പ്രതിരോധശേഷിക്കുറവ് കാരണം അണുബാധ വരാം: വാതരോഗത്തിനു മരുന്നു കഴിക്കുന്നവർ അറിയാൻ Potential Side Effects of Arthritis Medications

ശരീരത്തിലെ ഒന്നിലധികം സന്ധികൾക്ക് ഉണ്ടാകുന്ന വീക്കം, വേദന, നീർക്കെട്ടൽ എന്നിവ കാരണം  ഉണ്ടാകുന്ന അസുഖമാണ് ആർ‌ത്രൈറ്റിസ് അഥവാ വാതരോഗം. നൂറിലധികം വാതരോഗങ്ങൾ ഉള്ളതിൽ പ്രധാനപ്പെട്ടവയാണ്–
∙ സന്ധിവാതം (ഓസ്‌റ്റിയോ ആർത്രൈറ്റിസ്) ∙ ആമവാതം ( റുമറ്റോയ്ഡ് ആർത്രൈറ്റിസ്)
∙ സോറിയാറ്റിക് ആർത്രൈറ്റിസ്. ഓട്ടോ ഇമ്യൂൺ രോഗങ്ങളായ ലൂപസ് എറിത്‌മാറ്റിസ്, ഗൗട്ട്.
വേദനാസംഹാരികളും സ്റ്റിറോയ്ഡും
ഓസ്റ്റിയോ ആർത്രൈറ്റിസ് അഥവാ സന്ധിവാതമാണ് ഏറ്റവും കൂടുതൽ കാണപ്പെടുന്ന വാതരോഗം. സന്ധികളുടെ പ്രവർത്തനത്തെ പ്രതികൂലമായി ബാധിക്കുന്ന ഈ രോഗം പതിയെ പതിയെ അവയുടെ പ്രവർത്തനം പൂർണമായി തടസ്സപ്പെടുത്തുന്നു.
രോഗവുമായി ബന്ധപ്പെട്ട ബുദ്ധിമുട്ടുകൾ കുറയ്ക്കുക, സന്ധികളുടെ ഘടന, തരുണാസ്ഥികൾ, അസ്ഥികൾ എന്നിവയ്ക്ക് ഉണ്ടാകുന്ന തകരാറുകൾ പരിഹരിക്കുക കൂടുതൽ ഗുരുതരമായ തകരാറുകൾ സംഭവിക്കുന്നതു തടയുക തുടങ്ങിയുള്ള കാര്യങ്ങൾക്കാണു മരുന്നുകൾ നൽകുക.
∙ എൻഎസ്എഐഡികൾ  (Non Steroid Anti-inflammatory Drugs)– ഒപിയം, ഓപിയോഡ് മരുന്നുകൾ തുടങ്ങിയ വേദനസംഹാരികൾ ഈ വിഭാഗത്തിൽപ്പെടുന്നു. ഉദാ: ട്രമഡോൾ, ഡൈക്ലോഫിനാക്, ഇബുപ്രൂഫൻ, പാരസിറ്റമോൾ.
∙ സ്റ്റിറോയിഡുകളായ പ്രെഡ്നിസൊളോണും അതിന്റെ വകഭേദങ്ങളും കഴിക്കുന്നതിനോ  കുത്തിവയ്പു രൂപത്തിലോ നൽകുന്നു.
∙സന്ധികളിലെ ഘർഷണം കുറയ്ക്കുന്നതിനു വേണ്ടി ഹയാലുറോണിക് ആസിഡ് പോലെയുള്ള കുത്തിവയ്പുകൾ ഉപയോഗിക്കുന്നു.
ആമവാതത്തിന്റെ മരുന്നുകൾ
ഓട്ടോഇമ്യൂൺ രോഗ ശ്രേണിയിൽപെട്ട വാതരോഗമാണ് ആമവാതം. സൈനോവിയൽ സന്ധികളെ ബാധിക്കുന്ന ഈ രോഗം ശരീരത്തിലെ വിവിധ സന്ധികളുടെ ഘടനയേയും ചലനശേഷിയേയും ബാധിക്കുന്നു. തന്മൂലം സന്ധികളുടെ ചലനശേഷി കുറയുകയും നീർക്കെട്ട് ഉണ്ടാവുകയും ചെയ്യും.
പ്രധാനമായും ഉപയോഗിക്കുന്ന മരുന്നുകൾ താഴെ പറയുന്നവയാണ്.
∙ എൻഎസ്എഐഡികൾ
∙ കോർട്ടിക്കോ സ്റ്റിറോയിഡുകൾ
∙ ഡിഎംഎആർഡിഎസ്- (Disease Modifying Anti-rheumatic Drugs)
∙ സ്റ്റിറോയിഡുകളടങ്ങിയ മരുന്നുകൾ വേദനയും നീർക്കെട്ടും പെട്ടെന്നു കുറയ്ക്കും. മാത്രമല്ല അവ ഓട്ടോ ഇമ്യൂൺ രോഗത്തിന്റെ ഭാഗമായ ഹൈപർ ഇമ്യൂൺ പ്രവർത്തനങ്ങളെ പ്രതിരോധിക്കുകയും ചെയ്യുന്നു. പ്രധാനമായി ഉപയോഗിക്കുന്ന മരുന്നുകൾ ഡെക്സാമെതസോൺ, മീഥയിൽ, പ്രഡ്നിസലോൺ, ട്രയാമ്സിനലോൺ എന്നിവയാണ്.
പാർശ്വഫലങ്ങൾ അറിയാം
∙വേദനാസംഹാരികളുടെ നിരന്തരമായ ഉപയോഗം കാരണം രക്തസമ്മർദവ്യതിയാനം, വൃക്കരോഗങ്ങൾ, ആമാശയം, കുടൽ എന്നിവിടങ്ങളിൽ നിന്നു രക്തസ്രാവം, ചില ഹൃദയ സംബന്ധരോഗങ്ങൾ എന്നിവ വരാം.
∙ സ്റ്റിറോയ്ഡ് മരുന്നുകൾ ഡോക്ടർ നിർദേശിക്കുന്ന കാലയളവു മാത്രം ഉപയോഗിക്കുക.അല്ലെങ്കിൽ പ്രമേഹം, എല്ലുകളുടെ ശോഷണം, ആ മാശയത്തിലും കുടലിലും വ്രണങ്ങള്‍, തിമിരം തുടങ്ങിയവ വരാനിടയാകാം.
∙അപസ്മാരത്തിനും രക്തം കട്ടപിടിക്കാതിരിക്കാനുമുള്ള മരുന്നു കഴിക്കുന്നവർ, പ്രമേഹരോഗികൾ, എച്ച്ഐവി ബാധിതർ, മറ്റു മരുന്നുകൾ ദീർഘകാലം കഴിക്കുന്നവർ എന്നിവർ ഡോക്ടറോട് അക്കാര്യം സംസാരിക്കണം.
∙ ഗർഭിണികളിലും മുലയൂട്ടുന്നവരിലും ഉപയോഗം ശ്രദ്ധിക്കണം.
∙ കോർട്ടിക്കോസ്റ്റിറോയ്ഡ് മരുന്നു കഴിക്കുന്നവരിൽ  പ്രതിരോധശേഷി കുറയുന്നതിനാൽ വൈറൽ, ഫംഗൽ, ബാക്ടീരിയൽ അണുബാധകൾക്കു സാധ്യത കൂടുതലാണ്.