നാവിൽ കപ്പലോടിക്കും രണ്ടു കിടിലൻ റെസിപ്പികൾ; ബീറ്റ്റൂട്ട് പാസ്തയും ഉരുളക്കിഴങ്ങു ചീസ് വെഡ്ജും!

ബീറ്റ്റൂട്ട് പാസ്ത ടുമാറ്റോ സോസിനൊപ്പം

1.പെന്നെ പാസ്ത – അരക്കിലോ

ബീറ്റ്‌റൂട്ട് – ഒന്നിന്റെ പകുതി

2.ഒലിവ് ഓയിൽ – പാചകത്തിന്

3.സവാള – ഒന്ന്, പൊടിയായി അരിഞ്ഞത്

ചുവന്ന മുളക് – ഒന്ന്, അരി കളഞ്ഞു പൊടിയായി അരിഞ്ഞത്

മല്ലിയില – ഒരു കെട്ട്, പൊടിയായി അരിഞ്ഞത്

4.തക്കാളി – 800 ഗ്രാം, പൊടിയായി അരിഞ്ഞത്

5.കല്ലുപ്പ്, കുരുമുളകുപൊടി – പാകത്തിന്

6.മല്ലിയില, ഒലിവ് ഓയിൽ, കുറച്ചു ചെഡ്ഡർ ചീസ് ഗ്രേറ്റ് ചെയ്തത് – ഒരു പിടി

‌പാകം ചെയ്യുന്ന വിധം

ഒരു സോസ്പാനിൽ ഉപ്പുവെള്ളമെടുത്ത് അതിൽ ബീറ്റ്റൂട്ട് വേവിച്ച വെള്ളവും ചേർത്തു തിളപ്പിച്ച ശേഷം പാസ്ത ചേർത്ത് പായ്ക്കറ്റിൽ പറഞ്ഞിരിക്കുന്നതു പോലെ വേവിക്കുക.

മുക്കാൽ വേവിൽ കടി കൊള്ളുന്ന പരുവത്തിൽ വാങ്ങി ഊറ്റി വെള്ളം വാലാൻ വയ്ക്കുക.

ചുവടു കട്ടിയുള്ള പാനിൽ ഒലിവ് ഓയിൽ ചൂടാക്കി മൂന്നാമത്തെ ചേരുവ ചേർത്ത് ഇടത്തരം ചെറുചൂടിൽ ഏകദേശം അഞ്ചു മിനിറ്റ് വേവിക്കുക.

സവാള മൃദുവാകുമ്പോൾ തീ കൂട്ടിയശേഷം തക്കാളി ചേർത്തു തിളപ്പിക്കണം. പിന്നീട് തീ കുറച്ചശേഷം 15 മിനിറ്റ് ചെറുതീയിൽ വേവിക്കുക. ഉപ്പും കുരുമുളകുപൊടിയും ചേർത്തിളക്കുക.

വേവിച്ചു വച്ചിരിക്കുന്ന പാസ്ത ഇതിൽ ചേർത്തു കുടഞ്ഞു യോജിപ്പിക്കുക. പിന്നീട് ആറാമത്തെ ചേരുവയും ചേർത്തിളക്കി യോജിപ്പിച്ച ശേഷം പാത്രം അടച്ചു വച്ച് ഒരു മിനിറ്റ് വേവിക്കുക.

ഉപ്പും എരിവും പാകത്തിനാക്കി ഉടൻ തന്നെ വിളമ്പുക.

ഉരുളക്കിഴങ്ങു ചീസ് വെഡ്ജ്

1.ഉരുളക്കിഴങ്ങ് – നാല്

2.ചീസ് ഗ്രേറ്റ് ചെയ്തത് – ഒരു കപ്പ്

സെലറി പൊടിയായി അരിഞ്ഞത് – രണ്ടു വലിയ സ്പൂൺ

വെളുത്തുള്ളി പൊടിയായി അരിഞ്ഞത് – ഒരു വലിയ സ്പൂൺ

സ്പ്രിങ് അണിയൻ – ഒരു തണ്ട്, പൊടിയായി അരിഞ്ഞത്

കുരുമുളകുപൊടി, കടുകുപൊടി, ഉപ്പ് – പാകത്തിന്

പാകം ചെയ്യുന്ന വിധം

ഉരുളക്കിഴങ്ങു തൊലിയോടു കൂടി നന്നായി കഴുകി വൃത്തിയാക്കി ഓരോന്നും നീളത്തിൽ രണ്ടായി പിളരുക. ഇതു മൂന്നു സ്ലൈസായി മുറിക്കണം.

രണ്ടാമത്തെ ചേരുവ ഒരു സിപ്പ്ലോക്ക് ബാഗിലാക്കി അതിലേക്കു ഉരുളക്കിഴങ്ങു കഷണങ്ങൾ ഇട്ടു നന്നായി കുടഞ്ഞു യോജിപ്പിക്കണം.

ഉരുളക്കിഴങ്ങിൽ ചീസ് മിശ്രിതം നന്നായി പുരണ്ടശേഷം പുറത്തെടുത്തു ചൂടാക്കിയിട്ടിരിക്കുന്ന അവ്നിൽ വച്ച് അര മണിക്കൂർ ബേക്ക് ചെയ്യുക. ഇടയ്ക്ക് ഒരു ഫോർക്ക്കൊണ്ടു കുത്തി നോക്കിയാൽ പാകമായോ എന്നറിയാം.

കവറിലുള്ള ബാക്കി ചീസ് മിശ്രിതം സ്പൂൺ കൊണ്ടു വടിച്ചെടുത്ത് ഉരുളക്കിഴങ്ങിനു മുകളിൽ വിതറി വിളമ്പാം.