ഭാര്യ സുമ.

‘‘നാല് വർഷമാകുന്നു ഭാര്യ സുമ വിട്ടുപിരിഞ്ഞിട്ട്. അവള്‍ക്ക് പെട്ടെന്ന് ഐസ്ക്രീമിന്റെ അലർജി വന്നു. ചെന്നൈയിലായിരുന്ന സമയത്ത് ഒരിക്കൽ ഐസ്ക്രീം കഴിച്ചിട്ട് ഭയങ്കരമായ ശ്വാസംമുട്ടല്‍ വന്നിരുന്നു. അന്ന് ആശുപത്രിയില്‍ കാണിച്ച് ഭേദമാക്കിയതാണ്. ഒരു കാരണവശാലും ഐസ്ക്രീം കഴിക്കരുതെന്ന് അന്ന് ഡോക്ടർ മുന്നറിയിപ്പും നല്‍കിയിരുന്നു. ഒരു ബ്രാൻഡിന്റെയും കഴിക്കരുതെന്നായിരുന്നു ഡോക്ടർമാരുടെ നിർദേശം.

പിന്നീട് നാട്ടിലുള്ള ഒരു ദിവസം മകളും അവളുടെ കുഞ്ഞുമൊക്കെ ആയി വീട്ടില്‍ വന്നു. ഞാൻ ചേർത്തലയില്‍ ഒരു ഷൂട്ടിന്റെ തിരക്കിലായിരുന്നു. കുട്ടികള്‍ക്ക് വേണ്ടി ഐസ്ക്രീം വാങ്ങി വച്ചിരുന്നു. അവർ ഊണും ഐസ്ക്രീമുമൊക്കെ കഴിച്ചിട്ട് മടങ്ങി. എനിക്ക് തോന്നുന്നത്, ഐസ്ക്രീം കണ്ടപ്പോൾ അലർജിയുടെ കാര്യം ഓർക്കാതെ എടുത്ത് കഴിച്ചു എന്നാണ്. ഒരു മണിക്കൂറായപ്പോഴേക്കും അവൾക്ക് ശ്വാസ തടസ്സം ഉണ്ടായി. ചേച്ചി ശ്വാസം കിട്ടാതെ നിലത്ത് കിടന്ന് ഉരുളുകയാണ് എന്നാണ് ജോലിക്കാരി വിളിച്ച്‌ പറഞ്ഞത്.

ഞാൻ എത്തിയപ്പോഴേക്കും കാര്യങ്ങൾ കൈവിട്ടു പോകുകയായിരുന്നു. ഉടൻ ആശുപത്രിയില്‍ എത്തിച്ചെങ്കിലും ജീവൻ രക്ഷിക്കാൻ കഴിഞ്ഞില്ല. ഐസ്ക്രീമിന്റെ അലർജി കാരണം ശ്വാസകോശത്തില്‍ സുഷിരങ്ങൾ വന്നു. ശ്വസിക്കുന്ന ശ്വാസം മുഴുവനും പുറത്തേക്ക് പോകും. മാരകമായ അവസ്ഥയായിരുന്നു.’’–ദേവന്റെ വാക്കുകൾ.

Logout