‘ചർമം വല്ലാതെ വരണ്ടതാണെങ്കിൽ രാത്രി മാത്രം ഫെയ്സ് ‌വാഷ്’; ഫെയ്സ് വാഷ് തിരഞ്ഞെടുക്കുമ്പോൾ ശ്രദ്ധിക്കേണ്ട കാര്യങ്ങള്‍

ചർമം നേരിടേണ്ട വെല്ലുവിളികൾ ഓരോ ദിവസവും കൂടുകയാണ്. മലിനീകരണം, മാസ്ക്കിന്റെ ഉപയോഗം, സ്ക്രീൻ സമയം കൂടുന്നത് എന്നിങ്ങനെ പലതും ചര്‍മത്തെ ബാധിക്കുന്നുണ്ട്. ചര്‍മത്തില്‍ ചുളിവുകൾ വീഴാനും ഉന്മേഷം നഷ്ടപ്പെടാനും ഇതെല്ലാം കാരണമാകുന്നു. വീട്ടിൽത്തന്നെ ചർമം നന്നായി കഴുകി വൃത്തിയാക്കിയാല്‍ ഒരു പരിധിവരെ ഈ പ്രശ്നങ്ങള്‍ പരിഹരിക്കാം. ഫെയ്സ് വാഷ് തിരഞ്ഞെടുക്കുമ്പോൾ ശ്രദ്ധിക്കേണ്ട കാര്യങ്ങള്‍. 

∙ പൊടിയും അഴുക്കും നീക്കി മുഖം വൃത്തിയാക്കാൻ സോപ്പ് അല്ല ഫെയ്സ് വാഷ് ആണ് ഉപയോഗിക്കേണ്ടത്. ഫോം, ജെൽ, ക്രീം എന്നിങ്ങനെ മൂന്നു തരത്തിൽ ഫെയ്സ് വാഷ് ലഭിക്കും.

∙ എണ്ണമയമുള്ള ചർമക്കാർക്ക് ഫോം രൂപത്തിലുള്ള ഫെയ്സ് വാഷും കോംബിനേഷൻ ചർമമുള്ളവർക്കു ജെൽ രൂപത്തിലുള്ളവയും വരണ്ട ചർമമുള്ളവർക്ക് ക്രീമി ഫെയ്സ്‌വാഷുമാണ് പൊതുവേ ഇണങ്ങുക. എന്നിരുന്നാലും ഓരോരുത്തരുടെയും ചർമപ്രശ്നങ്ങൾ അനുസരിച്ചു മാറ്റം വരാം.

∙ ആക്ടീവ് ഇൻഗ്രീഡിയന്റ്സ് അടങ്ങിയ ഫെയ്സ് വാഷുകളുമുണ്ട്. അ തിൽ എഎച്ച്എ, ബിഎച്ച്എ അടങ്ങിയവ എണ്ണമയമുള്ള ചർമക്കാർക്കും കോംബിനേഷൻ ചർമക്കാർക്കുമാണു കൂടുതൽ ഇണങ്ങുക. വരണ്ട ചർമമുള്ളവർ എഎച്ച്എ, ബിഎച്ച്എ അടങ്ങിയ ഫെയ്സ്‌വാഷ് ഉപയോഗിക്കാത്തതാണ് നല്ലത്.

∙ സെറമൈഡ്സ്, ഗ്ലിസറിൻ, ഹയലറൂണിക് ആസിഡ് എന്നിവയടങ്ങിയ ഫെയ്സ്‌വാഷുകൾ വരണ്ട ചർമക്കാർക്കു യോജിച്ചതാണ്. 

∙ ദിവസം രണ്ടു തവണ ഫെയ്സ് വാഷ് ഉപയോഗിച്ചു മുഖം കഴുകണം. അമിതമായ എണ്ണമയം അലട്ടുന്നുവെങ്കിൽ വൈകുന്നേരം ഒരു തവണ കൂടി മുഖം കഴുകാം. വീര്യം കുറഞ്ഞ ഫെയ്സ് വാഷ് ഉപയോഗിക്കാനും ഓർക്കുക.

∙ ചർമം വല്ലാതെ വരണ്ടതാണെങ്കിൽ രാത്രി മാത്രം ഫെയ്സ് വാഷ് ഉപയോഗിക്കുക. രാവിലെ വെള്ളം മാത്രമുപയോഗിച്ചു മുഖം കഴുകി വൃത്തിയാക്കുക.