കുട്ടികൾക്ക് അപകടം സംഭവിച്ചാൽ പകച്ചുനിൽക്കരുത് ! നൽകാം പ്രഥമശുശ്രൂഷ First Aid for Fractures and Bruises

കുസൃതികുരുന്നുകൾക്ക് അപകടം സംഭവിക്കുന്നതു മാതാപിതാക്കളെ സംബന്ധിച്ചിടത്തോളം ആശങ്ക വരുത്തുന്ന കാര്യമാണ്. വീഴ്ചകൾ, ഒടിവ്, ഉയരത്തിൽ നിന്നുള്ള വീഴ്ച എന്നിവ സംഭവിച്ചാൽ ചെയ്യേണ്ട പ്രഥമശുശ്രൂഷ എന്തെല്ലാമെന്നു നോക്കാം.

ഒടിവ്, ചതവ് വന്നാൽ
∙ പരുക്കു പറ്റിയ ഭാഗത്തു നിന്നും വസ്ത്രം മാറ്റുക.
∙ പരുക്കു പറ്റിയ ഭാഗം ഇളക്കം തട്ടാത്ത വിധത്തിൽ ഉറപ്പിച്ചു (stabilize) വയ്ക്കുക.
∙ വീക്കം കുറയ്ക്കാൻ പരുക്കു പറ്റിയ കൈകാലുകൾ ഉയർത്തി വയ്ക്കുക.
∙ നേരിയ തുണിയിൽ പൊതിഞ്ഞ ഐസ്പായ്ക്ക് (Ice pack) വയ്ക്കുക.
∙ പാരസെറ്റമോളോ ഡോക്ടർ നിർദേശിച്ച മറ്റു വേദനസംഹാരികളോ നൽകുക.
∙ ലഭ്യമെങ്കിൽ ഒരു സ്പ്ലിന്റോ (splint) അല്ലെങ്കിൽ മടക്കിയ ന്യൂസ് പേപ്പറോ പുസ്തകമോ ഉപയോഗിച്ചു പരുക്കു പറ്റിയ ഭാഗം നിശ്ചലമാക്കി ഉറപ്പിച്ചു വയ്ക്കുക.
∙ അധികം അമർത്തിക്കെട്ടാതിരിക്കുക. ഉടൻ വൈദ്യസഹായം ലഭ്യമാക്കുക.

ഗൗരവ സൂചനകൾ തിരിച്ചറിയുക‌
∙ വേദനസംഹാരി കഴിച്ചിട്ടും ശക്തമായി വേദനിക്കുക ∙ കൈകാലുകൾ ഉയർത്തുമ്പോൾ വേദനി
ക്കുക ∙ പരുക്കു പറ്റിയ ഭാഗത്തു വിളർച്ച, തണുപ്പ്, നീലനിറം, വീക്കം എന്നിവ അധികരിക്കുക ∙ തരിപ്പ് അനുഭവപ്പെടുക.

ഉയരത്തിൽ നിന്നു വീണാൽ

പ്രഥമ ശുശ്രൂഷ
∙ കുട്ടിയെ സമാധാനിപ്പിക്കുക.
∙ ഭയപ്പെടാതെ ശാന്തമായിരിക്കാൻ പ്രേരിപ്പിക്കുക.
∙ വീക്കമുണ്ടെങ്കിൽ 10-15 മിനിറ്റോളം ഐസ് നേരിയ തുണിയിൽ പൊതിഞ്ഞു വയ്ക്കുക.
∙ രക്തസ്രാവമുണ്ടെങ്കിൽ വൃത്തിയുള്ള തുണി വച്ച് 10 മിനിറ്റ് അമർത്തിപ്പിടിക്കുക.
∙ പാരസെറ്റമോളോ ഡോക്ടർ നിർദേശിച്ച വേദനസംഹാരികളോ നൽകുക.
∙ ആസ്പിരിൻ ഗുളിക നൽകരുത്.
∙ കുട്ടിയെ കുടയുകയോ ഇളക്കുകയോ ചെയ്യരുത്. ഇതു നട്ടെല്ലു പോലുള്ള ഭാഗങ്ങളിലെ ക്ഷതം വർധിപ്പിച്ചേക്കാം.
∙ പെട്ടെന്നു വൈദ്യസഹായം ലഭ്യമാക്കുക.

ഗൗരവ സൂചനകൾ
∙ കുറഞ്ഞ സമയത്തേക്കെങ്കിലുമുള്ള ബോധക്ഷയം. ∙ മൂക്ക്, ചെവി, വായ എന്നിവിടങ്ങളിൽ നിന്നു രക്തമോ തെളിഞ്ഞ ദ്രാവകമോ വരിക ∙ തുടരെത്തുടരെ ഛർദിക്കുക ∙ പരിചയമുള്ളവരെ തിരിച്ചറിയാതിരിക്കുക ∙ നിർത്താതെ കരയുക ∙ അപസ്മാരം ∙ കേൾവി, കാഴ്ച, ചലനം എന്നിവയ്ക്കു ബുദ്ധിമുട്ട്.

തയാറാക്കിയത്

ഡോ. യഹ്‌യ വി. പി.
കൺസൽറ്റന്റ് പീഡിയാട്രീഷൻ
ഇസാഫ് ഹോസ്പിറ്റൽ, തച്ചന്പാറ, പാലക്കാട്