‘അവതാരകമാർക്ക് കയ്യടിയാണ് ലക്ഷ്യമെങ്കിൽ ആസിഫ് അലിക്ക് മാനുഷികതയേക്കാൾ വലുതല്ല ആൾക്കൂട്ടാരവങ്ങൾ’: കുറിപ്പ് Asif Ali Lauded for Empathetic Intervention at iPhone Launch

കോഴിക്കോട് ഒരു ഷോറൂമിൽ നടന്ന ഐഫോൺ 18 പ്രോ യുടെ ലോഞ്ചിങ് ചടങ്ങിനിടെ പുതിയ ഫോണ്‍ സമ്മാനമായി ലഭിച്ച യുവാവിനോട് പൊതുസദസില്‍വച്ചുതന്നെ പഴയഫോണ്‍ കാണിക്കാന്‍ അവതാരക പറഞ്ഞപ്പോള്‍ അത് വേണ്ട എന്നുപറഞ്ഞ നടന്‍ ആസിഫ് അലിയുടെ അവസരോചിതമായ ഇടപെടലിനെ പ്രശംസിച്ച് എഴുത്തുകാരി ശാരദക്കുട്ടി.

യുവാവ് വേദിയിലെത്തിയ ഉടൻ, കയ്യിലുണ്ടായിരുന്ന പഴയ ഫോൺ എല്ലാവർക്കും കാണിച്ചുകൊടുക്കാൻ അവതാരക ആവശ്യപ്പെടുകയായിരുന്നു. ആൾക്കൂട്ടത്തിന് മുന്നിൽ തന്റെ പഴയ ഫോൺ കാണിക്കുന്നതില്‍ അദ്ദേഹത്തിന് ഉണ്ടാകാവുന്ന മടിയും അസ്വസ്ഥതയും തിരിച്ചറിഞ്ഞ ആസിഫ് അലി, തക്കസമയത്ത് ഇടപെടുകയും അവതാരകയോട് അത് വേണ്ടെന്ന് കൈകൊണ്ട് ആംഗ്യം കാണിക്കുകയുമായിരുന്നു.

‘ആസിഫ് അലിയെ നടനെന്ന നിലയിൽ വലിയ ഇഷ്ടമാണ്. സഹജീവികളോട് സഹജസ്നേഹവും കരുതലുമുള്ള വ്യക്തി എന്ന നിലയിൽ അതിലേറെ സ്നേഹവും ബഹുമാനവുമുണ്ട്. പുതിയ ഫോൺ സമ്മാനമായി കിട്ടിയ പയ്യനോട് പഴയ ഫോൺ ഒന്നു കാണിക്കൂ എന്നു പറഞ്ഞ അവതാരകയെ സൗമ്യമായി തടഞ്ഞ്, പുതിയ ഫോൺ വേഗം തന്നെ സമ്മാനിച്ചാശ്ലേഷിച്ച ചടങ്ങാണ് ഏറ്റവും ഒടുവിലത്തെ ഉദാഹരണം. അവതാരകമാർക്ക് കയ്യടിയാണ് ലക്ഷ്യമെങ്കിൽ ആസിഫ് അലിക്ക് മാനുഷികതയേക്കാൾ വലുതല്ല ആൾക്കൂട്ടാരവങ്ങൾ. പണ്ട് പൊതുസദസ്സിൽ രമേശ് നാരായണനിൽ നിന്ന് നേരിട്ട ഒരപമാനം ആസിഫ് അർഹിക്കുന്ന ഒന്നായിരുന്നില്ലെന്ന് നമുക്കെല്ലാമറിയാമായിരുന്നെങ്കിലും, രമേശ് നാരായണനേക്കാൾ ഫാൻ ബേസുള്ള ആസിഫ് അന്ന് കാണിച്ച സമചിത്തതയും പാകതയും ഇന്നും ഓർമ്മയുണ്ട്. ഇതൊന്നും ബോധപൂർവ്വം നന്മമരമാകാൻ ശ്രമിക്കുന്നവർക്ക് അനുകരിക്കാനുമാവില്ല. അയാളിലെ നൈസർഗ്ഗികതയാണ് അയാളുടെ പെരുമാറ്റങ്ങളിലെ ആകർഷണീയത. ഒരു ഇൻസൾട്ട് ഉണ്ടായിട്ട് പ്രതികരിച്ചു മിടുക്കനാകുന്നതിനേക്കാൾ എന്ത് സൗന്ദര്യമുണ്ടായിരുന്നു കൈകൊണ്ട് തികച്ചും നൈസർഗ്ഗികമായി വന്ന ആ തടഞ്ഞു നിർത്തലിൽ. മനുഷ്യന്റെ കരങ്ങൾ ചിലപ്പോൾ ദൈവത്തിന്റെ കരങ്ങളാകുന്നതിങ്ങനെയാണ്. ആസിഫിനോടുള്ള എന്റെ പരിധികളില്ലാത്ത സ്നേഹവും വാത്സല്യവും വീണ്ടും അടയാളപ്പെടുത്തട്ടെ’' എന്നാണ് ശാരദക്കുട്ടി കുറിച്ചത്.

നിരവധിയാളുകളാണ് ആസിഫ് അലിയെ അഭിനന്ദിച്ചു രംഗത്തെത്തിയത്.