‘ഒരു കണ്ണിൽ ഇരട്ട കാഴ്ച, നിറങ്ങൾ മങ്ങും അല്ലെങ്കിൽ മഞ്ഞ കലർന്ന നിറമുണ്ടാകാം’: തിമിരത്തിന്റെ ലക്ഷണങ്ങൾ അറിയാം Understanding Cataracts

സ്ക്രീൻ ഉപയോഗവും സൂര്യപ്രകാശം ഏൽക്കുന്നതും അമിതമാകുന്നതു തിമിര സാധ്യത കൂട്ടുന്നു. തിമിരം പൂർണമായും ഭേദമാക്കാനാകും...

മധ്യവയസ്സു പിന്നിടുന്നതോടെ കൂടെക്കൂടുന്ന ആരോഗ്യാശങ്കകളിലൊന്നാണു തിമിരം. തിമിരം എങ്ങനെയാണു വരുന്നത്, വന്നാൽ എന്തു ചെയ്യണം, ഇതു വരുന്നത് ഒഴിവാക്കാൻ സാധിക്കുമോ... ഇങ്ങനെ പല സംശയങ്ങൾ നമുക്കുണ്ടാകും. തിമിരം ചികിത്സിച്ചില്ലെങ്കിൽ, അതു കാലക്രമേണ അന്ധത ഉൾപ്പെടെയുള്ള ഗുരുതരമായ കാഴ്ച പ്രശ്നങ്ങൾക്കു കാരണമാകും.  ഈ നേത്രരോഗത്തിന്റെ ചികിത്സ, ശസ്ത്രക്രിയ എന്നിവ സംബന്ധിച്ച കാര്യങ്ങൾ വിശദമായി അറിയാം.

തിമിരം എന്നാൽ എന്ത്? ഈ രോഗാവസ്ഥയിൽ കണ്ണിന് എന്താണു സംഭവിക്കുന്നത്?  

കണ്ണിനുള്ളിലെ സ്വാഭാവിക ലെൻസിലൂടെ പ്രകാശം റെറ്റിനയിൽ കേന്ദ്രീകരിക്കുമ്പോഴാണു തെളിച്ചമുള്ള കാഴ്ച സാധ്യമാക്കുന്നത്. തിമിരം ഈ ലെൻസിന്റെ സുതാര്യത കുറയ്ക്കുന്ന അവസ്ഥയാണ്. തിമിരം ബാധിച്ച ലെൻസിന്റെ ഉള്ളിലെ പ്രോട്ടീനിൽ വരുന്ന വ്യത്യാസം കാരണം ലെൻസ് മങ്ങും. റെറ്റിനയിൽ ശരിയായി ഫോക്കസ് ചെയ്യുന്നതിനു പകരം പ്രകാശം ചിതറിക്കിടക്കും. കാഴ്ച മങ്ങിയതോ, മഞ്ഞനിറമോ ആയി മാറും.

തിമിരത്തിന്റെ പ്രാരംഭലക്ഷണങ്ങൾ?

തിമിരം രൂപപ്പെടുന്ന ആദ്യ ഘട്ടത്തിൽ ലക്ഷണങ്ങൾ ശ്രദ്ധിക്കപ്പെടാതെ പോകാം. ആദ്യ ലക്ഷണങ്ങളിൽ ചിലത്:

∙ മൂടൽമഞ്ഞുള്ള ജനാലയിലൂടെ നോക്കുന്നതുപോലെ കാഴ്ച മങ്ങിയതായി കാണപ്പെടാൻ തുടങ്ങുന്നു.

∙ വളരെ തിളക്കമുള്ള ലൈറ്റുകൾ അല്ലെങ്കിൽ സൂര്യപ്രകാശം വളരെ തീവ്രമായി തോന്നുക. വസ്തുക്കൾക്കു ചുറ്റും ഹാലോകൾ ശ്രദ്ധിച്ചേക്കാം.

∙ രാത്രിയിൽ കാണാൻ ബുദ്ധിമുട്ട് - കുറഞ്ഞ വെളിച്ചത്തിൽ കാഴ്ച കുറയും, രാത്രിയിൽ വാഹനമോടിക്കുന്നതു വെല്ലുവിളി നിറഞ്ഞതാക്കും.

∙ നിറങ്ങൾ മങ്ങിയതായി കാണപ്പെടാം അല്ലെങ്കിൽ മഞ്ഞകലർന്ന നിറമുണ്ടാകാം.

∙ കണ്ണട ലെൻസിന്റെ പവറിൽ ഇടയ്ക്കിടെ മാറ്റങ്ങൾ

∙ ഒരു കണ്ണിൽ ഇരട്ട കാഴ്ച - ഒരു കണ്ണിൽ ഒന്നിലധികം ചിത്രങ്ങൾ കാണും, പ്രത്യേകിച്ചു തിമിരത്തിന്റെ പ്രാരംഭ ഘട്ടങ്ങളിൽ.

∙ വായിക്കുമ്പോൾ കൂടുതൽ തിളക്കമുള്ള വെളിച്ചം ആവശ്യമായി വരും.   

പുകവലി, മദ്യം പോലുള്ള ജീവിതശൈലി രീതികൾ തിമിര സാധ്യത കൂട്ടുമോ?   

പുകവലി വിഷവസ്തുക്കളേയും ഫ്രീ റാഡിക്കലുകളേയും പുറത്തുവിടുന്നു. ഇതു കണ്ണിന്റെ ലെൻസിനെ നശിപ്പിക്കുകയും തിമിരം രൂപപ്പെടാൻ കാരണമാകുകയും ചെയ്യും. പുകവലി കണ്ണിലെ ആന്റിഓക്‌സിഡന്റുകൾ കുറയ്ക്കും. ലെ ൻസ് വ്യക്തത നിലനിർത്താൻ സഹായിക്കുന്ന ആന്റിഓക്‌സിഡന്റുകളാണ്. പുകവലി ന്യൂക്ലിയർ തിമിരത്തിനുള്ള സാധ്യതയുമായി ബന്ധപ്പെട്ടിരിക്കുന്നു. അമിതമായി പുകവലിക്കുന്നവർക്കു (ഒരു ദിവസം 15 സിഗരറ്റിൽ കൂടുതൽ) പുകവലിക്കാത്തവരെ അപേക്ഷിച്ചു തിമിരം വരാനുള്ള സാധ്യത മൂന്നിരട്ടി വരെ കൂടുതലാണ്.

അമിതമായി മദ്യപിക്കുന്നതു തിമിരം രൂപപ്പെടുന്നതിനു കാരണമാകും. വിട്ടുമാറാത്ത മദ്യപാനം ശരീരത്തിലെ ആ ന്റിഓക്‌സിഡന്റുകൾ കുറയ്ക്കും. ഇതു ലെൻസിനു കൂടുതൽ പ്രശ്നമുണ്ടാക്കും.   പ്രത്യേകിച്ചു പിൻഭാഗത്തെ സബ്‌ക്യാപ്‌സുലാർ തിമിരം (ഇതു തിള‌ക്കത്തിനും വായനാ ബുദ്ധിമുട്ടുകൾക്കും കാരണമാകുന്നു).    

അമിത മൊബൈൽ ഫോൺ ഉപയോഗം തിമിരത്തിനു കാരണമാകുമോ ?  

അമിതമായ മൊബൈൽ ഫോൺ ഉപയോഗം നേരിട്ടു തിമിരത്തിനു കാരണമാകില്ല. പക്ഷേ, അതു കണ്ണിന്റെ ആയാസത്തിനും മറ്റു കാഴ്ച സംബന്ധമായ പ്രശ്നങ്ങൾക്കും കാരണമാകും.

ദീർഘനേരം സ്‌ക്രീൻ നോക്കുന്നതു കണ്ണിന്റെ ആരോഗ്യത്തെ ബാധിക്കുന്ന ചില പരോക്ഷ അപകടങ്ങൾക്ക് കാരണമാവും. മൊബൈൽ സ്‌ക്രീനുകൾ നീല വെളിച്ചം പുറപ്പെടുവിക്കുന്നു. ഇതു കാലക്രമേണ കണ്ണുകളിൽ ഓക്‌സിഡേറ്റീവ് സ്ട്രെസ്സ് ഉണ്ടാക്കും. നീലവെളിച്ചം തിമിരത്തിനു കാരണമാകുമെന്നു തെളിയിക്കപ്പെട്ടിട്ടില്ലെങ്കിലും, ദീർഘനേരം സമ്പർക്കം ഉണ്ടാകുന്നതു കണ്ണിന്റെ വാർധക്യത്തിനും മാക്യുലർ ഡീജനറേഷൻ പോലുള്ള മറ്റു നേത്ര അവസ്ഥകൾക്കും കാരണമായേക്കാം.

ദീർഘനേരം സ്‌ക്രീൻ ഉപയോഗിക്കുന്നതു കണ്ണുകൾ വരണ്ടതാക്കുക, കാഴ്ച മങ്ങുക, കംപ്യൂട്ടർ വിഷൻ സിൻഡ്രം എന്നറിയപ്പെടുന്ന അസ്വസ്ഥത എന്നിവയിലേക്കു ന യിക്കുന്നു. ഇതു തിമിരത്തിനു കാരണമാകില്ലെങ്കിലും, നിലവിലുള്ള കാഴ്ച പ്രശ്‌നങ്ങൾ കൂടുതൽ വഷളാക്കും.

രാത്രിയിൽ അമിതമായി ഫോൺ ഉപയോഗിക്കുമ്പോൾ നീല വെളിച്ചവുമായി സമ്പർക്കം ഉണ്ടാകുന്നത് ഉറക്കത്തെ തടസ്സപ്പെടുത്തും.   ഉറക്കപ്രശ്നങ്ങൾ ഓക്‌സിഡേറ്റീവ് സ്ട്രെസ്സുമായി ബന്ധപ്പെട്ടിരിക്കുന്നു. ഇതു തിമിരത്തിനുള്ള അപകട ഘടകമാണ്. വെയിലത്തു നിന്നുകൊണ്ട് അമിതമായി ഫോൺ ഉപയോഗിക്കുന്നത് (പ്രത്യേകിച്ച് യുവി-സംരക്ഷക സൺഗ്ലാസുകൾ ഇല്ലാതെ) അൾട്രാവയലറ്റ് രശ്മികളുമായി ബന്ധപ്പെട്ട കണ്ണിന്റെ കേടുപാടുകൾ വർധിപ്പിക്കും. ഇതു തിമിരത്തിന്റെ അപകട ഘടകമാണ്.

ഏതു പ്രായത്തിലാണു തിമിരം ഉണ്ടാകുന്നത്? പുരുഷന്മാരിലോ സ്ത്രീകളിലോ കൂടുതൽ?  

40 വയസ്സിനു ശേഷമാണു തിമിരം സാധാരണയായി ഉണ്ടാകുന്നത്. പക്ഷേ 60 വയസ്സോ അതിൽ കൂടുതലോ ആകും വരെ കാര്യമായ കാഴ്ച പ്രശ്നങ്ങൾ ഉണ്ടാക്കുന്നില്ല. പ്രായത്തിനനുസരിച്ച് അപകടസാധ്യത വർധിക്കും. ജനിതക മാറ്റങ്ങൾ, രോഗാവസ്ഥകൾ (പ്രമേഹം പോലുള്ളവ), ആഘാതം അല്ലെങ്കിൽ ജീവിതശൈലി ഘടകങ്ങൾ എന്നിവ കാരണം ചില തരം തിമിരങ്ങൾ നേരത്തേ ഉണ്ടാകാം.

തിമിരം പുരുഷന്മാരെയും സ്ത്രീകളെയും ബാധിക്കും. പക്ഷേ. പഠനങ്ങൾ പ്രകാരം സ്ത്രീകളിലാണു കൂടുതലായി കാണുന്നത്. ആയുർദൈർഘ്യം, ഹോർമോൺ മാറ്റങ്ങ ൾ, ഓട്ടോഇമ്യൂൺ രോഗങ്ങളുടെ ഉയർന്ന നിരക്ക് എന്നിവയാണു ഇതിനു കാരണങ്ങളായി പറയുന്നത്. എന്നാൽ പുകവലി, അമിതമായ മദ്യപാനം, അൾട്രാ വയലറ്റ് (യുവി) കിരണവുമായുള്ള സമ്പർക്കം തുടങ്ങിയ ജീവിതശൈലി ഘടകങ്ങൾ പുരുഷന്മാർക്കും സ്ത്രീകൾക്കും ഒരുപോലെ അപകട ഘടകങ്ങളാണ്.

തിളക്കമുള്ള പ്രകാശം തിമിരത്തിനു കാരണമാകുമോ?

തിളക്കമുള്ള പ്രകാശവുമായി, പ്രത്യേകിച്ചു യുവി രശ്മികളഉമായി അമിത സമ്പർക്കമുണ്ടാകുന്നതു കാലക്രമേണ തിമിരം ഉണ്ടാകാനുള്ള സാധ്യത വർധിപ്പിക്കും. എന്നാൽ, സാധാരണ ഇൻഡോർ ലൈറ്റിങ്ങും സ്‌ക്രീൻ തെളിച്ചവും നേരിട്ടു തിമിരത്തിനു കാരണമാകില്ല.

നവജാതശിശുവിനു തിമിരം വരുമോ? ഗർഭകാല പ്രശ്‌നങ്ങ ൾ തിമിരത്തിനു  കാരണമാകുമോ ?

നവജാതശിശുവിനു ജന്മനാ തിമിരം ഉണ്ടാകാം. അതായത് അവർ അതാര്യമായ ലെൻസുകളുമായി ജനിക്കുന്നു. ഇവ ഒരു കണ്ണിനെയോ രണ്ടു കണ്ണുകളെയോ ബാധിച്ചേക്കാം. തീവ്രതയിലും വ്യത്യാസമുണ്ടാകാം.

ചികിത്സിച്ചില്ലെങ്കിൽ, സ്ഥിരമായ കാഴ്ച വൈകല്യത്തിനോ അന്ധതയ്‌ക്കോ കാരണമാകും. ഗർഭകാലത്തെ അണുബാധകൾ, വൈറസ് ബാധകൾ, ഡൗൺ സിൻഡ്രം പോലുള്ള ജനിതക, ക്രോമസോം തകരാറുകൾ,  അമ്മയിലെ ഗുരുതരമായ വൈറ്റമിൻ എ കുറവ്, ഗർഭകാലത്തു മയക്കുമരുന്നിന്റെയും മദ്യത്തിന്റെയും ഉപയോഗം, ചില മരുന്നുകൾ (ഉദാ. സ്റ്റിറോയിഡുകൾ, ചില ആന്റിബയോട്ടിക്കുകൾ) എന്നിവ
കുഞ്ഞിന്റെ കണ്ണിനെ ദോഷകരമായി ബാധിച്ചേക്കാം.     

തിമിരം പ്രതിരോധിക്കാൻ കഴിയുമോ?  കുട്ടിക്കാലത്തേ സ്വീകരിക്കേണ്ട നടപടികൾ?

തിമിരം പൂർണമായും തടയാൻ കഴിയില്ലെങ്കിലും, കുട്ടിക്കാലം മുതൽ തന്നെ ശരിയായ ജീവിതശൈലി ശീലങ്ങളും മുൻകരുതലുകളും ഉപയോഗിച്ച് അവയുടെ രൂപീകരണം വൈകിപ്പിക്കുകയോ മന്ദഗതിയിലാക്കുകയോ ചെയ്യാം.

തിമിരത്തിന്റെ ചികിത്സകൾ എന്തെല്ലാമാണ് ?

തിമിരത്തിനുള്ള ഏക ഫലപ്രദമായ ചികിത്സ ശസ്ത്രക്രിയയാണ്. പ്രാരംഭ ഘട്ടത്തിൽ, ശക്തമായ ഗ്ലാസുകൾ, മികച്ച ലൈറ്റിങ്, അല്ലെങ്കിൽ ആന്റി-ഗ്ലെയർ ലെൻസുകൾ എന്നിവ സഹായിച്ചേക്കാം. എന്നാൽ, തിമിരം കാഴ്ചയെ സാരമായി ബാധിക്കാൻ തുടങ്ങിയാൽ, ശസ്ത്രക്രിയ ആവശ്യമാണ്. തിമിര  ശസ്ത്രക്രിയയിൽ മങ്ങലേറ്റ   ലെൻസ് നീക്കം ചെയ്ത് കൃത്രിമ    ഇൻട്രാഒാക്യുലർ ലെൻസ് (IOL)  സ്ഥാപിക്കുന്നു.
മൂന്നു പ്രധാന തിമിരശസ്ത്രക്രിയകൾ ഇവയാണ്:

∙ ഫാക്കോ എമൽസിഫിക്കേഷൻ (ഫാക്കോ സർജറി)
∙ മാനുവൽ സ്മോൾ ഇൻസിഷൻ ശസ്ത്രക്രിയ (SICS)
∙ ലേസർ സഹായത്തോടെയുള്ള ശസ്ത്രക്രിയ (ഫെംറ്റോസെക്കൻഡ് ലേസർ സർജറി).

1. ഫാക്കോഎമൽസിഫിക്കേഷൻ (ഫാക്കോ സർജറി):

കോർണിയയിൽ 2-3 മില്ലീമീറ്റർ വ്യാസമുള്ള ഒരു ചെറിയ മുറിവുണ്ടാക്കും. ശബ്ദതരംഗങ്ങൾ ഉപയോഗിച്ചു തിമിരത്തെ ചെറിയ കഷണങ്ങളാക്കി അൾട്രാസൗണ്ട് പ്രോബ് മുറിക്കും. ശകലങ്ങൾ വലിച്ചെടുക്കുകയും മടക്കാവുന്ന ഒരു ഇൻട്രാഒക്യുലർ ലെൻസ് (IOL) തിരുകുകയും ചെയ്യും. തുന്നലുകൾ ഇല്ലാതെ തന്നെ മുറിവു സുഖപ്പെടുത്തും.

2. മാനുവൽ ചെറിയ മുറിവ് തിമിര ശസ്ത്രക്രിയ (SICS):

കോർണിയയിലോ സ്ക്ലീറയിലോ 6-7 മില്ലീമീറ്റർ മുറിവുണ്ടാക്കും. തിമിരം ഒറ്റ കഷണമായി കൈകൊണ്ടു നീക്കം ചെയ്യും. മടക്കാനാവാത്ത ഇൻട്രാഒക്യുലർ ലെൻസ് (IOL) തിരുകും.

3. ലേസർ സഹായത്തോടെയുള്ള തിമിര ശസ്ത്രക്രിയ:  

ബ്ലേഡിനു പകരം ലേസർ കൊണ്ടു മുറിവുണ്ടാക്കും. ലേസർ തിമിരത്തെ മൃദുവാക്കും. ഇതു നീക്കം ചെയ്യുന്നത് എളുപ്പമാക്കും.  മികച്ച കാഴ്ച ഫലങ്ങൾക്കായി IOL കൂടുതൽ കൃത്യമായി സ്ഥാപിക്കും.

തിമിര ശസ്ത്രക്രിയ കഴിഞ്ഞു കുറച്ചു മണിക്കൂറുകൾക്കുള്ളിൽ വീട്ടിലേക്കു പോകാം. മിക്ക തിമിര ശസ്ത്രക്രിയകൾക്കും ഒരു കണ്ണിന് 10-20 മിനിറ്റ് എടുക്കും. തയാറെടുപ്പിനും ശസ്ത്രക്രിയയ്ക്കു ശേഷമുള്ള നിരീക്ഷണത്തിനുമായി മൂന്ന്– നാല് മണിക്കൂർ ആശുപത്രിയിൽ തുടരാം.

ശസ്ത്രക്രിയയ്ക്കു ശേഷം  ആദ്യ 24 മണിക്കൂർ  മങ്ങിയ കാഴ്ച (കുറച്ച് ദിവസങ്ങൾക്കുള്ളിൽ വ്യക്തമാകും)  അനുഭവപ്പെടാം. ആദ്യ ആഴ്ചയിൽ കണ്ണു തിരുമ്മൽ, ഭാരം ഉയർത്തൽ, പൊടി നിറഞ്ഞ അന്തരീക്ഷം എന്നിവ ഒഴിവാക്കുക. ഒരു മാസമാകുമ്പോഴേക്കും കാഴ്ച കൂടുതൽ വ്യക്തമാകും. ആറ് ആഴ്ചയോടെ പൂർണമായ രോഗശാന്തിയും കാഴ്ച സ്ഥിരതയും ലഭിക്കും.

ശസ്ത്രക്രിയ അല്ലാതെ മറ്റു ചികിത്സകൾ ഉണ്ടോ ?

നിലവിൽ, തിമിരം  മാറ്റുന്നതിനോ നിർത്തുന്നതിനോ ശസ്‌ ത്രക്രിയ ഒഴികെ തെളിയിക്കപ്പെട്ട ഒരു വൈദ്യചികിത്സയും ഇല്ല. എങ്കിലും, പ്രാരംഭ ഘട്ടങ്ങളിൽ, ചില നടപടികൾ സ്വീകരിക്കുന്നതു ലക്ഷണങ്ങൾ നിയന്ത്രിക്കാനും ശസ്ത്രക്രിയ ആവശ്യമായി വരുന്നതിനു മുൻപു പുരോഗതി വൈകിപ്പിക്കാനും സഹായിക്കും.  

1. ശക്തമായ കണ്ണടകൾ അല്ലെങ്കിൽ മാഗ്‌നിഫയിങ് ലെൻസുകൾ താൽക്കാലികമായി കാഴ്ച മെച്ചപ്പെടുത്തും.

2. തെളിച്ചമുള്ള ഇൻഡോർ ലൈറ്റിങ് വായനയിലും ക്ലോസ്-അപ് ജോലികളിലുമുള്ള ബുദ്ധിമുട്ടുകൾ കുറയ്ക്കും.

3. ആന്റിഓക്‌സിഡന്റ് അടങ്ങിയ ഭക്ഷണങ്ങൾ, പ്രമേഹം നിയന്ത്രിക്കുക, പുകവലി ഒഴിവാക്കുക പോലുള്ള ജീവിതശൈലി മാറ്റങ്ങൾ തിമിരത്തെ മന്ദഗതിയിലാക്കിയേക്കാം.

ശസ്ത്രക്രിയ തിമിരത്തിന്റെ പ്രാരംഭദശയിൽ ചെയ്യാമോ?

കാഴ്ചശക്തി നഷ്ടപ്പെടുന്നതു വായന, വാഹനമോടിക്ക ൽ, മുഖം തിരിച്ചറിയൽ തുടങ്ങിയ ദൈനംദിന പ്രവർത്തനങ്ങളെ തടസ്സപ്പെടുത്താൻ തുടങ്ങുമ്പോഴാണു സാധാരണയായി ശസ്ത്രക്രിയ ശുപാർശ ചെയ്യുന്നത്. പ്രാരംഭ ഘട്ടത്തിൽ ശസ്ത്രക്രിയ നടത്തണമോ എന്നതു ചില ഘടകങ്ങളെ ആശ്രയിച്ചിരിക്കും:

1. വേഗത്തിൽ പുരോഗമിക്കുന്ന തിമിരം: ചില തിമിരങ്ങൾ വേഗത്തിൽ പുരോഗമിക്കുന്നു, പ്രത്യേകിച്ച് പ്രമേഹം അല്ലെങ്കിൽ ആഘാതം കാരണം. നേരത്തെ നീക്കം ചെയ്യുന്നതു സങ്കീർണതകൾ തടയും.

2. പിൻഭാഗത്തെ സബ്‌ക്യാപ്‌സുലാർ തിമിരം: ഈ തിമിരങ്ങൾ ലെൻസിന്റെ പിൻഭാഗത്തെ ബാധിക്കുകയും പ്രാരംഭ ഘട്ടങ്ങളിൽ പോലും തിളക്കവും മങ്ങിയ കാഴ്ചയും ഉണ്ടാക്കുകയും ചെയ്യുന്നു.

3. പ്രഫഷനൽ അല്ലെങ്കിൽ ജീവിതശൈലി ആവശ്യങ്ങൾ: ഒരു വ്യക്തിയുടെ ജോലിക്കു മൂർച്ചയുള്ള കാഴ്ച ആവശ്യമാണെങ്കിൽ (ഉദാ. പൈലറ്റുമാർ, സർജന്മാർ, ഡ്രൈവർമാർ), നേരിയ തിമിരം പോലും തടസ്സപ്പെടുത്താം. ഉയർന്ന കാഴ്ച പ്രകടനം നിലനിർത്താൻ ശസ്ത്രക്രിയ നേരത്തേ ശുപാർശ ചെയ്തേക്കാം.

 4. ബൈനോക്കുലർ കാഴ്ച പ്രശ്നങ്ങൾ: രണ്ടു കണ്ണുകളിലും വ്യത്യസ്ത നിരക്കുകളിൽ തിമിരം രൂപപ്പെടുകയാണെങ്കിൽ, കാഴ്ചയിലെ വ്യത്യാസം തലകറക്കത്തിനും മറ്റു പ്രശ്നങ്ങൾക്കും കാരണമാകും. കാഴ്ച സന്തുലിതമാക്കാൻ ഒരു കണ്ണിൽ നേരത്തേ ശസ്ത്രക്രിയ നടത്താം.

ഇരുകണ്ണുകളിലും ഒരേസമയം തിമിര ശസ്ത്രക്രിയ നടത്താൻ കഴിയുമോ?

രണ്ടു കണ്ണുകളിലും ഒരേ ദിവസം തിമിര ശസ്ത്രക്രിയ നടത്താൻ കഴിയും. പക്ഷേ, ഇതു സാധാരണയായി ചെയ്യാറില്ല.  ഇരുകണ്ണുകളിലും െചയ്തശേഷം അണുബാധ വരുകയാണെങ്കിൽ അന്ധത വരാൻ സാധ്യത ഉണ്ട്.  

ആദ്യ കണ്ണ് ശസ്ത്രക്രിയയ്ക്കു ശേഷം, കണ്ണിന്റെ രോഗശാന്തിയും ഫലവും അടിസ്ഥാനമാക്കി ഡോക്ടർക്കു രണ്ടാമത്തെ കണ്ണിനുള്ള ലെൻസ് പവർ തീർച്ചപ്പെടുത്താൻ കഴിയും. 

ശസ്ത്രക്രിയയ്ക്കു ശേഷം

∙ കുറഞ്ഞത് ഒരു ആഴ്ചയെങ്കിലും സംരക്ഷണ  കവചം (പ്രത്യേകിച്ച് ഉറങ്ങുമ്പോൾ) ധരിക്കുക. കണ്ണിൽ തിരുമ്മുകയോ തൊടുകയോ ചെയ്യരുത്.  

∙  കുനിയുമ്പോൾ ശ്രദ്ധിക്കുക– തല താഴേക്കു ചരിക്കുന്നതിനുപകരം കാൽമുട്ടുകളിൽ വളയ്ക്കുക. ആകസ്മികമായി പരുക്കേൽക്കാതിരിക്കാൻ കുട്ടികളെയും വളർത്തുമൃഗങ്ങളെയും അകറ്റി നിർത്തുക.  

∙ നിർദേശിച്ച ആൻറിബയോട്ടിക്, ആന്റി-ഇൻഫ്ലമേറ്ററി തുള്ളിമരുന്നുകൾ കൃത്യസമയത്ത് ഉപയോഗിക്കുക.  അവ പുരട്ടുന്നതിന് മുൻപു കൈകൾ കഴുകുക. കണ്ണിലോ ചർമത്തിലോ സ്പർശിച്ചുകൊണ്ടു ഡ്രോപ്പറിന്റെ അഗ്രം മലിനമാക്കുന്നത് ഒഴിവാക്കുക.  

∙ കുറഞ്ഞതു രണ്ട് ആഴ്ചത്തേക്ക് (അഞ്ചു കിലോ ഗ്രാമിൽ കൂടുതൽ) ഭാരം എടുക്കരുത്. തീവ്രമായ ശാരീരിക പ്രവർത്തനങ്ങൾ ഒഴിവാക്കുക.  

∙  മൂന്ന്– നാല് ആഴ്ചത്തേക്കു നീന്തൽ അല്ലെങ്കിൽ ഹോട്ട് ടബ്ബുകൾ ഉപയോഗിക്കരുത് (അണുബാധയ്ക്കുള്ള സാധ്യത). പൊടി, വെള്ളം, തിളക്കമുള്ള വെളിച്ചം എന്നിവയിൽ നിന്നു കണ്ണുകളെ സംരക്ഷിക്കുക.   

∙ കുളിക്കുമ്പോൾ കണ്ണുകളിൽ വെള്ളം കയറുന്നത് ഒ ഴിവാക്കുക. മുഖം നനഞ്ഞ തുണി കൊണ്ടു തുടച്ചെടുത്താം. പൊടി നിറഞ്ഞതോ പുക നിറഞ്ഞതോ ആയ പ്രദേശങ്ങൾ ഒഴിവാക്കുക.

∙  കുറഞ്ഞതു രണ്ട് ആഴ്ചത്തേക്കു കണ്ണിൽ മേക്കപ് ചെയ്യരുത്.

തിമിരം: മുൻകരുതലുകൾ

∙ പുറത്തു പോകുമ്പോൾ 100% യുവി സംരക്ഷണമുള്ള സൺഗ്ലാസുകൾ ധരിക്കുക.  

∙ നേരിട്ടുള്ള സൂര്യപ്രകാശം ഏൽക്കുന്നതു കുറയ്ക്കാൻ തൊപ്പി ഉപയോഗിക്കുക.

∙ സംരക്ഷണമില്ലാതെ ശക്തമായ സൂര്യപ്രകാശം ദീർഘനേരം ഏൽക്കുന്നത് ഒഴിവാക്കുക.

∙  ആന്റി ഓക്‌സിഡന്റുകൾ (വൈറ്റമിൻ സി, ഇ, എ) അടങ്ങിയ ഭക്ഷണം കഴിക്കുക.

∙ പുകവലിയും പുകയേൽക്കുന്നതും (പാസ്സീവ് സ്മോക്കിങ്) ഒഴിവാക്കുക 

∙ കണ്ണുകളിൽ ഈർപ്പം നിലനിർത്തണം. അതിനായി ധാരാളം വെള്ളം കുടിക്കുക.  

∙ എസിയിലോ വരണ്ട അന്തരീക്ഷത്തിലോ അമിതമായി സമ്പർക്കം പുലർത്തുന്നത് ഒഴിവാക്കുക.

∙ എന്തെങ്കിലും പ്രാരംഭ പ്രശ്‌നങ്ങൾ കണ്ടെത്തുന്നതിനു പതിവു നേത്ര പരിശോധനകൾ നടത്തുക (കുട്ടികൾക്കു പോലും). തിമിരത്തിന്റെ കുടുംബ ചരിത്രമുണ്ടെങ്കിൽ, നേത്ര പരിശോധനകൾ കൂടുതൽ പ്രധാനമാണ്.

 ∙ പ്രമേഹം, ഉയർന്ന രക്തസമ്മർദം അല്ലെങ്കിൽ പൊണ്ണത്തടി എന്നിവ നിയന്ത്രിക്കുക, കാരണം ഇവ തിമിര സാധ്യത വർധിപ്പിക്കും. സ്റ്റിറോയിഡ് മരുന്നുകൾ നിർദേശിച്ചിട്ടുണ്ടെങ്കിൽ, ഡോക്ടറുടെ മാർഗനിർദേശത്തിൽ അവ ജാഗ്രതയോടെ ഉപയോഗിക്കുക. 

വിവരങ്ങള്‍ക്ക് കടപ്പാട്: ഡോ. ദേവിൻ പ്രഭാകർ, ഡയറക്ടർ ദിവ്യപ്രഭ ഐ ഹോസ്പിറ്റൽ, തിരുവനന്തപുരം