‘കുഴപ്പമില്ല മോനേ...പക്ഷേ, ഞാൻ നോക്കി വച്ചിട്ടുണ്ട്’: മാധ്യമപ്രവർത്തകനെ ആശ്വസിപ്പിച്ച് ലാലേട്ടൻ

ചാനൽ മൈക്ക് കണ്ണിൽ തട്ടിയ സംഭവത്തിൽ അതിനു കാരണക്കാരനായ മാധ്യമപ്രവർത്തകനെ ഫോണിലൂടെ ആശ്വസിപ്പിച്ച് നടൻ മോഹൻലാൽ. സാമൂഹ മാധ്യമങ്ങളിൽ മാധ്യമപ്രവർത്തകനെ കുറ്റപ്പെടുത്തുന്ന വിമർശനങ്ങൾ ശ്രദ്ധയിൽ പെട്ടപ്പോഴാണ് മോഹൻലാൽ മാധ്യമപ്രവർത്തകന്റെ ഫോൺ നമ്പർ കണ്ടെത്തി വിളിച്ചത്.

തനിക്കു യാതൊരുവിധ പ്രയാസമോ പ്രശ്നമോ ഇല്ലെന്നും പുരികത്ത് കൊള്ളാനുള്ളത് കണ്ണിൽ കൊണ്ടുവെന്നും അദ്ദേഹം മാധ്യമ പ്രവര്‍ത്തകനോടു പറഞ്ഞു. ഫോൺ വയ്ക്കാൻ നേരം ‘ഞാൻ നോക്കി വച്ചിട്ടുണ്ട് കേട്ടോ’ എന്ന ഡയലോഗ് തമാശയ്ക്ക് ആവർത്തിക്കുകയും ചെയ്തു.

‘കഴിഞ്ഞ കാര്യമല്ലേ, അത് വിട്ടേക്ക്. കുഴപ്പമൊന്നുമില്ല. ഇനി എന്തായാലും ഒന്നും ചെയ്യാൻ പറ്റില്ലല്ലോ. എന്തായാലും ഇപ്പോൾ ‘പുരികത്ത് കൊള്ളാനുള്ളത് കണ്ണിൽ കൊണ്ടു’, കുഴപ്പമൊന്നുമില്ല. എന്ത് ചെയ്യാൻ പറ്റും. കുഴപ്പമില്ല ടേക്ക് കെയർ. ഞാൻ പക്ഷേ നോക്കി വച്ചിട്ടുണ്ട്, ഇട്സ് ഓക്കേ മോനേ, ടേക്ക് കെയർ’.– മോഹൻലാൽ പറഞ്ഞു.

ആൾക്കൂട്ടത്തിനിടയില്‍ നിന്നപ്പോൾ ഇങ്ങനെയൊന്നും സംഭവിക്കുമെന്ന് ഓർത്തില്ലെന്നും കയ്യിൽ നിന്നും മൈക്ക് പെട്ടന്നു വഴുതിപ്പോയതാണെന്നും മാധ്യമ പ്രവർത്തകൻ മോഹൻലാലിനോടു പറയുന്നുണ്ട്.

ഇന്നലെ തിരുവനന്തപുരത്ത് വച്ചാണ് സംഭവം നടന്നത്. വിസ്മയ മോഹൻലാലിന്റെ സിനിമാപ്രവേശവുമായി ബന്ധപ്പെട്ട വാർത്തകൾ ചർച്ചയാകുന്നതിന് ഇടയിലാണ് ഒരു പൊതുപരിപാടിയിൽ പങ്കെടുക്കാൻ മോഹൻലാൽ തിരുവനന്തപുരത്ത് എത്തിയത്. പരിപാടിക്കു ശേഷം മടങ്ങുന്നതിന് ഇടയിൽ വിസ്മയയുടെ സിനിമാപ്രവേശവുമായ ബന്ധപ്പെട്ട പ്രതികരണത്തിനായി മാധ്യമപ്രവർത്തകർ താരത്തെ സമീപിച്ചു. ഒന്നും പറയാനില്ലെന്നു പറഞ്ഞ് കാറിലേക്കു കയറുന്നതിനിടെ, പെട്ടെന്നുണ്ടായ തിക്കിലും തിരക്കിലും പെട്ട് ഒരു ചാനൽ മൈക്ക് മോഹൻലാലിന്റെ കണ്ണിൽ തട്ടുകയായിരുന്നു. ‘എന്താ മോനേ... ഇത് കണ്ണല്ലേ’ എന്ന് ചോദിച്ച മോഹൻലാൽ ‘നിന്നെ ഞാൻ നോക്കി വച്ചിട്ടുണ്ട്’ എന്ന് തമാശരൂപത്തിൽ പറഞ്ഞാണ് കാറിലേക്ക് കയറിയത്.