പെപ്പർ പനീർ
1.പനീർ – 200 ഗ്രാം
2.കട്ടത്തൈര് – രണ്ടു വലിയ സ്പൂൺ
ഫ്രെഷ് ക്രീം – ഒരു വലിയ സ്പൂൺ
കസൂരി മേത്തി – ഒരു ചെറിയ സ്പൂൺ
മല്ലിയില, അരിഞ്ഞത് – ഒരു വലിയ സ്പൂൺ
കുരുമുളകു ചതച്ചത് – ഒരു ചെറിയ സ്പൂൺ
ഏലയ്ക്കപ്പൊടി – കാൽ ചെറിയ സ്പൂൺ
കോൺഫ്ലോര് – ഒരു വലിയ സ്പൂൺ
ഉപ്പ് – പാകത്തിന്
3.എണ്ണ – ഒരു വലിയ സ്പൂൺ
4.സവാള – ഒന്ന്, പൊടിയായി അരിഞ്ഞത്
ഇഞ്ചി, പൊടിയായി അരിഞ്ഞത് – ഒരു വലിയ സ്പൂൺ
വെളുത്തുള്ളി, പൊടിയായി അരിഞ്ഞത് – ഒരു വലിയ സ്പൂൺ
പച്ചമുളക് – രണ്ട്, നീളത്തിൽ അരിഞ്ഞത്
കശുവണ്ടിപ്പരിപ്പ് – കാൽ കപ്പ്, കുതിർത്തത്
5.വെണ്ണ – രണ്ടു വലിയ സ്പൂൺ
6.പഞ്ചസാര – ഒരു ചെറിയ സ്പൂൺ
കുരുമുളകുപൊടി – ഒരു ചെറിയ സ്പൂൺ
ഉപ്പ് – പാകത്തിന്
പാൽ – ഒരു കപ്പ്
7.മല്ലിയില, അരിഞ്ഞത് – കാൽ കപ്പ്
പാകം ചെയ്യുന്ന വിധം
∙പനീർ ചതുരക്കഷണങ്ങളാക്കി മുറിച്ചു വയ്ക്കുക.
∙ഒരു ബൗളിൽ രണ്ടാമത്തെ ചേരുവ യോജിപ്പിച്ചു പനിർ ചേർത്തിളക്കി അര മണിക്കൂർ വയ്ക്കുക.
∙പാനിൽ എണ്ണ ചൂടാക്കി നാലാമത്തെ ചേരുവ വഴറ്റണം.
∙സവാള കണ്ണാടിപ്പരുവമാകുമ്പോൾ വാങ്ങി ചൂടാറുമ്പോൾ നന്നായി അരച്ചു വയ്ക്കുക.
∙പാനിൽ വെണ്ണ ചൂടാക്കി പനീർ കഷണങ്ങൾ ബ്രൗൺ നിറത്തിൽ വറുത്തു മാറ്റി വയ്ക്കുക.
∙ഇതേ പാനിൽ അരച്ചു വച്ച സവാള മിശ്രിതവും ബാക്കി വന്ന തൈരു മിശ്രിതവും ചേർത്തു വഴറ്റണം.
∙ഇതിലേക്ക് ആറാമത്തെ ചേരുവയും ചേർത്തിളക്കി തിളപ്പിക്കുക.
∙വറുത്തു വച്ചിരിക്കുന്ന പനീർ കഷണങ്ങളും ചേർത്തു കുറുകി വരുമ്പോൾ മല്ലിയില അരിഞ്ഞതും ചേർത്തിളക്കി വാങ്ങാം.