മുന്നേറുന്ന കാൻസർ ചികിത്സാ രംഗം, പ്രതീക്ഷ അർപ്പിച്ച് ചികിത്സകരും രോഗികളും World Cancer Day 2026

കാൻസർ ചികിത്സാ രംഗത്തെ ഓരോ പുതിയ കണ്ടുപിടുത്തങ്ങളും പഠനങ്ങളും വളരെ പ്രതീക്ഷയോടെയാണു മലയാളികൾ നോക്കിക്കാണുന്നത്. കാൻസർ മേഖലയിലെ പുതിയ മുന്നേറ്റങ്ങൾ ആശ്വാസകരമാണ്.

കാൻസറിനു വാക്സീൻ
ലോകത്തെ ത്രസിപ്പിക്കുന്ന പുതിയ വാർത്തയാണു ‘കാൻസറിനു വാക്സീൻ’. കാൻസർ വാക്സീൻ, മറ്റുള്ള വാക്‌സീനുകളിൽ നിന്നു വ്യത്യസ്തമായി നിലവിലുള്ള കാൻസറിനെ ചികിത്സിക്കുന്നതിനു വേണ്ടി രൂപകൽപന ചെയ്തിട്ടുള്ളതാണ്. ഒരു രോഗാണുവിനെ തിരിച്ചറിയാനും ആക്രമിക്കാനും പ്രതിരോധ സംവിധാനത്തെ പരിശീലിപ്പിക്കുന്ന പരമ്പരാഗത വാക്സീനുകളിൽ നിന്നു വ്യത്യസ്തമായി, കാൻസർ വാക്സീനുകൾ കാൻസർ കോശങ്ങളെ തിരിച്ചറിയാനും ആക്രമിക്കാനും നമ്മുടെ ശരീരത്തിന്റെ രോഗപ്രതിരോധ സംവിധാനത്തെ പരിശീലിപ്പിക്കുന്നു. രോഗിയുടെ സ്വന്തം രോഗപ്രതിരോധ സംവിധാനത്തെ ഉത്തേജിപ്പിച്ചു കാൻസർ കോശങ്ങളെ കണ്ടെത്താനും നശിപ്പിക്കാനും സഹായിക്കുക എന്നതാണ് ഇതിന്റെ ലക്ഷ്യം. ഇതു കാൻസർ വളരുന്നതും വ്യാപിക്കുന്നതും തടയുന്നു.

കാൻസർ കോശങ്ങൾക്കു സാധാരണകോശങ്ങളിൽ നിന്നു വ്യത്യസ്തമായി അവയുടെ ഉപരിതലത്തിൽ ചില പ്രത്യേക അടയാളങ്ങൾ ഉണ്ടാകും. ഇവയെ ആന്റിജനുകൾ എന്നു വിളിക്കുന്നു. ചികിത്സാ വാക്സീനുകൾ ഈ ആന്റിജനുകളെ രോഗപ്രതിരോധ സംവിധാനത്തിനു പരിചയപ്പെടുത്തുന്നു. അതുവഴി, രോഗപ്രതിരോധ സംവിധാനം ഈ ആന്റിജനുകളെ തിരിച്ചറിയാനും അവയെ പ്രദർശിപ്പിക്കുന്ന കാൻസർ കോശങ്ങൾക്കെതിരെ ആക്രമണം നടത്താനും പഠിക്കുന്നു.

പ്രോസ്റ്റേറ്റ് കാൻസറിനുള്ള സിപുലെസെൽ-ടി (Sipuleucel-T-Provenge), മൂത്രാശയ കാൻസറിനുള്ള ബാസിലസ് കാൽമെറ്റ്-ഗുറിൻ (BCG) എന്നിവ ചികിത്സാ കാൻസർ വാക്സീനുകൾക്ക് ഉദാഹരണങ്ങളാണ്.

രോഗനിർണയം ലളിതമാകും
കാൻസർ പരിശോധനയിലെ വിപ്ലവകരമായ കണ്ടു‌പിടുത്തമാണു ലിക്വിഡ് ബയോപ്സി. ലളിതമായി പറഞ്ഞാൽ രക്തത്തിലൂടെ കാൻസർ തിരിച്ചറിയുന്ന രീതിയാണിത്. ഇന്ന് ഉമിനീർ, മൂത്രം എന്നിവയിലൂടെയും കാൻസർ സാധ്യത കണ്ടെത്താൻ കഴിയുന്ന തരത്തിലേക്കു ലിക്വിഡ് ബയോപ്സി വളർന്നു കഴിഞ്ഞു. എന്നാൽ ഇന്നു ഗവേഷകർ സിന്തറ്റിക് ബയോപ്സി കണ്ടുപിടിച്ചു കഴിഞ്ഞു. കൃത്രിമമായി നിർമിക്കുന്ന ഒരു പദാർഥത്തെ കാൻസർ മാർക്കർ ആയി തിരിച്ചറിയുകയാണു സിന്തറ്റിക് ബയോപ്സിയിൽ. അതായതു കൃത്രിമമായി നിർമിച്ച പദാർഥം കൊണ്ടു കോശങ്ങളെ പ്രകോപിപ്പിക്കുക. ഈ പ്രകോപനത്തെ തുടർന്നു കോശങ്ങൾ ചില കാൻസർ മാർക്കറുകൾ പുറപ്പെടുവിക്കും. ഇതു കാൻസർ പ്രകടമാകുന്നതിനു വളരെ മുൻപു തന്നെ രോഗം കണ്ടെത്താൻ സഹായിക്കും. രക്തം ശേഖരിച്ചു ലാബറട്ടറിയിൽ വച്ചും ശരീരത്തിൽ കുത്തിവയ്പായും ബയോപ്സി നടത്താം.

മരുന്നുകളുടെ റീ പർപ്പസിങ്
ഒരു കാൻസറിന് ഉപയോഗിക്കുന്ന മരുന്നു മറ്റൊരു കാൻസറിന്റെ ചികിത്സയ്ക്കായി ഉപയോഗിക്കാറുണ്ട്. ഉദാ: കോളൻ കാൻസറിനു ഉപയോഗിക്കുന്ന താരതമ്യേന വില കുറഞ്ഞ മരുന്നു ശ്വാസകോശ അർബുദ രോഗിക്കു നൽകാറുണ്ട്. ഇതു ചില വ്യക്തികളിൽ അവരുടെ രോഗാവസ്ഥയിൽ അൽപം ആശ്വാസം നൽകുന്നതായും കാണുന്നുണ്ട്.

ചർമത്തിനടിയിൽ
ശ്വാസകോശ കാൻസർ ചികിത്സയിൽ ഇമ്യൂണോതെറപ്പിയുടെ ഭാഗമായി ധാരാളം മരുന്നുകൾ ഉപയോഗിക്കുന്നുണ്ട്. സാധാരണ ഇമ്യൂണോതെറപ്പി മരുന്നുകൾ സിരകളിലേക്കാണു കുത്തിവയ്ക്കാറുള്ളത് (ഇൻട്രാവെനസ്). അറ്റെസോലിസുമാബ് എന്ന മരുന്ന് ഉപയോഗിച്ചുള്ള ഇമ്യൂണോതെറപ്പി ചർമത്തിനടിയിലാണു (സബ്ക്യൂട്ടേനിയസ്) കുത്തിവയ്ക്കുന്നത്. ഇംഗ്ലണ്ടിൽ ഈ രീതി വ്യാപകമായി ഉപയോഗിക്കുന്നുണ്ട്.

നിർമിത ബുദ്ധിയുടെ സഹായം
എല്ലാ ചികിത്സാരംഗത്തും നിർമിത ബുദ്ധി അഥവാ ആർട്ടിഫിഷ്യൽ ഇന്റലിജൻസ് (എഐ) ഉപയോഗിക്കുന്നുണ്ട്. കാൻസറിന്റെ സ്‌റ്റേജ് നിർണയിക്കുന്നതിൽ നിന്നു തുടങ്ങി ഏതു ചികിത്സയാണു രോഗിക്കു കൂടുതൽ ഫലപ്രദമാകുക, വ്യക്തിയുടെ ആരോഗ്യ വ്യക്തിഗത വിവരങ്ങൾ അടിസ്ഥാനമാക്കി കാൻസർ വരാൻ സാധ്യതയുണ്ടോ എന്നുവരെ പ്രവചിക്കാൻ എഐക്കു സാധിക്കും.

ഒരു പുതിയ മരുന്നു കണ്ടുപിടിച്ചു എന്നിരിക്കട്ടെ. അതു ലാബറട്ടറിയിലെയും മറ്റും പരീക്ഷണങ്ങൾക്കും പരിശോധനകൾക്കും ശേഷം വിപണിയിൽ എത്താൻ കുറഞ്ഞത് 15 വർഷമെങ്കിലും എടുക്കും. നിർമിത ബുദ്ധിയുടെ സഹായത്താൽ ഈ കാലയളവ് അഞ്ചുവർഷമായെങ്കിലും കുറയ്ക്കാൻ സാധിക്കും. ഒരു മരുന്നു കണ്ടുപിടിച്ചാൽ അത് എത്രത്തോളം ഫലപ്രദമാകും എന്നു നിർമിത ബുദ്ധിക്കു കണ്ടുപിടിക്കാൻ സാധിക്കും. എന്തിനേറെ ഡോക്ടർ - രോഗി ആശയവിനിമയത്തിൽ നിന്നു മെഡിക്കൽ കാര്യങ്ങൾ മാത്രം പിടിച്ചെടുത്തു ഡേറ്റ തയാറാക്കാനും നിർമിത ബുദ്ധിക്കു കഴിയും.

ശസ്ത്രക്രിയാ രംഗത്തെ മുന്നേറ്റങ്ങൾ
കുറച്ചു കാലം മുൻപു വരെ വലിയ മുറിപ്പാട് അവശേഷിപ്പിക്കുന്ന ഒന്നായിരുന്നു ശസ്ത്രക്രിയകൾ. ഇന്ന് അതിനു മാറ്റം വന്നു. ലാപ്രോസ്കോപിക് അഥവാ കീഹോൾ ശസ്ത്രക്രിയയിൽ മൂന്നോ നാലോ ചെറിയ മുറിവുകൾ ശരീരത്തിൽ ഇട്ടാൽ മതി.

ഇന്നു കാൻസർ സർജറി വളരെയധികം വികസിച്ചു സിംഗിൾ ഇൻസിഷൻ റോബട്ടിക് സർജറിയിൽ എത്തി നിൽക്കുകയാണ്. ഈ രീതിയിൽ ഒരൊറ്റ മുറിവിലൂടെ ശസ്ത്രക്രിയ നടത്താൻ സാധിക്കും. എന്നാൽ ട്യൂമറിന്റെ വലുപ്പം അനുസരിച്ച് അതു പുറത്തെടുക്കാൻ മറ്റൊരു ചെറിയ മുറിവു കൂടി ഇടേണ്ടി വരാം. സാധാരണ ലാപ്രോസ്കോപിക് സർജറിയെ അപേക്ഷിച്ചു റോബട്ടിക് സർജറിയിൽ വേദനയും കുറവായിരിക്കും. സർജനു ശരീരത്തിനകത്തെ ദൃശ്യങ്ങൾ കുറച്ചു കൂടി കൃത്യതയോടെ, കാണാൻ കഴിയും. ത്രീഡി രൂപത്തിൽ ദൃശ്യങ്ങൾ കാണാം.

പ്രകാശം ഉപയോഗിച്ച്
ഫോട്ടോ ഡൈനാമിക് തെറപ്പി എന്ന ചികിത്സാരീതിയിൽ ഫോട്ടോ സെൻസിറ്റൈസർ എന്ന ലൈറ്റ് സെൻസിറ്റീവ് മരുന്നുകൾ ശരീരത്തിൽ കുത്തിവയ്ക്കും. ഇതു കാൻസർ കോശങ്ങളിൽ അടിഞ്ഞുകൂടുന്നു. ഒരു പ്രത്യേക തരംഗദൈർഘ്യമുള്ള പ്രകാശം കാൻസർ കോശങ്ങളെ നശിപ്പിക്കുന്ന ഓക്സിജൻ റാഡിക്കലുകളെ ഉൽപാദിപ്പിക്കുന്നതിനു കാരണമാകുന്നു. ഇതിലൂെട ആരോഗ്യമുള്ള കോശങ്ങളെ നിലനിർത്തിക്കൊണ്ടു കാൻസർ കോശങ്ങളെ മാത്രം നശിപ്പിക്കാൻ സാധിക്കും. പ്രകാശത്തിനു പകരം അൾട്രാസൗണ്ട് ഉപയോഗിക്കുന്ന രീതി ഇന്നു നിലവിലുണ്ട്. ഇതു വിദേശരാജ്യങ്ങളിൽ ഉപയോഗിക്കുന്നുണ്ട്. ഭാവിയിൽ ഇന്ത്യയിലും ഇതു ലഭ്യമാകാം.

റേഡിയോതെറപ്പി
പോസ്റ്റീവ് ചാർജ് ഉള്ള കണികകളായ പ്രോട്ടോണുകളെ ഉപയോഗിച്ചു ട്യൂമറിനെ നശിപ്പിക്കുന്ന രീതിയാണു പ്രോട്ടോൺ തെറപ്പി. റേഡിയേഷൻ ഡോസിന്റെ ഭൂരിഭാഗവും നേരിട്ടു ട്യൂമറിൽ നിക്ഷേപിക്കുന്നതിനാൽ ചുറ്റുമുള്ള ആരോഗ്യമുള്ള കോശങ്ങളെ ബാധിക്കില്ല. ഈ ചികിത്സയ്ക്കു പാർശ്വഫലങ്ങൾ വളരെ കുറവാണ്. ചെലവേറിയ ചികിത്സയാണു പ്രോട്ടോൺ തെറപ്പി. ഇന്ത്യയിൽ ഇത് എല്ലായിടത്തും ലഭ്യമായിട്ടില്ല. സുഷ്മ്നാ നാഡിയിലെ മുഴ, കുട്ടികളിലെ കാൻസറുകൾ എന്നിവ ചികിത്സിക്കാൻ ഈ തെറപ്പി ഫലപ്രദമാണ്.റേ‍ഡിയോ തെറപ്പിയിലെ നൂതന കണ്ടുപിടുത്തമാണ് ഫ്ലാഷ് ആർടി- FLASH- RT. വളരെ കൂടിയ തോതിലുള്ള റേഡിയേഷൻ വളരെ കുറച്ചു സമയം കൊണ്ടു കാൻസർ മുഴകളിൽ ഏൽപ്പിക്കുന്നു. റേഡിയേഷൻ നൽകാൻ സെക്കൻഡുകൾ മാത്രമെ വേണ്ടിവരുകയുള്ളൂ.

വിവരങ്ങൾക്കു കടപ്പാട്

ഡോ. എം.വി. പിള്ള, തോമസ് ജെഫെഴ്സൺ യൂണിവേഴ്സിറ്റി, യുഎസ്എ
ഡോ. നാരായണൻകുട്ടി വാര്യർ. എംവിആർ കാൻസർ സെന്റർ. കോഴിക്കോട്
ഡോ. ജെം കളത്തിൽ, ആസ്റ്റർ മെ‍ഡ്സിറ്റി, എറണാകുളം
ഡോ. റോഷ്നി എസ്., ആർസിസി, തിരുവനന്തപുരം