ബോക്സർ ടൈപ്പ് നല്ലത്; ജിമ്മിൽ പോകുമ്പോൾ നല്ല സപ്പോർട്ടുള്ളവ വേണം: പുരുഷന്മാരിൽ അടിവസ്ത്രം തിരഞ്ഞെടുക്കുമ്പോൾ... Choosing the Right Underwear for Men's Health

പുരുഷന്മാരിൽ അടിവസ്ത്രം തിരഞ്ഞെടുക്കുമ്പോൾ ഏറെ ശ്രദ്ധിക്കണം. കാരണം ഗുണമേന്മയുള്ള, വേണ്ട അളവിലുള്ള ശുക്ലം ഉൽപാദിപ്പിക്കപ്പെടണമെങ്കിൽ വൃഷണങ്ങളുടെ താപനില ശരീരതാപനിലയേക്കാൾ കുറവായിരിക്കണം. അതുകൊണ്ടാണ് വൃഷണങ്ങളെ ശരീരത്തിനു പുറത്തായിരിക്കുന്നത്. വളരെ മുറുകിയ അടിവസ്ത്രം ധരിക്കുമ്പോൾ വൃഷണങ്ങളുടെ ചൂട് കൂടാനാണ് സാധ്യത. ഇത് ശുക്ലത്തിന്റെ അളവിനെ പോലും ബാധിക്കാമെന്നു പഠനങ്ങളുണ്ട്. വളരെ അയഞ്ഞാൽ വൃഷണങ്ങൾക്ക് ആവശ്യംവേണ്ട താങ്ങ് ലഭിക്കുകയുമില്ല.

എന്തൊക്കെ ശ്രദ്ധിക്കണം?

സ്വകാര്യഭാഗം മാത്രം മൂടുന്ന ബ്രീഫ്, തുട കൂടി മൂടുന്ന ബോക്സർ, തുടയുടെ മധ്യഭാഗം വരെ എത്തുന്ന ബോക്സർ ബ്രീഫ് എന്നിങ്ങനെ പലതരം അടിവസ്ത്രങ്ങൾ ലഭ്യമാണ്. ആവശ്യത്തിന് വായുസഞ്ചാരം ലഭിക്കുന്ന ഒരൽപം ലൂസ് ആയ വിയർപ്പു കെട്ടിനിർത്താത്ത തുണി കൊണ്ടുള്ള ബോക്സർ ടൈപ്പ് അടിവസ്ത്രമാണ് ആരോഗ്യകരം എന്നാണ് നിലവിൽ പഠനങ്ങൾ പറയുന്നത്. ഇലാസ്റ്റിക് അയഞ്ഞുപോകാനും കീറാനും ഒക്കെ തുടങ്ങുമ്പോൾ മാറ്റി പുതിയത് വാങ്ങണം. പൊതുവായി പറഞ്ഞാൽ അടിവസ്ത്രങ്ങൾ ആറു മാസം കൂടുമ്പോൾ മാറ്റി പുതിയത് വാങ്ങാം.

ഒാടുമ്പോഴോ കായികപ്രവർത്തനങ്ങളിൽ ഏർപ്പെടുമ്പോഴോ അടിവസ്ത്രം ധരിച്ചില്ലെങ്കിൽ?

കായികപ്രവർത്തികളിൽ ഏർപ്പെടുമ്പോൾ വൃഷണത്തിനു ശരിയായ താങ്ങു നൽകുന്ന അടിവസ്ത്രങ്ങൾ ധരിക്കേണ്ടത് പ്രധാനമാണ്. ഇല്ലെങ്കിൽ വൃഷണസഞ്ചിയുടെ ഭാഗങ്ങൾ അടിവസ്ത്രത്തിൽ ഉടക്കുകയോ ഉരയുകയോ ചെയ്ത് പരിക്കുകൾ ഉണ്ടാകാം. തുടർച്ചയായി കൂട്ടിയുരസുന്നതു കാരണം വൃഷണങ്ങൾക്ക് വേദന അനുഭവപ്പെടാം.

കളിക്കുമ്പോഴും ജിമ്മിൽ പോയി വ്യായാമം ചെയ്യുമ്പോഴും കൂടുതലായുള്ള ചലനങ്ങൾ ഉണ്ടാകാറുണ്ട്. ഇങ്ങനെ വരുന്ന അവസരത്തിൽ വൃഷണസഞ്ചിയിലുള്ള വൃഷണങ്ങൾ തിരിയുവാനും രക്തയോട്ടം നിലച്ചുപോകാനും സാധ്യതയുണ്ട്. 12 മുതൽ 18 വയസ്സു വരെയുള്ള പ്രായത്തിലുള്ളവരിലാണ് ഇങ്ങനെയൊരു പ്രശ്നത്തിനു സാധ്യത കൂടുതൽ. ചിലരിൽ ജന്മനാൽ തന്നെ വൃഷണങ്ങൾ വൃഷണസഞ്ചിയുമായി ഘടിപ്പിച്ചിരിക്കുന്നതിൽ അപാകതകൾ വരാനും അതുകൊണ്ടു വൃഷണങ്ങൾ തിരിയുവാനും സാധ്യത കൂടുതലാണ്.

കളിക്കുമ്പോഴും ജിമ്മിൽ പോകുമ്പോഴും സ്ക്രോട്ടം സപ്പോർട്ടുള്ള (ലങ്കോട്ടി പോലെയുള്ളത്) അടിവസ്ത്രം ഉപയോഗിക്കുന്നതാണ് ഉത്തമം. മൂന്നു ലെയറുകളായി അടിവസ്ത്രം ധരിച്ച് വൃഷണങ്ങൾക്ക് താങ്ങു നൽകുന്ന രീതിയാണ് കായികപരിശീലകർ നിർദേശിക്കുന്നത്. അത്ലറ്റുകൾക്കായി പ്രത്യേകമായുള്ള സ്പോർട്സ് അടിവസ്ത്രങ്ങളും ലഭ്യമാണ്.

രാത്രി കിടക്കുമ്പോഴും ധരിക്കണോ?

രാത്രി കിടക്കുമ്പോൾ അടിവസ്ത്രം ധരിക്കാത്തതാണ് നല്ലത്. ഇല്ലെങ്കിൽ വിയർപ്പ് കെട്ടിനിന്ന് ഫംഗൽ അണുബാധ ഉണ്ടാകാം. പകൽ അടിവസ്ത്രം ധരിക്കുകയും രാത്രി ധരിക്കാതെ ഉറങ്ങുകയും ചെയ്യുന്നവരിൽ ബീജത്തിലെ ഡിഎൻഎ നാശം കുറയ്ക്കുന്നതായു ശുക്ലത്തിന്റെ ഗുണം വർധിപ്പിക്കുന്നതായും യുഎസ് നാഷനൽ ഇൻസ്റ്റിറ്റ്യൂട്ട് ഒാഫ് ചൈൽഡ് ഹെൽത് ആൻഡ് ഹ്യുമൻ ഡെവലപ്മെന്റ് നടത്തിയ പഠനം പറയുന്നു.

അടിവസ്ത്രങ്ങൾ ഒരുമിച്ചിട്ടു കഴുകുന്ന രീതി ആരോഗ്യകരമാണോ?

കഴിവതും അടിവസ്ത്രങ്ങൾ മുഷിഞ്ഞ് കഴിഞ്ഞ് അധികം വൈകാതെ കഴുകുന്നതാണ് ആരോഗ്യകരം. മറ്റു വസ്ത്രങ്ങളോടൊപ്പമിട്ട് അടിവസ്ത്രം കഴുകുന്നതും നല്ലതല്ല. അണുബാധകൾ പകരാൻ ഇടയാക്കും. അടിവസ്ത്രം പ്രത്യേകം സോപ്പിൽ മുക്കിവച്ച് നന്നായി ഉലച്ചു കഴുകി നല്ല വെയിലത്ത് ഉണക്കി എടുക്കണം. ആഴ്ചയിൽ ഒരിക്കൽ നല്ല ചൂടുവെള്ളത്തിൽ മുക്കിവച്ച് കഴുകുന്നത് കൂടുതൽ നല്ലതാണ്.

അടിവസ്ത്രങ്ങളിലെല്ലാം പ്രത്യേക ഗന്ധമുണ്ട്. ഇതു മാറാൻ കഴുകുമ്പോൾ എന്തൊക്കെ ശ്രദ്ധിക്കണം?

അടിവസ്ത്രത്തിൽ ഉണ്ടാകുന്ന ദുർഗന്ധത്തിനു കാരണം അവിടെയുള്ള വിയർപ്പു ഗ്രന്ഥികളിൽ നിന്നും ബാക്ടീരിയ ഉണ്ടാകുന്നതാകാം. ഇതിനു ബ്രോം ഹൈഡ്രോസിസ് എന്നു പറയും. ചർമരോഗ വിദഗ്ധരെ സമീപിച്ച് അതിനുള്ള ആന്റി ബാക്ടീരിയൽ സോപ്പുകളോ ലോഷനുകളോ ഉപയോഗിക്കുന്നതു ഗുണകരമാണ്.

കുട്ടികൾ മുതിരുന്നത് അനുസരിച്ച് അവരുടെ ശരീരഗന്ധത്തിൽ മാറ്റം വരാം. സ്വകാര്യഭാഗങ്ങളിൽ പല പാളികളായി വസ്ത്രങ്ങൾ വരുന്നതിനാൽ വിയർപ്പു കെട്ടിനിൽക്കാൻ സാധ്യത കൂടുതലാണ്. വിയർപ്പും സ്രവങ്ങളുമെല്ലാം ചേർന്ന് ഒരു പുരുഷ ഗന്ധം ഉണ്ടാകാം. സ്വകാര്യഭാഗങ്ങൾ ശുചിയായി വച്ചിരുന്നാൽ തന്നെ ദുർഗന്ധമുണ്ടാകില്ല. സ്വകാര്യഭാഗങ്ങളിലെ രോമങ്ങൾ വെട്ടി ചെറുതാക്കി സൂക്ഷിക്കുക, കുളി കഴിഞ്ഞ് നനവു മാറിയശേഷം മാത്രം അടിവസ്ത്രം ധരിക്കുക എന്നിവയൊക്കെ അടിസ്ഥാന ശുചിത്വനടപടികളാണ്. അടിവസ്ത്രങ്ങൾ കഴുകുമ്പോൾ ഒരൽപം നാരങ്ങാനീര് ചേർത്താൽ ഇത് മാറിക്കിട്ടും. ഒരുതവണ ഉപയോഗിച്ച അടിവസ്ത്രം കഴുകാതെ വീണ്ടും ധരിക്കരുത്. കഴിവതും കോട്ടൺ കൂടുതലുള്ള തരം അടിവസ്ത്രങ്ങൾ തിരഞ്ഞെടുക്കുക.

ഇറുകിയ അടിവസ്ത്രം ഉപയോഗിച്ചാൽ ആ ഭാഗങ്ങളിൽ ചൊറിച്ചിൽ, അലർജി എന്നിവ വരാം. തുടർന്നു ബാക്ടീരിയൽ അണുബാധകൾക്കും സാധ്യത ഉണ്ട്. നമ്മുടെ കാലാവസ്ഥയ്ക്ക് അനുയോജ്യമായതു ബോക്സ് ടൈപ്പ് അടിവസ്ത്രങ്ങളാണ്. അണുബാധ വന്നാൽ, ഇറുകിയ പാന്റ്സ്, ജീൻസ് തുടങ്ങിയവ ഒഴിവാക്കുക. മുണ്ടു പോലുള്ളവ ഉപയോഗിക്കുക. അടിവസ്ത്രം കഴുകുമ്പോൾ ചൂടുവെള്ളത്തിൽ മൈൽഡ് ആയിട്ടുള്ള സോപ്പ് ഉപയോഗിക്കുക. നല്ല വെയിലിൽ ഉണക്കണം. അടിവസ്ത്രങ്ങളുടെ ഉൾവശം തേച്ചുപയോഗിക്കുന്നതും നല്ലത്.

ഇറുക്കമുള്ള അടിവസ്ത്രവും ബീജത്തിന്റെ അളവും

വൃഷണം ശരീരത്തിനു പുറത്താണിരിക്കുന്നത്. വൃഷണസഞ്ചി ശരീരത്തിന്റെ താപനിലയിൽ നിന്നും താഴ്ന്ന താപനിലയിൽ വച്ചിരിക്കുന്നതിന്റെ ഉദ്ദേശ്യം തന്നെ ബീജോൽപാദനത്തിനാണ്. എപ്പോഴും ഇറുകിയ അടിവസ്ത്രം ധരിക്കുന്നതു വൃഷണങ്ങളിലെ ഊഷ്മാവു കൂട്ടാനിടയാക്കും. തത്ഫലമായി ബീജങ്ങളുടെ കൃത്യമായ ഉൽപാദനം നടക്കാതിരിക്കാം. ബോക്സർ തരത്തിലുള്ള അടിവസ്ത്രങ്ങളാണെങ്കിൽ ഈ പ്രശ്നമില്ല. ഇറുകിയ ജീൻസ് ഉപയോഗിക്കുന്നതും (പ്രത്യേകിച്ച് ബീജങ്ങളുടെ അളവു കുറവുള്ളവർ) ഇതേ കാരണത്താൽ ഒഴിവാക്കുന്നതാണു നല്ലത്.

വിവരങ്ങൾക്കു കടപ്പാട്

മനോരമ ആരോഗ്യം ആർകൈവ്