വീട്ടിലെ പാർട്ടിക്ക് വിളമ്പാം ക്രഞ്ചി ഷൂ ബൺസ്

ഈ ഒരു വിഭവം ഉണ്ടാക്കാൻ അറിഞ്ഞാൽ അതിഥികളെ സ്നേഹത്തോടെ സൽക്കരിക്കാൻ ഇനി എന്തെളുപ്പമാണെന്നോ ..വീട്ടിൽ തന്നെ വളരെ എളുപ്പത്തിൽ ഉണ്ടാക്കാൻ കഴിയുന്ന ഒരു ക്രഞ്ചി സ്‌നാക്കാണ് ഷൂ ബൺ.

ആവശ്യമായ ചേരുവകൾ 

1. വെള്ളം – ഒന്നേകാൽ കപ്പ്

    വെണ്ണ – കാൽ കപ്പ്

2. മൈദ – ഒന്നേകാൽ കപ്പ്

3. മുട്ട – രണ്ട്

പാകം ചെയ്യുന്ന വിധം

∙ അവ്ൻ 200 ഡിഗ്രി സെൽഷ്യസിൽ ചൂടാക്കിയിടുക.

∙  വെള്ളത്തിൽ വെണ്ണ ചേർത്ത് അടുപ്പത്തു വച്ചു തിളപ്പിക്കുക. വെണ്ണ മുഴുവൻ അലിയുമ്പോൾ അടുപ്പിൽ നിന്നു വാങ്ങി അതിലേക്കു മൈദ ഇടഞ്ഞതു ചേർക്കുക.

∙  തിരികെ ഇടത്തരം തീയിൽ വച്ചു തുടരെയിളക്കി ഉരുള പോലെയാകുമ്പോൾ വാങ്ങി ചൂടാറാൻ വയ്ക്ക്കണം

∙ ചൂടാറിത്തുടങ്ങുമ്പോൾ ഇതിലേക്കു മുട്ട നന്നായി അടിച്ചതു ചേർത്തടിച്ചു യോജിപ്പിക്കുക. നല്ല മയവും മിനുസവുമുള്ള മിശ്രിതം ലഭിക്കണം.

∙ വലിയൊരു പൈപ്പിങ് ബാഗിൽ വലിയ സ്റ്റാർ നോസിൽ ഇട്ട് ഈ മിശ്രിതം നിറയ്ക്കുക.

∙ മയം പുരട്ടിയ ബേക്കിങ് ഷീറ്റിലേക്കു മെല്ലേ ചെറിയ പൂക്കൾ പോലെ പൈപ്പ് ചെയ്യുക.

∙  ചൂടാക്കിയിട്ടിരിക്കുന്ന അവ്നിൽ വച്ച് 20 മിനിറ്റ് ബേക്ക് ചെയ്യുക. നന്നായി പൊങ്ങി, ഗോൾഡൻ നിറമാകുന്നതാണു പാകം.

∙  പുറത്തെടുത്തയുടൻ വശങ്ങളിൽ കുത്തി ആവി കളയണം

∙  തിരികെ ഓഫ് ചെയ്തിട്ടിരിക്കുന്ന അവ്നിൽ വയ്ക്കുക. 20 മിനിറ്റിനു ശേഷം പുറത്തെടുത്തു ചൂടാറാൻ വയ്ക്കണം.

∙  പിന്നീട് ഫ്രീസറിൽ വച്ച് സെറ്റായ ശേഷം ബാഗിലാക്കി വയ്ക്കുക.

∙ ആവശ്യമുള്ളപ്പോൾ പുറത്തെടുത്തു വച്ച് തണുപ്പു മാറിയ ശേഷം ഉപയോഗിക്കാം.

∙  ഓരോ ഷൂ ബണ്ണും അറ്റം വിട്ടു പോകാതെ രണ്ടായി പിളർന്ന് ഉള്ളിൽ ഇഷ്ടമുള്ള ഫില്ലിങ് വച്ചു വിളമ്പാം.

∙  ചോക്‌ലെറ്റ് സോസ്, ക്രീം, സേവറി ഫില്ലിങ്ങ് എന്നിങ്ങനെ ഏതു വേണമെങ്കിലും ഉപയോഗിക്കാം.

Ammu Mathew, Kottayam