സിനിമയിലുണ്ടായ പ്രശ്നം സിനിമയ്ക്കുള്ളിൽ തീർക്കാനാണ് ആഗ്രഹിക്കുന്നതെന്നും നിയമനടപടികളുമായി തൽക്കാലം മുന്നോട്ടു പോകില്ലെന്നും നടി വിൻ സി. അലോഷ്യസ്. തെറ്റൊന്നും ചെയ്തിട്ടില്ലെന്നും സിനിമയിൽ ഒരു മാറ്റമാണ് താൻ അഗ്രഹിക്കുന്നതെന്നും അമ്മ ഉൾപ്പടെയുള്ള എല്ലാ സംഘടനകളിൽ നിന്നും ആളുകൾ വിളിച്ചെന്നും പിന്തുണ അറിയിച്ചെന്നും
വിൻ സി. മനോരമ ന്യൂസിനോട് പറഞ്ഞു.
‘സിനിമയിലെ ആഭ്യന്തരപരാതി സെല്ലായ ഐസിസിയിൽ പരാതി നൽകിയിട്ടുണ്ട് ഫിലിം ചേംബറിന്റെ മോണിറ്ററിംഗ് കമ്മിറ്റിയിലും പരാതിപ്പെട്ടു. അവർ ഫോളോ അപ്പ് ചെയ്തു കൊണ്ടിരിക്കുകയാണ്.
മറ്റ് നിയമനടപടിയുമായി മുന്നോട്ടു പോകാൻ ഞാൻ തയ്യാറല്ല. ഇത് സിനിമയുടെ ഇന്റേണൽ കമ്മിറ്റിയിൽ തീരുമാനം ആക്കേണ്ട കാര്യമാണ്. ഇത് സിനിമയിലാണ് സംഭവിച്ചിട്ടുള്ളത്. അദ്ദേഹം സിനിമയുടെ അതിർത്തി വിട്ട് പുറത്തുപോയി എന്തെങ്കിലും ചെയ്താൽ നിയമം കാര്യമായി ഇടപെടേണ്ടതാണ്. സിനിമയ്ക്കുള്ളിൽ സംഭവിച്ചത് സിനിമയ്ക്ക് ഉള്ളിൽ തന്നെ തീർക്കണം എന്നാണ് ഞാൻ വിശ്വസിക്കുന്നത്’.– വിൻസി പറഞ്ഞു.
കുറെ പ്രൊഡ്യൂസേഴ്സ് പണം മുടക്കിയിരിക്കുന്ന കുറെ സിനിമകളിൽ അദ്ദേഹം ഭാഗമായിരിക്കും. ചിലപ്പോൾ പ്രധാന നടനായിരിക്കാം അല്ലെങ്കിൽ റിലീസിന് ഒരുങ്ങുന്ന ചില പടങ്ങൾ ഉണ്ടാകും. അദ്ദേഹത്തിന്റെ ആ സിനിമകൾ തീർക്കാനുള്ള അനുമതി കൊടുക്കുക. അല്ലെങ്കിൽ ഇയാളെ വേണ്ട എന്ന് വയ്ക്കാനുള്ള ധൈര്യമുണ്ടെങ്കിൽ അവർ അങ്ങനെ ചെയ്യട്ടെ. അല്ലെങ്കിൽ ഈ സിനിമകൾ തീർത്തു കഴിഞ്ഞു കഴിഞ്ഞാൽ അദ്ദേഹത്തിന്റെ ലഹരി ഉപയോഗവും പെരുമാറ്റ ദൂഷവും മാറുന്നത് വരെ അദ്ദേഹം മലയാള സിനിമയുടെ പുറത്ത് നിൽക്കട്ടെ എന്നാണ് ഞാൻ ആഗ്രഹിക്കുന്നത്. വ്യക്തതയും ബോധവുമുള്ള ആളുകൾ ഞാൻ ഇത് പറഞ്ഞതുകൊണ്ട് എനിക്ക് സിനിമ നൽകേണ്ട എന്ന് തീരുമാനിക്കില്ല എന്ന് കരുതുന്നു. ഞാൻ പറഞ്ഞതൊക്കെ നല്ല രീതിയിൽ എടുക്കുന്നവർ എനിക്ക് അവസരം തരാതെ മാറ്റി നിർത്തും എന്ന് കരുതുന്നില്ല. ഞാൻ തെറ്റ് ഒന്നും ചെയ്തിട്ടില്ലല്ലോ, നേരിട്ട കാര്യങ്ങൾ തുറന്നു പറയുകയല്ലേ ചെയ്യുന്നുള്ളൂ. അതുകൊണ്ട് ഞാൻ ശിക്ഷിക്കപ്പെടേണ്ട കാര്യമില്ലെന്നും താരം.
