‘തെറ്റായ രീതിയിലുള്ള ഇരിപ്പും നിൽപ്പും, വയറിലെ അധികഭാരം’; ഹെർണിയയ്ക്ക് കാരണമാകുന്ന ശീലങ്ങൾ അറിയാം Understanding Hernia: Causes, Symptoms, and Treatments

വയറിനകത്ത് ആമാശയം, ചെറുകുടല്‍, വന്‍കുടല്‍, മറ്റ് അവയവങ്ങള്‍ എന്നിവ ഒരു പരിധിക്കപ്പുറത്തേക്ക് തള്ളി വരാതിരിക്കാനുള്ള പ്രതിരോധ സംവിധാനം അടിവയറ്റിന്റെ ഭിത്തിയില്‍ ഉണ്ട്. ഈ ഭിത്തിക്ക് ബലക്കുറവ് സംഭവിച്ചാല്‍, എഴുന്നേറ്റ് നില്‍ക്കുമ്പോള്‍ വയറിനുള്ളിലെ അവയവങ്ങള്‍ പുറത്തേക്കു തള്ളി വരാന്‍ സാധ്യതയുണ്ട്. ഈ അവസ്ഥയെ ഹെര്‍ണിയ എന്നു പറയുന്നു.  

പൊക്കിളിലൂടെയോ അതിനു ചുറ്റുപാടുമോ വയറിന്റെ ഏറ്റവും താഴ്ഭാഗത്തായി വലത്- ഇടതു വശങ്ങളിലായും ഇത് സംഭവിക്കാം. നില്‍ക്കുന്ന സമയത്ത് ഇത് കൂടി വരാനും കിടക്കുമ്പോള്‍ അപ്രത്യക്ഷമാകാനും സാധ്യതയുണ്ട്. വളരെ പതിയെയാണ് ഈ ബുദ്ധിമുട്ട് വികസിച്ചു വരുക. വികസിച്ചു കഴിഞ്ഞാല്‍ വയറിനുള്ളിലെ ഈ അവയവങ്ങള്‍ പുറത്തോട്ടു വരാന്‍ പരിശ്രമിക്കുകയോ നില്‍ക്കുന്ന സമയത്ത് ചെറിയ രീതിയിലെങ്കിലും തള്ളിവരികയോ ചെയ്യുന്നതായി അനുഭവപ്പെടാം.

ചിലപ്പോള്‍ അവയവങ്ങള്‍ അമരുകയും ചുരുങ്ങുകയും ചെയ്യാം. അതോടൊപ്പം കഠിനമായ വയറുവേദനയും ഛര്‍ദിയും മറ്റ് ബുദ്ധിമുട്ടുകളും സംഭവിക്കാം. ഇതൊരു അടിയന്തര മെഡിക്കല്‍ സാഹചര്യമാണ്. ചിലപ്പോള്‍ പെട്ടെന്നു തന്നെ ശസ്ത്രക്രിയ ചെയ്യേണ്ടി വന്നേക്കാം. 

ഹെര്‍ണിയയാണെന്ന് ഉറപ്പു വരുത്തിയതിനു ശേഷം വയറ്റിലെ ബലക്ഷയമുള്ള ഭാഗം ശസ്ത്രക്രിയയിലൂടെ ബലം വയ്പ്പിക്കുകയോ ദ്വാരമായിട്ടാണ് കാണപ്പെടുന്നതെങ്കില്‍ അത് പരിപൂര്‍ണമായി അടയ്ക്കുകയോ ചെയ്യാവുന്നതാണ്. അമിതമായ ഭാരമെടുക്കുകയോ ദീര്‍ഘകാലം നീണ്ടു നില്‍ക്കുന്ന ചുമയുണ്ടെങ്കിലോ ഹെര്‍ണിയ ചിലപ്പോള്‍ സങ്കീര്‍ണമാകാം. ഇത് പരിപൂര്‍ണമായും മാറ്റിയെടുക്കാവുന്ന രോഗമാണ്. എന്നാല്‍, മരുന്നുകളിലൂടെ മാറ്റിയെടുക്കാന്‍ സാധിക്കില്ല. 

പൊക്കിളിലൂടെ വരുന്ന ഹെര്‍ണിയയെ അംബ്ലിക്കല്‍ ഹെര്‍ണിയ എന്നും പൊക്കിളിന്റെ ചുറ്റുപാടു നിന്ന വരുന്ന ഹെര്‍ണിയയെ പാരഅംബ്ലിക്കല്‍ ഹെര്‍ണിയ എന്നുമാണ് പറയുന്നത്. വയറിന്റെ താഴ്ഭാഗത്തു കാണുന്ന ഹെര്‍ണിയയെ ഇന്‍ഗ്വിനല്‍ ഹെര്‍ണിയ, ഫെമൊറല്‍ ഹെര്‍ണിയ എന്നിങ്ങനെയാണ് പറയുന്നത്. നെഞ്ച്, തലയോട്ടിയുടെ താഴ്ഭാഗങ്ങള്‍ എന്നിവിടങ്ങളിലും ഹെര്‍ണിയ ഉണ്ടാകാറുണ്ട്. 

വീക്കമോ വേദനയോ പ്രത്യക്ഷപ്പെടുന്നതിന് മുന്‍പു തന്നെ ഹെർണിയ ശരീരത്തിൽ അടിഞ്ഞുകൂടുന്നു. എന്നാൽ, വേദനയോ വീക്കമോ കാണപ്പെടുമ്പോൾ മാത്രമാണ് നമ്മൾ ഹെർണിയയെ ശ്രദ്ധിച്ചു തുടങ്ങുന്നത്. മിക്കപ്പോഴും വളരെ പതിയെയാണ് ഹെർണിയ രൂപം കൊള്ളുന്നത്. ഏതെങ്കിലും തരത്തിലുള്ള വേദനയോ വീക്കമോ പ്രത്യക്ഷപ്പെടുന്നതിനു മുന്‍പു തന്നെ ഹെർണിയ ശരീരത്തിൽ രൂപം കൊള്ളുന്നുണ്ട്.

എന്നാൽ മിക്കവരും കരുതുന്നത് പെട്ടെന്ന് ഭാരം ഉയര്‍ത്തിയത് കൊണ്ടാണ് ഹെർണിയ വന്നതെന്നാണ്. തെറ്റായ രീതിയിലുള്ള ശ്വസനം, വിട്ടുമാറാത്ത ചുമ, ദഹനവ്യവസ്ഥയ്ക്ക് വരുന്ന അമിതഭാരം, തീരെ വ്യായാമമില്ലാത്ത ജീവിതശൈലി എന്നിവയെല്ലാം ഹെർണിയയ്ക്ക് കാരണമാകാറുണ്ട്. അതുകൊണ്ടുതന്നെ ശരിയായ വ്യായാമം, കൃത്യമായ ഭക്ഷണരീതി എന്നിവയെല്ലാം ഹെർണിയയെ അകറ്റിനിർത്താൻ സഹായിക്കും.

ഹെർണിയയ്ക്ക് കാരണമാകുന്ന ശീലങ്ങൾ

ഒരു സുപ്രഭാതത്തിൽ പെട്ടെന്ന് പിടികൂടുന്ന അസുഖമല്ല ഹെർണിയ. ജീവിതശൈലി കൊണ്ടും ഭക്ഷണരീതി കൊണ്ടുമൊക്കെ പതിയെ പതിയെ എത്തിച്ചേരുന്ന അസുഖമാണിത്. അതുകൊണ്ടു തന്നെ ചില കാര്യങ്ങൾ ശ്രദ്ധിച്ചാൽ വയറിലെ പേശികളെ സംരക്ഷിക്കാനും മൊത്തത്തിലുള്ള ആരോഗ്യം മെച്ചപ്പെടുത്താനും ഹെർണിയ ഉണ്ടാകാനുള്ള സാധ്യത കുറയ്ക്കുകയും ചെയ്യും.

തെറ്റായ രീതിയിലുള്ള ഇരിപ്പും നിൽപ്പും

തെറ്റായ രീതിയിലുള്ള ഇരിപ്പ് ഹെർണിയയ്ക്ക് കാരണമാകും. കുനിഞ്ഞിരിക്കുകയോ ലോവർ ബാക്ക് വളഞ്ഞിരിക്കുന്ന അവസ്ഥയിലോ ആണെങ്കിൽ വയറിൽ കൂടുതൽ സമ്മർദ്ദം ചെലുത്തുന്നതിന് അത് കാരണമാകും. ഇത്തരത്തിൽ ദീർഘകാലം തെറ്റായ രീതിയിൽ ഇരിക്കുന്നത് ശരീരത്തിന്റെ പ്രധാനപ്പെട്ട പേശികളെ ദുർബലമാക്കും. ആന്തരിക അവയവങ്ങളെ പിന്തുണയ്ക്കാനുള്ള കഴിവിനെ ഇത് ദുർബലപ്പെടുത്തുകയും ഹെർണിയയ്ക്ക് കാരണമാകുകയും ചെയ്യും.

വിട്ടുമാറാത്ത മലബന്ധം

വിട്ടുമാറാത്ത മലബന്ധവും വയറിൽ നിന്ന് പോകുന്നതിനു വേണ്ടി അമിതമായി ആയാസം എടുക്കുന്നതും ഹെർണിയയ്ക്ക് കാരണമാകും. കാരണം മലവിസർജ്ജനം നടത്തുമ്പോൾ വലിയ സമ്മർദ്ദം ഉപയോഗിക്കുന്നത് ഈ പേശികൾക്ക് വളരെയധികം ജോലിഭാരത്തിന് കാരണമാകുന്നു. ഇത്തരത്തിൽ നിരന്തരം വലിയ ആയാസം എടുക്കുന്നത് പേശി നാരുകളെ ദുർബലപ്പെടുത്തുകയും ഹെർണിയ ഉണ്ടാകാനുള്ള സാധ്യത വർധിപ്പിക്കുകയും ചെയ്യുന്നു.

വ്യായാമം ഇല്ലാത്തത്

വ്യായാമം ജീവിതശൈലിയിൽ നിന്ന് ഒഴിവാക്കുന്നതും ഹെർണിയയ്ക്ക് കാരണമാകും. ആവശ്യത്തിനുള്ള വ്യായാമം ഇല്ലെങ്കിൽ പേശികൾ ദുർബലമാകും. ദുർബലമായ പേശികൾ ആണെങ്കിൽ പലപ്പോഴും സാധനങ്ങൾ ഉയർത്തുന്നതു പോലെയുള്ള ചെറിയ ജോലികൾ പോലും ചെയ്യാൻ ബുദ്ധിമുട്ട് ആയിരിക്കും. ഇത്തരത്തിൽ വ്യായാമം ഇല്ലാതെ ആയാസകരമായ ജോലികൾ ചെയ്യുന്നതും ഹെർണിയയ്ക്ക് കാരണമാകും.

ഭാരമുള്ള വസ്തുക്കൾ തെറ്റായ രീതിയിൽ ഉയർത്തുന്നത്

ഭാരമുള്ള വസ്തുക്കൾ തെറ്റായ രീതിയിൽ ഉയർത്തുന്നതും അടിവയറിലെ ഭിത്തികളെ മോശമായി ബാധിക്കും. മിതമായ ഭാരമാണ് സ്ഥിരമായി ഉയർത്തുന്നതെങ്കിലും അത് ശരിയായ രീതിയിൽ ചെയ്യുന്നില്ല എങ്കിൽ ആരോഗ്യത്തെ ദോഷമായി ബാധിക്കും.

വിട്ടുമാറാത്ത ചുമ, തുമ്മൽ 

പുകവലി, അലർജി എന്നിവ മൂലം വിട്ടുമാറാത്ത ചുമ അല്ലെങ്കിൽ തുമ്മൽ ഉണ്ടാകുന്നത് വയറിലെ മർദ്ദം വർദ്ധിക്കുന്നതിന് കാരണമാകുന്നു. എപ്പോഴും മുന്നോട്ടും പിന്നോട്ടുമുള്ള ഈ ചലനം വയറിലെ ഭിത്തിയെ ദുർബലപ്പെടുത്തുകയും അത് ഹെർണിയയ്ക്ക് കാരണമാകുകയും ചെയ്യുന്നു.

വയറിലെ അധികഭാരം 

വയറിൽ അമിതമായി കൊഴുപ്പ് അടിയുന്നത് വയറിലെ പേശികളിൽ തുടർച്ചയായ സമ്മർദ്ദം ചെലുത്തുന്നു. ഇത്തരത്തിൽ തുടർച്ചയായി ഉണ്ടാകുന്ന പിരിമുറുക്കം പേശിപാളികൾ വലിച്ചു നീട്ടപ്പെടാനും ദുർബലമാകാനും കാരണമാകുന്നു. ഇത്തരത്തിൽ പേശികളിൽ വലിയുന്നത് അവയവങ്ങൾ യഥാസ്ഥാനത്ത് നിലനിർത്താൻ തടസ്സം സൃഷ്ടിക്കുന്നു.

ഭാരം ഉയർത്തുമ്പോൾ ശ്വാസം പിടിക്കുന്നത്

അറിഞ്ഞോ അറിയാതെയോ പലരും ഭാരം ഉയർത്തുമ്പോൾ ശ്വാസം പിടിക്കാറുണ്ട്. ചിലർ വ്യായാമം ചെയ്യുമ്പോഴും കൂടുതൽ ആയാസകരമായ പ്രവർത്തനങ്ങളിൽ ഏർപ്പെടുമ്പോഴും ശ്വാസം പിടിച്ചു വെക്കാറുണ്ട്. ഇത് പലപ്പോഴും വയറിനുള്ളിൽ മർദ്ദം വർദ്ധിപ്പിക്കുന്നതിന് കാരണമാകുകയും വയറിലെ പേശികളിൽ പിരിമുറുക്കം സൃഷ്ടിക്കുകയും ചെയ്യുന്നു.