യൂറിക് ആസിഡിനെ ഭയക്കണോ? ചില മിഥ്യാധാരണകൾ

പൊതുവെ മലയാളികൾക്കിടയിൽ ഏറ്റവും അധികം അബദ്ധധാരണകൾ നിലവിലുള്ള വിഷയം ആണ് യൂറിക് ആസിഡ്. ശരീരത്തിൽ എവിടെയെങ്കിലും പ്രത്യേകിച്ച് സന്ധികളിൽ ഒരു വേദന വന്നാൽ പലപ്പോഴും കുറ്റം യൂറിക്കാസിഡിന്റെ തലയിൽ ആണ് നാം വയ്ക്കാറ്. കൃത്യമായ വിവരങ്ങൾ നൽകാതെ ആവശ്യത്തിനും അനാവശ്യത്തിനും യൂറിക് ആസിഡ് ടെസ്റ്റ് ചെയ്ത് പലപ്പോഴും ഡോക്ടർമാരും ഈ ഒരു അകാരണമായ ഭയത്തിന് ആക്കം കൂട്ടുന്നു.

യൂറിക് ആസിഡ് ശരീരത്തിൽ ക്രമാതീതമായി കൂടുമ്പോൾ ഉണ്ടാകുന്ന ഹൈപ്പർയൂറിസിമിയ എന്ന അവസ്ഥയും യൂറിക് ആസിഡ് സന്ധികളിൽ ചെന്ന് അടിഞ്ഞുണ്ടാകുന്ന ഗൗട്ട് എന്ന ആർത്രൈറ്റിസ് രോഗവുമായി ഡോക്ടറെ കാണാൻ എത്തുന്ന രോഗികളുടെ എണ്ണം ഗണ്യമായി കൂടുന്നുണ്ടെങ്കിലും കൃത്യമായ ചികിത്സ പലർക്കും കിട്ടാറില്ല എന്നതാണ് സത്യം .

രാജാക്കന്മാരുടെ രോഗം എന്നും രോഗങ്ങളിലെ രാജാവ് എന്നും ഒരേസമയം അറിയപ്പെടുന്ന രോഗം ആണ് ഗൗട്ട് . ജീവിതശൈലിരോഗങ്ങൾ കൂടുന്നതു മൂലവും വൈദ്യശാസ്ത്രത്തിലും മരുന്നുകളിലും ആയുർദൈർഖ്യത്തിലും ഉണ്ടായ മുന്നേറ്റങ്ങൾ മൂലവും ലോകമെമ്പാടും കഴിഞ്ഞ കുറച്ചു ദശകങ്ങളിൽ പ്രത്യേകിച്ചും ഇന്ത്യയിൽ ഹൈപ്പർയൂറിസിമിയ / ഗൗട്ട് രോഗാവസ്ഥകളിൽ വൻതോതിൽ ഒരു വർധന ഉണ്ടായതായി കാണാനാകുന്നുണ്ട് .

ശരിക്കും യൂറിക് അസിഡിനെ നമ്മൾ ഭയക്കണോ ??

1.എന്താണ് യൂറിക് ആസിഡ് ? എങ്ങനെ ശരീരത്തിൽ അത് ഉണ്ടാകുന്നു?

ശരീരത്തിൽ പ്യൂരിൻ (purine) അടങ്ങിയ പ്രോട്ടീൻ പദാർത്ഥങ്ങൾ വിഘടിച്ചുണ്ടാകുന്ന അന്തിമ ഉല്പന്നമാണ് യൂറിക് ആസിഡ് .പക്ഷികൾ പോലെയുള്ള ജീവജാലങ്ങളിൽ യൂറിക്കേസ് (Uricase) എന്ന എൻസൈം ഉള്ളതിനാൽ യൂറിക്കാസിഡിനെ ജലത്തിൽ ലയിക്കുന്ന അല്ലൻറ്റോയ്‌ൻ ആയി പുറന്തള്ളാനാകുന്നു . അതുകൊണ്ട് ശരീരത്തിൽ യൂറിക് ആസിഡ് കൂടുന്നില്ല . എന്നാൽ മനുഷ്യരിൽ ഈ എൻസൈം ഇല്ലാത്തതിനാൽ യൂറിക് ആസിഡ് രൂപത്തിൽ തന്നെയാണ് കിഡ്നി ഇതിനെ പുറന്തള്ളുന്നത്.

2.യൂറിക് ആസിഡ് വിഷമാണോ ?? ശരീരത്തിന് അത് ആവശ്യമുണ്ടോ ??

അല്ല. യൂറിക് ആസിഡ് പൂർണമായും ഒരു വിഷപദാർത്ഥം അല്ല. ഒരു നിശ്ചിത അളവിൽ യൂറിക് ആസിഡ് ശരീരത്തിൽ സുപ്രധാന പ്രവർത്തനങ്ങളിൽ വലിയ പങ്കുവഹിക്കുന്നുണ്ട് .

പ്രധാനമായും:

a)രോഗപ്രതിരോധവ്യവസ്ഥ അഥവാ ഇമ്മ്യൂൺ സിസ്റ്റത്തിന്റെ പ്രവർത്തനങ്ങൾ

b)തലച്ചോറിന്റെ വികാസവും പ്രവർത്തനങ്ങളും

c)ആന്റിഓക്സിഡന്റ് പ്രവർത്തനങ്ങൾ

3.യൂറിക് ആസിഡ് രക്തത്തിൽ കൂടിയാൽ എപ്പോഴും അത് രോഗകാരണമാകുമോ ??

യൂറിക് ആസിഡ് ശരീരത്തിൽ കൂടി നിൽക്കുന്ന അവസ്ഥയാണ് ഹൈപ്പർയൂറിസിമിയ. ഹൈപ്പർയൂറിസിമിയ ഉള്ളവരിൽ സന്ധികളിലും മറ്റു ശരീരഭാഗങ്ങളിലും യൂറിക് ആസിഡ് ചെന്ന് അടിഞ്ഞുകൂടി ഉണ്ടാകുന്ന ആർത്രൈറ്റിസ് രോഗമാണ് ഗൗട്ട്.

ഹൈപ്പർയൂറിസിമിയയും ഗൗട്ടും ഒന്നല്ല.

എല്ലാ ഹൈപ്പർയൂറിസിമിയയും ഗൗട്ട് ആകാറില്ല.

എല്ലാ ഹൈപ്പർയൂറിസിമിയക്കും ചികിത്സ ആവശ്യമില്ല.

എന്നാൽ ഗൗട്ടിന് ചികിത്സ ആവശ്യമാണ്.

ചില പ്രത്യേക സന്ദർഭങ്ങളിൽ മറ്റു രോഗാവസ്ഥകളുടെയോ അപകടസാധ്യതാഘടകങ്ങളുടെയോ സാന്നിദ്ധ്യത്തിൽ ഗൗട്ട് ഇല്ലെങ്കിലും ഹൈപ്പർയൂറിസിമിയ ചികിൽസിക്കാറുണ്ട്.

4.ശരീരത്തിൽ യൂറിക് ആസിഡ് എന്തുകൊണ്ട് കൂടുന്നു ?

പ്രധാനമായും രണ്ടു തരം കാരണങ്ങളാണുള്ളത് എന്ന്‌ പറയാനാകും. ഒന്നുകിൽ യൂറിക്കാസിഡ് കിഡ്‌നി വഴി പുറന്തള്ളുന്നതു കുറയുമ്പോൾ . അല്ലെങ്കിൽ യൂറിക്കാസിഡിന്റെ ഉല്പാദനം ശരീരത്തിൽ കൂടുമ്പോൾ .

അതിൽ സുപ്രധാനം വൃക്കരോഗങ്ങൾ,തൈറോയ്ഡ് പാരാതൈറോയ്‌ഡ് ഗ്രന്ഥി രോഗങ്ങൾ, ചില മരുന്നുകളുടെ പാർശ്വഫലം (ആസ്പിരിൻ, ടിബി മരുന്നുകൾ, ഡൈയൂറിറ്റിക് മരുന്നുകൾ തുടങ്ങിയവ), മെറ്റബോളിക് സിൻഡ്രോം, നിർജ്ജലീകരണം തുടങ്ങിയ അവസ്ഥകൾ മൂലം കിഡ്‌നി വഴി യൂറിക് ആസിഡ് പുറന്തള്ളുന്നത് കുറയുന്നതു കൊണ്ടാണ്

ഭക്ഷണസ്രോതസ്സിലൂടെ പ്യൂരിൻ അടങ്ങിയ പ്രോട്ടീൻ ധാരാളമായി ശരീരത്തിൽ എത്തിച്ചേർന്നാലോ അതല്ലെങ്കിൽ രോഗങ്ങൾ (ജനിതകപരമായ എൻസൈം തകരാറുകൾ, കാൻസർ സംബന്ധമായ രോഗങ്ങൾ, രക്തത്തിലെ കോശങ്ങൾക്ക് നാശം സംഭവിക്കുന്ന ഹീമോലിറ്റിക് രോഗങ്ങൾ, കാൻസർ ചികിത്സയുടെ പാർശ്വഫലം, സോറിയാസിസ് പോലെയുള്ള ത്വക്ക് രോഗങ്ങൾ മുതലായവ) മൂലവുമോ യൂറിക് ആസിഡ് ഉത്പാദനം ശരീരത്തിൽ കൂടിയാലും ഹൈപ്പർയൂറിസിമിയ ഉണ്ടാകാം

വളരെ കുറച്ചു പേരിലെങ്കിലും കാരണം കണ്ടെത്തുക സാധ്യമല്ലാതെയും വരാറുണ്ട്.

5.യൂറിക് ആസിഡിന്റെ അളവ് എത്ര ആണെങ്കിൽ കൂടുതൽ ആണെന്ന് പറയാം ??

സാധാരണയായി പുരുഷന്മാരിൽ 7mg/dl നു മുകളിലും സ്ത്രീകളിൽ 6mg/dl നു മുകളിലും ആണെങ്കിൽ അത് കൂടുതലായി കണക്കാക്കാറുണ്ട്. പഠനങ്ങൾ സൂചിപ്പിക്കുന്നത് രക്തത്തിലെ അളവ് 6.8mg/dl നു മുകളിൽ ആണെങ്കിൽ സന്ധികളിൽ അടിഞ്ഞുകൂടാനുള്ള സാധ്യത കൂടുന്നു എന്നാണ്. എന്നാൽ പലപ്പോഴും 9mg/dl നു മുകളിൽ ഉള്ളവരിൽ പോലും 5-10 % പേരിൽ മാത്രമാണ് ഗൗട്ട് ഉണ്ടാകുന്നതായി കാണുന്നത്.

കണക്കുകൾ പ്രകാരം പ്രായപൂർത്തിയായവരിൽ 10% പേരിലും ജീവിതത്തിൽ ഒരിക്കലെങ്കിലും യൂറിക് ആസിഡ് കൂടുതലാകുന്ന ഹൈപ്പർയൂറിസിമിയ ഉണ്ടാകാറുണ്ട്. എന്നാൽ അവരിൽ തന്നെ ഇരുപതു ശതമാനത്തിലും താഴെ ആളുകളിൽ മാത്രമേ എന്തെങ്കിലും രോഗലക്ഷണങ്ങൾ ഉണ്ടാകുന്നുള്ളൂ.

അതിനാൽ മേൽപറഞ്ഞ അളവുകൾക്കു മുകളിൽ കാണുമ്പോൾ തന്നെ എല്ലാവരിലും ചികിത്സ തുടങ്ങേണ്ട ആവശ്യം ഇല്ല.

6.ഗൗട്ടിന്റെ രോഗലക്ഷണങ്ങൾ എന്തൊക്കെയാണ് ?

തുടക്കത്തിൽ, കൂടുതലായും രാത്രികാലങ്ങളിൽ, ഏതെങ്കിലും ഒരു സന്ധിയിൽ, പ്രത്യേകിച്ചും കാലിലെ പെരുവിരൽ, കണങ്കാൽ മുതലായവയിൽ പൊടുന്നനെയുള്ള അതിശക്തമായ വേദന, നിറവ്യത്യാസം, വീക്കം എന്നിവയാണ് കാണാറ്. കുറച്ചു മണിക്കൂറുകൾ മുതൽ കുറച്ചു ദിവസങ്ങൾ വരെ വേദന നീണ്ടുനിൽക്കാം. കുറച്ചു നാളുകൾക്കു ശേഷം അതേ സ്ഥലത്തോ അല്ലെങ്കിൽ മറ്റൊരു സന്ധിയിൽ ഇതേ പോലെ തന്നെ രോഗലക്ഷണങ്ങൾ വീണ്ടും വരാവുന്നതാണ്

ചികിത്സ ഇല്ലാതെ മുന്നോട്ടുപോകുന്നവരിൽ സന്ധികൾ മാത്രമല്ലാതെ മറ്റു സ്ഥലങ്ങളിലും ശരീരത്തിലെ ഏതു ഭാഗത്തും യൂറിക് ആസിഡ് അടിഞ്ഞുകൂടി ടോഫെകൾ (Tophi) രൂപപ്പെടുകയും അവ ശരീരഭാഗങ്ങൾക്കും അവയവങ്ങൾക്കും സാരമായ തകരാറുകൾ ഉണ്ടാക്കുകയും ചെയ്യും. ഇതു കൂടാതെ രക്താതിസമ്മർദ്ദം , ഹൃദയസ്തംഭനം, മസ്തിഷ്കാഘാതം, വൃക്കരോഗങ്ങൾ എന്നിവയ്ക്കും ഹൈപ്പർയൂറിസിമിയ വഴിവെക്കാറുണ്ട്..

7.എപ്പോളൊക്കെയാണ് ചികിത്സ ആവശ്യമുള്ളത് ??

മറ്റു രോഗങ്ങളോ അപകടസാധ്യതകളോ ഇല്ലെങ്കിൽ പലപ്പോഴും പുരുഷന്മാരിൽ 13mg/dl വരെയും സ്ത്രീകളിൽ 10mg/dl വരെയും പോലും ചികിത്സ ഇല്ലാതെ തുടരാനാവും . എന്നാൽ 9mg/dl നു മുകളിൽ അവയവങ്ങളുടെ തകരാറിനുള്ള സാധ്യത ഉണ്ടെന്നിരിക്കെ പലപ്പോഴും ഡോക്ടർമാർ ആ അളവിനുമുകളിൽ ചികിത്സ ആരംഭിക്കാറുണ്ട്. ഇനി മുകളിൽ മുൻപു പറഞ്ഞ പോലെയുള്ള രോഗാവസ്ഥകളോ അപകടസാധ്യതകളോ ഉള്ളവരിൽ ഒൻപതിന് താഴെ ആണെങ്കിൽ പോലും ചികിത്സ വേണ്ടിവരാറുണ്ട്.

ചുരുക്കിപ്പറഞ്ഞാൽ ഓരോ രോഗിയും വ്യത്യസ്തരാണ്. അതിനാൽ തന്നെ ചികിത്സ ആവശ്യമാണോ എന്ന് നിർണയിക്കുന്നതിൽ ഈ രോഗങ്ങൾ ചികിൽസിച്ചു പരിചയം ഉള്ള ഒരു ചികിത്സകനുള്ള പങ്ക് വളരെ വലുതാണ്. യൂറിക് ആസിഡിന്റെ രക്തത്തിലെ അളവ് മാത്രം നോക്കിയല്ല ചികിത്സ തീരുമാനിക്കുന്നത് .

8.രോഗനിർണയം നടത്താൻ എന്തൊക്കെ ടെസ്റ്റുകൾ ആണ് ചെയ്യണ്ടത് ??

രോഗലക്ഷണങ്ങൾ വിശകലനം ചെയ്ത് വിശദമായ ശരീര പരിശോധനയിലൂടെ ഒരു വിദഗ്ധന് രോഗനിർണയം സാധ്യമാകാമെങ്കിലും പലപ്പോഴും രക്തപരിശോധനകൾ, മൂത്രപരിശോധന, സ്കാനിംഗ് , എക്‌സ്‌റേ, സന്ധികളിൽ നിന്ന് നീരെടുത്തു പരിശോധന തുടങ്ങി ധാരാളം പരിശോധനകൾ ആവശ്യമായി വന്നേക്കാം . ഓരോ രോഗിയുടെയും വിശദമായ പരിശോധനക്ക് ശേഷം ഡോക്ടറുടെ നിർദേശപ്രകാരം ടെസ്റ്റുകൾ ചെയ്യുന്നതാണ് എപ്പോഴും ഉചിതം.

9.ചികിത്സ എങ്ങനെയാണ് ? ഒരിക്കൽ തുടങ്ങിയാൽ ജീവിതകാലം മുഴുവൻ മരുന്നുകഴിക്കണോ ??

ചികിത്സ പല ഘട്ടങ്ങളായാണ് നടക്കുന്നത്.

ഓരോ തവണയും ഉണ്ടാകുന്ന വേദന വീക്കം എന്നിവ (Acute arthritis) നിയന്ത്രിക്കാൻ 2 മുതൽ 3 ആഴ്ചകൾ വരെ നീണ്ടുനിൽക്കുന്ന മരുന്നുകളും ചികിത്സയും ആവശ്യം വരാറുണ്ട് .

വീണ്ടും ഇതുപോലെ ആർത്രൈറ്റിസ് എപ്പിസോഡുകൾ ഉണ്ടാകുന്നത് തടയാൻ (Prophylactic) ചികിത്സ 6 മാസത്തോളം തുടരേണ്ടി വരാറുണ്ട് .

യൂറിക് ആസിഡിന്റെ രക്തത്തിലെ അളവുകുറച്ചു നിർത്താനുള്ള Urate Lowering Therapy ചിലരിൽ എങ്കിലും അവരുടെ രോഗത്തിന്റെ പ്രത്യേകതകൾ മൂലവും യൂറിക് ആസിഡ് കൂടുന്നതിന്റെ കാരണം എന്ത് എന്നതിനെ ആശ്രയിച്ചും അനിശ്ചിതകാലം അല്ലെങ്കിൽ ആജീവനാന്തം തുടരേണ്ടി വരാൻ സാധ്യതയുണ്ട്.

സംഘീർണതകളുടെയും അനുബന്ധരോഗങ്ങളുടെയും (Complications and comorbidities) ചികിത്സ എത്ര നാളത്തേക്കെന്നത് നിശയിക്കുന്നത് ഓരോ രോഗിയുടെയും വിശദമായ പരിശോധനക്ക് ശേഷം മാത്രമേ സാധ്യമാകൂ .

എല്ലാവരിലും ആജീവനാന്ത ചികിത്സ എന്നത് മിഥ്യാധാരണ മാത്രമാണ് . ഓരോ രോഗിക്കും ഉപയോഗിക്കുന്ന മരുന്നുകൾ, അതിന്റെ ധൈർഘ്യo എന്നിവ വ്യത്യസ്തമായിരിക്കും.

10.ചികിത്സ എടുക്കാതെ ഭക്ഷണക്രമത്തിലെ നിയന്ത്രണങ്ങൾ കൊണ്ടുമാത്രം രോഗം ബേധമാക്കാനാവില്ലേ ?? ഭക്ഷണക്രമത്തിൽ ശ്രദ്ധിക്കേണ്ടത് എന്തൊക്കെയാണ്??

ഭക്ഷണനിയന്ത്രണത്തിലൂടെ രക്തത്തിലെ യൂറിക് ആസിഡിന്റെ അളവിൽ 1-2 mg/dl കുറവു വന്നേക്കാം എങ്കിലും അതുകൊണ്ടു മാത്രം രോഗശമനമോ രോഗനിയന്ത്രണമോ എല്ലാവരിലും പൂർണമായി സാധ്യമാവില്ല.

ഒഴിവാക്കേണ്ട/അളവ് കുറക്കേണ്ട ഭക്ഷണങ്ങൾ :

-മദ്യം - പ്രത്യേകിച്ചും ബിയർ

- റെഡ് മീറ്റ് - ബീഫ്, മട്ടൺ , പോർക്ക്, ലിവർ എന്നിവ

- സോഡ ഉൾപ്പടെയുള്ള കാർബനേറ്റഡ് പാനീയങ്ങൾ

- ചിപ്പി, കക്ക, മത്തി, ചൂര , നെത്തോലി മുതലായ സമുദ്രവിഭവങ്ങൾ

- ഫ്രക്ടോസ് അടങ്ങിയ ബേക്കറി മധുര പലഹാരങ്ങൾ

ഭയപ്പെടാതെ തുടർന്നു ഉപയോഗിക്കാവുന്നവ :

- പാലും പാലുൽപ്പന്നങ്ങളും

- പച്ചക്കറി /പയറുവർഗ്ഗങ്ങൾ /പരിപ്പുവർഗങ്ങൾ

- ചീര/ഇലക്കറികൾ / മഷ്‌റൂം

- മറ്റു ചെറുമൽസ്യങ്ങൾ

യൂറിക് ആസിഡ് അളവ് കുറക്കാൻ സഹായം ആയേക്കാവുന്നവ :

- സിട്രസ് പഴങ്ങൾ - നാരങ്ങ ,ഓറഞ്ച് ,നെല്ലിക്ക

- കൊഴുപ്പു കുറഞ്ഞ പാലുൽപ്പന്നങ്ങൾ

- കോഫി

11. രോഗനിയന്ത്രണത്തിന് ജീവിതശൈലിയിൽ എന്തൊക്കെ മാറ്റങ്ങൾ ആവശ്യമായി വരും ??

ആരോഗ്യകരമായ ശരീരഭാരം നിലനിർത്താൻ ശ്രമിക്കുക . ബോഡി മാസ്സ് ഇൻഡക്സ് 30 നു മുകളിൽ ആകുന്നതു രോഗം വരാൻ ഉള്ള സാധ്യത ഇരട്ടിയിൽ അധികമായി ഉയർത്തുന്നു.

ആക്റ്റീവ് ജീവിതശൈലി പിന്തുടരാൻ ശ്രമിക്കുക. എയറോബിക് വ്യായാമങ്ങൾ ആഴ്ചയിൽ അഞ്ചുദിവസം എങ്കിലും കുറഞ്ഞത് മുപ്പതു മിനിറ്റുകൾ ചെയ്യാൻ ശ്രമിക്കണം.

മദ്യപാനം പുകവലി എന്നിവ നിർത്താതെ രോഗനിയന്ത്രണം വളരെ ബുദ്ധിമുട്ടാണ്.

രക്താതിസമ്മർദ്ദം, പ്രമേഹം, തൈറോയ്ഡ് രോഗം, മറ്റു അനുബന്ധ രോഗങ്ങൾ എന്നിവയുടെ ചികിത്സ കൃത്യമായി ചെയ്ത് നിയന്ത്രണത്തിൽ ആണെന്ന് ഉറപ്പാക്കുക

12.ഹൈപ്പർ യൂറിസിമിയ / ഗൗട്ട് രോഗാവസ്ഥകളിൽ ഒരു റൂമറ്റോളജിസ്റ്റിന് എന്തൊക്കെ സേവനങ്ങൾ നൽകാനാവും??

രോഗനിർണയത്തിന് , കാരണം കണ്ടെത്താൻ, രോഗത്തിൻറെ തീവ്രത മനസിലാക്കി അപകട സാധ്യതകൾ വിശകലനം ചെയ്ത് ചികിത്സ ആവശ്യമോ എന്ന് തീരുമാനിക്കാൻ , ഓരോ രോഗിയുടെയും പ്രത്യേകതകൾ അനുസരിച്ചു കൃത്യമായ ചികിത്സ നൽകാൻ, സങ്കീർണതകൾ തടയാൻ, ജീവിതനിലവാരം ഉറപ്പാക്കാൻ, ഭക്ഷണത്തിലെയും ജീവിതശൈലിയിലും വേണ്ട മാറ്റങ്ങൾ നിർണയിക്കാൻ - ഇത്രയും കാര്യങ്ങളിൽ ഒരു റുമറ്റോളജിസ്റ്റിന്റെ സേവനം ആവശ്യമായി വരാം.

Dr. Sreenath S
MBBS, MD
DM (Clinical Immunology & Rheumatology)
Consultant Rheumatologist
St. Gregorios medical mission hospital, Parumala