വിപണിയിൽ താരമാകുന്ന ബിയേർഡ് ഓയിൽ നിങ്ങൾ ശരിയായിട്ടാണോ ഉപയോഗിക്കുന്നത്? താടി വളരാനുള്ള വഴികളറിയാം... Choosing the Right Beard Oil

നല്ല കിടിലൻ താടി...കണ്ടാലൊന്ന് നോക്കാത്തവരുണ്ടോ? ഇല്ലേയില്ല.... എന്നാലാ താടിക്ക് വേണ്ട വെള്ളവും വളവുമൊക്കെ ആവശ്യത്തിന് കൊടുത്തില്ലെങ്കിൽ പലപ്പോഴും താടിയിലും മുടികൊഴിച്ചിലും താരനുമൊക്കെ വന്ന് ആകെ പ്രശ്നത്തിലാകും. ഇന്നിപ്പോ താടിയുടെ ആരോഗ്യത്തിനും സ്റ്റൈലിങ്ങിനുമൊക്കെയായി പലതരം ബിയേർഡ് ഓയിലുകൾ വിപണിയിലുണ്ട്. പലരും ഇത് വാങ്ങി ഉപയോഗക്കാറുമുണ്ട്. പക്ഷേ, ഉപയോഗിക്കുന്നത് ശരിയായിട്ടു തന്നെയാണോ? നമുക്ക് അവയെ കുറിച്ച് അൽപ്പം കാര്യമായിതന്നെ അറിഞ്ഞു വയ്ക്കാം.

താടി മിനുക്കാൻ പഠിക്കാം

∙ ആദ്യപടിയായി ഒരു ക്ലെൻസറോ മറ്റോ കൊണ്ട് മുഖം നന്നായി കഴുകാം. എന്നിട്ട് വൃത്തിയുള്ള ടവൽ കൊണ്ട് ഒപ്പി വെള്ളം കളയുക. അൽപം ഈർപം നിലനിർത്താം.  

∙ ആവശ്യത്തിന്(താടിയുടെ തരം അനുസരിച്ച് 3–5തുള്ളി) ബിയേർഡ് ഓയിൽ കയ്യിലെടുക്കാം. എന്നിട്ട് ചർമത്തിൽ തൊടുന്ന രീതിയിൽ തന്നെ നന്നായി തേച്ചു കൊടുക്കാം. താടി രോമങ്ങളിൽ മാത്രം തേച്ചാൽ വേണ്ടത്ര ഫലം കിട്ടില്ല. ചർമത്തിൽ പുരട്ടി മസാജ് െചയ്യുമ്പോൾ രക്തചംക്രമണം കൂടുകയും അതു വഴി താടിരോമം നന്നായി വളരുകയും ചെയ്യും.

∙ ഇനി വീതിയുള്ളൊരു ചീപ്പു കൊണ്ട് നന്നായി ചീകി കൊടുക്കാം.

∙ വരണ്ട ചർമക്കാർ ഓയിൽ തിരഞ്ഞെടുക്കുമ്പോൾ ആർഗൺ അല്ലെങ്കിൽ സ്വീറ്റ് ആമണ്ട് പോലുള്ള എണ്ണകൾ ഉള്ളത് തിരഞ്ഞെടുക്കുന്നതാണ് നല്ലത്.

∙ എണ്ണമയമുള്ള ചർമക്കാർ ജോജോബ, ഗ്രേയ്പ് സീഡ് പോലുള്ള ഓയിലുകൾ അടങ്ങിയവ ഉപയോഗിക്കാം.

∙ ബിയേഡ് ഓയിൽ ദിവസവും ഉപയോഗിക്കാൻ പ്രത്യേകം ശ്രദ്ധിക്കുക.

∙ താടിയുടെ വളർച്ചയ്ക്ക് സഹായിക്കുന്ന എന്നാൽ പലരും മറന്നു പോകുന്ന ഒന്നാണ് ചർമത്തിലെ മൃതകോശങ്ങൾ കളയാത്തത്. ആഴ്ച്ചയിൽ ഒരിക്കലെങ്കിലും അധികം വീര്യമില്ലാത്ത സ്ക്രബ് ഉപയോഗിച്ച് ചർമം എക്സ്ഫോളിയേറ്റ് ചെയ്യുക.

∙ സ്ക്രബ് ചെയ്ത് കഴിഞ്ഞാൽ മോയ്സ്ചുറൈസർ ഉപയോഗിക്കാനും മറക്കരുത്. ഇതുവഴി മൃദുലവും തിളക്കമാർന്നതുമായ താടി സ്വന്തമാക്കാം.

∙ 20–30നും ഇടയ്ക്കാണ് സാധാരണ കട്ടിയുള്ള താടി വളരുന്നത്. ആ സമയത്ത് മുതൽ കെയർ ചെയ്തു തുടങ്ങുന്നത് ഗുണം ചെയ്യും.

∙ താടി വളർത്താനാഗ്രഹിക്കുന്നവർ ഇടയ്ക്കിടെ ട്രിം ചെയ്യുന്നതിനു പകരം 4–6 ആഴ്ച്ചയിൽ ഒരിക്കൽ മാത്രം ചെയ്യുക. അതേപോലെ ഇട്ക്കിടയ്ക്ക് താടി മസാജ് ചെയ്യുന്നതും നെല്ലിക്ക കഴിക്കുന്നതും അതിന്റെ അംശമുള്ള എണ്ണകൾ ഉപയോഗിക്കുന്നതും ഗുണം ചെയ്യും.

മുടിയുടെ വളർച്ചയൊക്കെ നമ്മുടെ പാരമ്പര്യവുമായി ബന്ധപ്പെട്ട് കിടക്കുന്ന കാര്യമാണ്. അതുകൂടെ മനസിൽ വച്ചു വേണം ഇതിനൊക്കെ ഇറങ്ങാൻ. അല്ലാതെ എന്തൊക്കെ ചെയ്തിട്ടും വിചാരിച്ചത്ര റിസൾട്ട് കിട്ടുന്നില്ലല്ലോ എന്നു പറഞ്ഞ് സ്വയം പഴിക്കാതെ നോക്കാം.

കടപ്പാട്: വിജിൽ കണ്ണൂർ, വിജിൽസ് ബ്യൂട്ടി അക്കാഡമി, കണ്ണൂർ.