പാരന്പര്യവും പ്രോസ്‌റ്റേറ്റ് കാൻസറും: സ്തന, അണ്ഡാശയ, പ്രോസ്‌റ്റേറ്റ് കാൻസറുകളുടെ കുടുംബചരിത്രം പുരുഷന്മാർക്ക് ഭീഷണി ? Prostate Cancer Risk: The Unseen Familial Link

സെപ്റ്റംബർ മാസം ലോകമെന്പാടും 'പ്രോസ്‌റ്റേറ്റ് കാൻസർ ബോധവൽക്കരണ മാസ'മായി ആചരിക്കുകയാണ്. പുരുഷന്മാരിൽ ഏറ്റവും കൂടുതലായി കണ്ടുവരുന്ന കാൻസറുകളിൽ ഒന്നാണ് പ്രോസ്‌റ്റേറ്റ് കാൻസർ. എന്നാൽ തുടക്കത്തിൽ തന്നെ തിരിച്ചറിഞ്ഞാൽ പൂർണ്ണമായി മാറ്റിയെടുക്കാൻ സാധിക്കുന്ന ഒന്നുകൂടിയാണിത്. പ്രോസ്‌റ്റേറ്റ് കാൻസറിനെക്കുറിച്ചുള്ള ചർച്ചകളിൽ പലപ്പോഴും ഒഴിവാക്കപ്പെടുന്ന ഒന്നാണ് അതിന്റെ പാരന്പര്യ പശ്ചാത്തലം. പലരും കരുതുന്നത് പ്രോസ്‌റ്റേറ്റ് കാൻസർ പുരുഷന്മാരുടെ മാത്രം രോഗമായതിനാൽ അത് അച്ഛനിൽ നിന്നോ മറ്റ് പുരുഷന്മാരിൽ നിന്നോ മാത്രമേ പാരന്പര്യമായി വരൂ എന്നാണ്. എന്നാൽ ഒരു കുടുംബത്തിൽ അമ്മയ്ക്കോ പെങ്ങൾക്കോ ഉള്ള സ്തന, അണ്ഡാശയ കാൻസറുകൾ പോലും ഒരു പുരുഷന് പ്രോസ്‌റ്റേറ്റ് കാൻസർ വരാനുള്ള സാധ്യത വർധിപ്പിക്കും എന്നത് കൂടി അറിഞ്ഞിരിക്കണം.

ജനിതക ബന്ധവും ജീനുകളുടെ പങ്കും

നമ്മുടെ ശരീരത്തിലെ കോശങ്ങളുടെ വളർച്ചയെ നിയന്ത്രിക്കുന്നത് ജീനുകളാണ്. ഇതിൽ പ്രധാനപ്പെട്ട ഒന്നാണ് ബിആർസിഎ1, ബിആർസിഎ2 ജീനുകൾ. സാധാരണയായി ഡിഎൻഎ തകരാറുകൾ പരിഹരിക്കാനും കാൻസർ കോശങ്ങൾ ഉണ്ടാകാതിരിക്കാനും സഹായിക്കുന്നവയാണ് ഇവ. എന്നാൽ ഈ ജീനുകളിൽ മാറ്റങ്ങൾ (മ്യൂട്ടേഷൻ) സംഭവിക്കുന്പോൾ അവയുടെ പ്രവർത്തനം തടസ്സപ്പെടുകയും കാൻസർ വരാനുള്ള സാധ്യത കൂടുകയും ചെയ്യുന്നു.

ബിആർസിഎ2 ജീൻ തകരാറുകൾ: ഒരു പുരുഷനിൽ ബിആർസിഎ2 ജീനിൽ മാറ്റങ്ങൾ ഉണ്ടെങ്കിൽ, അയാൾക്ക് പ്രോസ്‌റ്റേറ്റ് കാൻസർ വരാനുള്ള സാധ്യത മറ്റുള്ളവരെ അപേക്ഷിച്ച് 2 മുതൽ 6 ഇരട്ടി വരെ കൂടുതലാണ്. കൂടാതെ ഇത്തരം കാൻസറുകൾ കൂടുതൽ ആക്രമണകാരിയും വേഗത്തിൽ പടരുന്നതുമായിരിക്കാം.

ബിആർസിഎ1 ജീൻ തകരാറുകൾ: ബിആർസിഎ1 ജീനിലെ മാറ്റങ്ങളും പ്രോസ്‌റ്റേറ്റ് കാൻസർ സാധ്യത വർധിപ്പിക്കുന്നുണ്ട്.

ലിഞ്ച് സിൻഡ്രം: കുടുംബത്തിൽ വൻകുടലിലെ (കൊളോറെക്ടൽ) കാൻസർ പാരമ്പര്യമുള്ളവരിലും പ്രോസ്‌റ്റേറ്റ് കാൻസർ സാധ്യത കൂടുതലായി കണ്ടുവരുന്നു.

കുടുംബ ചരിത്രം എത്രത്തോളം പ്രധാനമാണ്?

ഒരു പുരുഷന് പ്രോസ്‌റ്റേറ്റ് കാൻസർ വരാനുള്ള സാധ്യത താഴെ പറയുന്ന സാഹചര്യങ്ങളിൽ വളരെ കൂടുതലാണ്:

∙ രക്തബന്ധമുള്ള പുരുഷന്മാരുടെ രോഗചരിത്രം: അച്ഛൻ, സഹോദരൻ പോലുള്ള അടുത്ത ബന്ധുക്കൾക്ക് പ്രോസ്‌റ്റേറ്റ് കാൻസർ വന്നിട്ടുണ്ടെങ്കിൽ (പ്രത്യേകിച്ച് 60 വയസ്സിന് മുൻപ്).

∙ സ്ത്രീകളുടെ രോഗചരിത്രം: അമ്മ, സഹോദരി, അല്ലെങ്കിൽ മുത്തശ്ശി എന്നിവർക്ക് ചെറിയ പ്രായത്തിൽ തന്നെ സ്തന കാൻസറോ അണ്ഡാശയ കാൻസറോ വന്നിട്ടുണ്ടെങ്കിൽ.

മൾട്ടിപ്പിൾ കാൻസർ ചരിത്രം: കുടുംബത്തിൽ ഒന്നിലധികം ആളുകൾക്ക് വിവിധ തരം കാൻസറുകൾ വന്നിട്ടുള്ള പശ്ചാത്തലം.

പെൺമക്കൾക്ക് മാത്രമാണ് സ്തന-അണ്ഡാശയ കാൻസറുകളുടെ ജീൻ പാരന്പര്യമായി കിട്ടുന്നത് എന്നത് തെറ്റായ ധാരണയാണ്. ആൺമക്കൾക്കും ഈ ജീനുകൾ അമ്മമാരിൽ നിന്നോ അച്ഛന്മാരിൽ നിന്നോ ലഭിക്കാം.

മുൻകരുതലുകളും നിർദ്ദേശങ്ങളും

കുടുംബത്തിൽ മേൽപ്പറഞ്ഞ രീതിയിലുള്ള രോഗചരിത്രമുണ്ടെങ്കിൽ പുരുഷന്മാർ താഴെ പറയുന്ന കാര്യങ്ങളിൽ ശ്രദ്ധ പുലർത്തേണ്ടതാണ്: നേരത്തെയുള്ള പരിശോധന: സാധാരണയായി 50 വയസ്സിന് ശേഷമാണ് പ്രോസ്‌റ്റേറ്റ് പരിശോധന നിർദ്ദേശിക്കാറുള്ളതെങ്കിൽ, കുടുംബ ചരിത്രമുള്ളവർ 40-45 വയസ്സു മുതൽ തന്നെ ഡോക്ടറുടെ നിർദ്ദേശപ്രകാരം പരിശോധനകൾ നടത്തണം. പിഎസ്എ (പ്രോസ്‌റ്റേറ്റ്-സ്പെസിഫിക് ആന്റിജൻ) ബ്ലഡ് ടെസ്റ്റ്, ഡിആർഇ (ഡിജിറ്റൽ റെക്ടൽ എക്സാമിനേഷൻ) എന്നിവയാണ് ഇതിനായി ഉപയോഗിക്കുന്നത്.

ജനിതക കൗൺസലിങ്: കുടുംബത്തിൽ കാൻസർ പാരമ്പര്യമുള്ളവർ ഒരു ജനിതക വിദഗ്ധനെ കാണുന്നതും ജീൻ ടെസ്റ്റുകൾ നടത്തുന്നതും രോഗസാധ്യത മുൻകൂട്ടി അറിയാൻ സഹായിക്കും.

ലക്ഷണങ്ങൾ അവഗണിക്കരുത്: മൂത്രമൊഴിക്കാൻ തടസ്സം, മൂത്രത്തിൽ രക്തത്തിന്റെ അംശം, അടിവയറ്റിലോ ഇടുപ്പിലോ വേദന തുടങ്ങിയവ കണ്ടാൽ ഉടൻ ഡോക്ടറെ കാണുക.

രോഗ സാധ്യതകളെക്കുറിച്ചുള്ള കൃത്യമായ അറിവാണ് ഏതൊരു രോഗത്തെയും പ്രതിരോധിക്കാനുള്ള ഏറ്റവും വലിയ ആയുധം. സെപ്റ്റംബർ പ്രോസ്‌റ്റേറ്റ് കാൻസർ ബോധവൽക്കരണ മാസമായി ആചരിക്കുന്പോൾ നാം ഓർക്കേണ്ടത് നമ്മുടെ കുടുംബത്തിന്റെ ആരോഗ്യ ചരിത്രത്തെക്കുറിച്ച് കൃത്യമായ ധാരണ ഉണ്ടായിരിക്കേണ്ടതിന്റെ ആവശ്യകതയാണ്. കുടുംബത്തിൽ അമ്മയ്ക്കോ പെങ്ങൾക്കോ വന്ന സ്തന/അണ്ഡാശയ കാൻസറുകൾ പോലുമുള്ള ചരിത്രം സ്വന്തം ആരോഗ്യത്തെയും ബാധിക്കാം എന്ന തിരിച്ചറിവ് ഓരോ പുരുഷനും ഉണ്ടാകണം. ഭയപ്പെടുകയല്ല, മറിച്ച് കൃത്യമായ ഇടവേളകളിൽ പരിശോധനകൾ നടത്തി ആരോഗ്യം സംരക്ഷിക്കുകയാണ് വേണ്ടത്. രോഗം വരാതിരിക്കാനും, വന്നാൽ തന്നെ തുടക്കത്തിലെ കണ്ടുപിടിച്ച് ചികിത്സിക്കാനും ബോധവൽക്കരണത്തിലൂടെ നമുക്ക് സാധിക്കട്ടെ.