സ്ഥിരമായി മുഖക്കുരു പൊട്ടിക്കുന്ന സ്വഭാവമുണ്ടോ? എങ്കിൽ ഇക്കാര്യങ്ങൾ ശ്രദ്ധിച്ചോളൂ...

മുഖക്കുരു പോലെത്തന്നെ മുഖത്തുണ്ടാകുന്ന കറുത്ത പാടുകളും സൗന്ദര്യം കെടുത്തുന്നവയാണ്. ചിലർ മുഖക്കുരു സ്ഥിരമായി പൊട്ടിച്ച് കളയാറുണ്ട്. മറ്റു ചിലർ തുണിയോ മറ്റോ കൊണ്ട് അമർത്തി തുടയ്ക്കുന്ന പതിവുണ്ട്. ഇങ്ങനെ ചെയ്യുന്നത് മൂലം മുഖത്തുണ്ടാകുന്ന പ്രശ്നങ്ങൾ അറിയാം. 

ചർമ അണുബാധ

മുഖക്കുരു പൊട്ടിക്കുന്നത് ചർമ അണുബാധ ഉണ്ടാകാൻ കാരണമാകും. മുഖക്കുരു അമർത്തുമ്പോൾ, കൈകളിലും നഖങ്ങളിലും ഉള്ള ബാക്ടീരിയകൾ ചർമ്മത്തിലേക്ക് പോകുകയും മറ്റ് പല പ്രശ്നങ്ങൾ ഉണ്ടാക്കുകയും ചെയ്യുന്നു. ഇത് ചർമത്തിൽ അണുബാധയ്ക്ക് കാരണമാകും.

കൂടുതൽ കുരുക്കൾ

ഒരു മുഖക്കുരു പൊട്ടിക്കുന്നത് വീണ്ടും മുഖക്കുരു വരാൻ കാരണമാകും. മുഖക്കുരു അമർത്തുന്നത് ചുറ്റുമുള്ള ചർമത്തിന് കേടുപാടുകൾ വരുത്തും. തൂവാലയുടെ സഹായത്തോടെ മുഖക്കുരു പൊട്ടിക്കുമ്പോൾ, ബാക്ടീരിയയും അണുബാധയും ചുറ്റുമുള്ള ചർമ സുഷിരങ്ങളിലേക്ക് വ്യാപിക്കുന്നതിനാൽ പുതിയ മുഖക്കുരു പെട്ടെന്ന് രൂപം കൊള്ളുന്നു. 

ഒന്നാമത് മുഖക്കുരു പൊട്ടിക്കാൻ പാടില്ല, പക്ഷെ പൊട്ടിച്ചെന്ന് കരുതുക, എന്നാൽ അതിന്റെ പഴുപ്പ് പൂർണമായും തുടച്ച് കളയാൻ ശ്രദ്ധിക്കണം. കാരണം അത് മറ്റു ഭാഗങ്ങളിലേക്ക് വീഴുന്നത് പലപ്പോഴും മുഖക്കുരു പടരാനുള്ള സാധ്യത വർധിപ്പിക്കുന്നു.

പഴുപ്പ് പോകില്ല 

മുഖക്കുരു പൊട്ടിച്ചു കളയുന്നതാണ് നല്ലതെന്ന് ചിന്തിക്കുന്ന നിരവധി പേരുണ്ട്. എന്നാൽ ഇങ്ങനെ ചെയ്യുമ്പോൾ മുഖക്കുരുവിന്റെ ഉള്ളിലുള്ള മുഴുവൻ പഴുപ്പും പുറത്തേക്ക് വരില്ല. കുറച്ച് പഴുപ്പെങ്കിലും മുറിവിൽ അവശേഷിക്കുന്നത് വീണ്ടും കൂടുതൽ വേദന വരുത്തുകയും അതേ ഭാഗത്ത് തന്നെ കൂടുതൽ വലിയ മുഖക്കുരു ഉണ്ടാക്കുന്നതിന് കാരണമായിത്തീരുകയും ചെയ്യും.