ഇഫ്താറിന് മാറ്റുകൂട്ടാൻ മണവും ഗുണവും ഒത്തിണങ്ങിയ മത്തിക്കുറുക്ക്

എരിവും പുളിയും പാകത്തിന് ചേർന്ന മത്തിക്കുറുക്ക് നോമ്പ് തുറന്നതിനു ശേഷം നാവിലെ രുചി മുകുളങ്ങളെ ഉണർത്താൻ സഹായിക്കുന്നു. ഒപ്പം ആരോഗ്യത്തിന് ഉത്തമമായ ഒമേഗ-3 ഫാറ്റി ആസിഡുകളും ഇതിൽ അടങ്ങിയിരിക്കുന്നു. പത്തിരി, പൊറോട്ട, അല്ലെങ്കിൽ നെയ്‌ചോറ് എന്നിവയോടൊപ്പം വിളമ്പാൻ ഏറ്റവും അനുയോജ്യമായ വിഭവമാണിത്.

ആവശ്യമായ ചേരുവകൾ 
1. മത്തി (ചാള) – അരക്കിലോ
2. വെളിച്ചെണ്ണ – രണ്ടു ചെറിയ സ്പൂൺ
3. ഉലുവ – ഒരു ചെറിയ സ്പൂൺ
ഇഞ്ചി ചതച്ചത് – ഒരു വലിയ സ്പൂൺ
വെളുത്തുള്ളി ചതച്ചത് – ഒരു വലിയ സ്പൂൺ
പച്ചമുളക് – രണ്ട്, കീറിയത്
കറിവേപ്പില – ഒരു വലിയ സ്പൂൺ
തക്കാളി – ഒന്ന്, അരിഞ്ഞത്
4. തേങ്ങ ചുരണ്ടിയത് – അരക്കപ്പ്
മുളകുപൊടി – ഒരു ചെറിയ സ്പൂൺ
മഞ്ഞൾപ്പൊടി – അര ചെറിയ സ്പൂൺ
ഉപ്പ് – പാകത്തിന്
5. അരിപ്പൊടി – മൂന്നു വലിയ സ്പൂൺ

പാകം ചെയ്യുന്ന വിധം
∙ മീൻ വെട്ടിക്കഴുകി വൃത്തിയാക്കി വയ്ക്കണം.
∙ പാനിൽ വെളിച്ചെണ്ണ ചൂടാക്കി മൂന്നാമത്തെ ചേരുവ ചേർത്തു നന്നായി വഴറ്റുക.
∙ ഇതിലേക്കു മയത്തിൽ അരച്ച നാലാമത്തെ ചേരുവ ചേർത്തിളക്കണം.
∙ നന്നായി തിളയ്ക്കുമ്പോൾ മീനും ചേർത്തിളക്കുക.
∙ ചാറു കുറുകി വരുമ്പോൾ അരിപ്പൊടി അൽപം വെള്ളത്തിൽ കലക്കിയതും ചേർത്തു നന്നായി ഇളക്കി യോജിപ്പിക്കുക.
∙ ചെറുതീയിൽ വച്ചു മത്തി മുഴുവൻ ഉടഞ്ഞു കുറുകി വരുമ്പോൾ വാങ്ങി ചൂടോടെ വിളമ്പാം.

(മത്തി വറുക്കുമ്പോൾ പാനിൽ വെളിച്ചെണ്ണ ഒഴിച്ച ശേഷം കറിവേപ്പില തണ്ടോടു കൂടി നിരത്തുക. ഇതിൽ മീനിട്ടു വറുത്താൽ അടിയില്‍ പിടിക്കില്ല, രുചിയും കൂടും)

തയാറാക്കിയത്: മെർലി എം. എൽദോ, ഫോട്ടോ: ശ്രീകാന്ത് കളരിക്കൽ. പാചകക്കുറിപ്പുകള്‍ക്കും ഫോട്ടോയ്ക്കു വേണ്ടി വിഭവങ്ങള്‍ തയാറാക്കിയതിനും കടപ്പാട്: ജെസീറ ജവാദ്, ജാസീസ് മാജിക് കിച്ചൺ റസ്റ്ററന്റ്, പുതിയകാവ്, കരുനാഗപ്പള്ളി