രുചികരമായ മുംബൈ ടോസ്റ്റി, ചെറുയാത്രയ്ക്കു ഒരുങ്ങുമ്പോൾ കയ്യില്‍ കരുതാം Delicious Mumbai Toast Recipe for Your Next Trip

ചെറുയാത്രയ്ക്ക് ഒരുങ്ങുമ്പോൾ വീട്ടിൽ തയാറാക്കി പായ്ക്ക് ചെയ്യാം രുചികരമായ മുംബൈ ടോസ്റ്റി. രുചികരമായ റെസിപ്പി ഇതാ...

മുംബൈ ടോസ്റ്റി

1. ഉരുളക്കിഴങ്ങ് ഉടച്ചത് – രണ്ടു കപ്പ്
2. എണ്ണ –  മൂന്നു വലിയ സ്പൂൺ
3. മഞ്ഞക്കടുക് – ഒരു ചെറിയ സ്പൂൺ
4. ജീരകം – അര ചെറിയ സ്പൂൺ
കറിവേപ്പില – 10
5. മഞ്ഞൾപൊടി – അര ചെറിയ സ്പൂൺ
മുളകുപൊടി  – അര ചെറിയ സ്പൂൺ
6. ഉപ്പ്, കുരുമുളകുപൊടി – പാകത്തിന്
7. ബ്രെഡ് – എട്ടു സ്ലൈസ്
8. വെണ്ണ – പുരട്ടാൻ പാകത്തിന്
9. തക്കാളി – രണ്ട്, കനം കുറച്ചരിഞ്ഞത്
സവാള – ഒന്നിന്റെ പകുതി, കനം കുറച്ചരിഞ്ഞത്
ചീസ് സ്ലൈസ് – എട്ട്

പാകം ചെയ്യുന്ന വിധം

∙ ഉരുളക്കിഴങ്ങ് ഉടച്ചത് ഒരു ബൗളിലാക്കി വയ്ക്കണം.

∙ മറ്റൊരു പാനിൽ എണ്ണ ചൂടാക്കി, കടുകിട്ടു പൊട്ടുമ്പോൾ ജീരകവും കറിവേപ്പിലയും ചേർത്തിളക്കണം.

∙ ഒന്ന് രണ്ടു മിനിറ്റിനു ശേഷം മഞ്ഞൾപൊടിയും മു ളകുപൊടിയും ചേർത്തിളക്കി വാങ്ങി ഉരുളക്കിഴങ്ങ് ഉടച്ചതിൽ ചേർത്തു നന്നായി യോജിപ്പിക്കുക. പാകത്തിനുപ്പും കുരുമുളകുപൊടിയും ചേർത്തിളക്കണം. 

∙ നാലു ബ്രെഡ് സ്ലൈസുകൾ നിരത്തി വച്ച്, വെണ്ണ പുരട്ടി ഓരോന്നിലും ഫില്ലിങ്ങും ഓരോ സ്ലൈസ് തക്കാളിയും സവാളയും ചീസും വയ്ക്കുക.

∙ ബാക്കി നാലു സ്ലൈസ് ബ്രെഡിലും ഗ്രീൻചട്നി നിരത്തി ചട്നി അകത്തു വരുംവിധം ഫില്ലിങ്ങിനു മുകളിൽ കമഴ്ത്തി വയ്ക്കുക.

∙ സാൻവിച്ച് പ്രസ്സിൽ വച്ചോ ഗ്രില്ലിൽ വച്ചോ ഗ്രിൽ ചെയ്തെടുക്കണം.

∙ ഗ്രീൻചട്നിക്കൊപ്പം വിളമ്പാം.

∙ ഗ്രീന്‍ ചട്നി തയാറാക്കാൻ ഒരു കപ്പ് മല്ലിയില അമർത്തി അളന്നത്, അരക്കപ്പ് പുതിനയില, രണ്ട് അല്ലി വെളുത്തുള്ളി, ഒരു ചെറിയ സ്പൂൺ ചാട്ട്മസാല, രണ്ട്–മൂന്നു പച്ചമുളക് എന്നിവ മിക്സിയിലാക്കി തരുതരുപ്പായി അരച്ചു വയ്ക്കുക.

പാചകക്കുറിപ്പുകൾക്കു കടപ്പാട്: മഞ്ജു മാത്യു, മുംബൈ. ഫോട്ടോയ്ക്കു വേണ്ടി വിഭവങ്ങൾ തയാറാക്കിയതിനു കടപ്പാട്: പി. കെ. രഘുനാഥ്, മലയാള മനോരമ, കൊച്ചി