“അവർ മറക്കുകയാണ്… നമ്മൾ അത് ശ്രദ്ധിക്കുന്നുണ്ടോ?”
“പ്രായമായതല്ലേ…” എന്ന് പറഞ്ഞ് നമ്മൾ അവഗണിക്കുന്ന ചില മറവികൾ…തലച്ചോർ നൽകുന്ന ആദ്യ മുന്നറിയിപ്പായിരിക്കാം!
അൽഷിമേഴ്സിന്റെ ( Alzheimer's) ലക്ഷണങ്ങൾ നമ്മൾ നേരത്തെ മനസ്സിലാക്കിയാൽ… കൂടുതൽ ചെയ്യാൻ കഴിയും.
***
“അച്ഛൻ ഇന്നലെ പറഞ്ഞ കാര്യം… ഇന്ന് വീണ്ടും ചോദിച്ചു!”
“അമ്മേ, ഈ സാധനം എവിടെയാണ് വച്ചത്?”
“ഇന്നലെ നമ്മൾ എവിടെയാണ് പോയത്?”
ആദ്യമൊക്കെ നമ്മൾ ചിരിച്ചുതള്ളും…
“പ്രായമായതല്ലേ… കുറച്ച് മറവി ഉണ്ടാകും!”
പക്ഷേ പതിയെ…
- മറവി കൂടുന്നു.
- പരിചിതമായ കാര്യങ്ങൾ ചെയ്യാൻ ബുദ്ധിമുട്ടുന്നു.
- വാക്കുകൾ കിട്ടാതെ വരുന്നു.
- പരിചിതമായ സ്ഥലങ്ങളിൽ പോലും വഴി തെറ്റുന്നു.
നമ്മളെ നടക്കാൻ പഠിപ്പിച്ച മാതാപിതാക്കൾ…
ഒരിക്കൽ നമ്മളോട് ഒരേ ചോദ്യം വീണ്ടും വീണ്ടും ചോദിക്കാൻ തുടങ്ങുമ്പോൾ—
നമ്മൾ അത് വെറും “പ്രായത്തിന്റെ മറവി” എന്ന് പറഞ്ഞ് തള്ളിക്കളയരുത്.
അപ്പോൾ നമ്മൾ അറിയണം:
മറവി… എപ്പോൾ സാധാരണം? എപ്പോൾ അപകടസൂചന?”
2026 സെപ്റ്റംബർ 21 — ലോക അൽഷിമേഴ്സ് ദിനം
ഈ വർഷത്തെ സന്ദേശം:
“നേരത്തെ അറിയുമ്പോൾ… കൂടുതൽ ചെയ്യാൻ കഴിയും.”
(The Earlier You Know, The More You Can Do.)
" മറവി കൂടുന്നത് വരെ കാത്തിരിക്കേണ്ടതില്ല…
മാറ്റം ശ്രദ്ധയിൽപ്പെട്ടാൽ തന്നെ വിലയിരുത്തുക.”
“അൽഷിമേഴ്സ് തുടങ്ങുന്നത് മറവി കാണുന്ന ദിവസമല്ല!”
അൽഷിമേഴ്സ് രോഗത്തിൽ തലച്ചോറിലെ ചില രോഗപ്രക്രിയകൾ ലക്ഷണങ്ങൾ വ്യക്തമായി പ്രകടമാകുന്നതിന് വർഷങ്ങൾക്കുമുമ്പ് തന്നെ ആരംഭിച്ചേക്കാം.
“അമിലോയ്ഡ് പ്ലാക്ക്സ് (Amyloid plaques) എന്ന പ്രോട്ടീൻ നിക്ഷേപങ്ങളും ടൗ ടാംഗിൾസ് (Tau tangles) എന്ന അസാധാരണമായ ടൗ പ്രോട്ടീൻ കെട്ടിച്ചേരലുകളും നാഡീകോശങ്ങളുടെ പ്രവർത്തനത്തെയും അവ തമ്മിലുള്ള ബന്ധങ്ങളെയും ബാധിച്ചേക്കാം.
ഒരു സ്കാനോ (scan) ഒരു രക്തപരിശോധനയോ (blood test) മാത്രം നോക്കി അൽഷിമേഴ്സ് രോഗം (Alzheimer’s) എന്ന് തീരുമാനിക്കാനാവില്ല.
രോഗലക്ഷണങ്ങൾ, ബോധശേഷി വിലയിരുത്തൽ (cognitive assessment), MRI/PET, CSF ബയോമാർക്കറുകൾ (CSF biomarkers), കൂടാതെ വികസിച്ചുകൊണ്ടിരിക്കുന്ന രക്താധിഷ്ഠിത ബയോമാർക്കറുകൾ (blood-based biomarkers) എന്നിവ രോഗനിർണയ പ്രക്രിയയിൽ സഹായിക്കുന്നു.
അൽഷിമേഴ്സിന്റെ 7 മുന്നറിയിപ്പുകൾ
1. അടുത്തിടെ നടന്ന കാര്യങ്ങൾ ആവർത്തിച്ച് മറക്കുന്നു
2. ഒരേ ചോദ്യം വീണ്ടും വീണ്ടും ചോദിക്കുന്നു
3. പരിചിതമായ കാര്യങ്ങൾ ചെയ്യാൻ ബുദ്ധിമുട്ടുന്നു
4. പണം/മരുന്ന്/ബില്ലുകൾ കൈകാര്യം ചെയ്യാൻ ബുദ്ധിമുട്ടുന്നു
5. വാക്കുകൾ കണ്ടെത്താൻ ബുദ്ധിമുട്ടുന്നു
6. പരിചിതമായ സ്ഥലങ്ങളിൽ പോലും വഴി തെറ്റുന്നു
7. തീരുമാനമെടുക്കുന്നതിലും ചിന്തിക്കുന്നതിലും വ്യക്തമായ മാറ്റം
ഇവയിൽ ചിലത് ദൈനംദിന ജീവിതത്തെ ബാധിക്കുന്ന രീതിയിൽ തുടരുകയാണെങ്കിൽ വിലയിരുത്തൽ വൈകിക്കരുത്.
“മറവിയെക്കുറിച്ചുള്ള ഈ തെറ്റിദ്ധാരണകൾ മാറ്റാം!”
തെറ്റിദ്ധാരണ 1: “മറവി ഉണ്ടെങ്കിൽ അൽഷിമേഴ്സ് തന്നെ.”
അല്ല.
ഉറക്കക്കുറവ്, വിഷാദം, ചില മരുന്നുകളുടെ ഉപയോഗം, തൈറോയ്ഡ് ഗ്രന്ഥിയുടെ പ്രവർത്തനത്തിലെ തകരാറുകൾ, ചില വിറ്റാമിനുകളുടെ കുറവ് തുടങ്ങിയ ചികിത്സിക്കാവുന്ന പല കാരണങ്ങളും ഓർമ്മശേഷിയെയും ചിന്താശേഷിയെയും ബാധിക്കാം.
തെറ്റിദ്ധാരണ 2: “പ്രായമായാൽ എല്ലാവർക്കും മറവിരോഗം വരും.”
അല്ല.
പ്രായം മറവിരോഗത്തിന്റെ പ്രധാന അപകടസാധ്യതാ ഘടകമാണെങ്കിലും, പ്രായമാകുന്നതിന്റെ അനിവാര്യമായ ഭാഗമല്ല മറവിരോഗം.
തെറ്റിദ്ധാരണ 3: “കുടുംബത്തിൽ അൽഷിമേഴ്സ് ഉണ്ടായിരുന്നെങ്കിൽ എനിക്കും തീർച്ചയായും വരും.”
അല്ല.
കുടുംബത്തിൽ അൽഷിമേഴ്സ് രോഗത്തിന്റെ ചരിത്രമുള്ളത് ചിലരിൽ രോഗസാധ്യത വർധിപ്പിക്കാം. എന്നാൽ അതുകൊണ്ട് രോഗം തീർച്ചയായും ഉണ്ടാകുമെന്ന് അർത്ഥമില്ല.
തെറ്റിദ്ധാരണ 4: “അൽഷിമേഴ്സ് വന്നാൽ പിന്നെ ഒന്നും ചെയ്യാനില്ല.”
ഇതും ശരിയല്ല.
പൂർണ്ണമായ രോഗമുക്തി നൽകുന്ന ചികിത്സ ഇപ്പോഴും ലഭ്യമല്ലെങ്കിലും, നേരത്തെ രോഗനിർണയം ലഭിക്കുന്നത് ലഭ്യമായ ചികിത്സകൾ പരിഗണിക്കാനും, ആരോഗ്യപരമായ അപകടസാധ്യതകൾ നിയന്ത്രിക്കാനും, ജീവിതത്തിൽ ആവശ്യമായ ക്രമീകരണങ്ങൾ നടത്താനും, കുടുംബത്തിന് ഭാവിയിലേക്ക് തയ്യാറെടുക്കാനും സഹായിക്കും.
“നേരത്തെ അറിയുന്നത് ഭയപ്പെടാനല്ല… കൂടുതൽ ചെയ്യാനാണ്!”
ഒരു രോഗനിർണയം എന്നത് ജീവിതത്തിന്റെ അവസാനമല്ല.
അത്…
- ചികിത്സയെക്കുറിച്ച് തീരുമാനിക്കാനുള്ള സമയം.
- ഭാവിക്കായി തയ്യാറെടുക്കാനുള്ള സമയം.
- കുടുംബത്തോട് തുറന്ന് സംസാരിക്കാനുള്ള സമയം.
- സാമ്പത്തികവും നിയമപരവുമായ കാര്യങ്ങൾ ആസൂത്രണം ചെയ്യാനുള്ള സമയം.
- രോഗിയുടെ സ്വാതന്ത്ര്യവും ജീവിതനിലവാരവും കഴിയുന്നത്ര സംരക്ഷിക്കാനുള്ള സമയം.
നേരത്തെ അറിയുമ്പോൾ…
നമുക്ക് ചെയ്യാൻ കഴിയുന്നതും കൂടുതലാകും.
സ്നേഹം മാത്രം മതിയാകില്ല… ശരിയായ പരിചരണവും ആവശ്യമാണ്..
അൽഷിമേഴ്സ് രോഗിയുടെ പരിചരണം മരുന്ന് നൽകുന്നതിൽ മാത്രം ഒതുങ്ങുന്നതല്ല.
ഓർമ്മക്കുറവ്, പെരുമാറ്റത്തിലെ മാറ്റങ്ങൾ, ഉറക്കപ്രശ്നങ്ങൾ, ആശയക്കുഴപ്പം, ഭക്ഷണം, മരുന്നുകൾ, സുരക്ഷ, ദൈനംദിന പ്രവർത്തനങ്ങൾ—ഇവയെല്ലാം ശ്രദ്ധിക്കേണ്ടതുണ്ട്.
കുടുംബം ഒറ്റയ്ക്ക് എല്ലാം ഏറ്റെടുക്കണമെന്നില്ല. ആവശ്യമായ ഘട്ടത്തിൽ ന്യൂറോ ഡോക്ടർ, മെമ്മറി/ജെറിയാട്രിക് വിദഗ്ധർ, സൈക്കോളജിസ്റ്റ്, ഫിസിയോതെറാപ്പിസ്റ്റ്, ഒക്കുപ്പേഷണൽ തെറാപ്പിസ്റ്റ്, സ്പീച്ച്-ലാംഗ്വേജ് വിദഗ്ധർ, നഴ്സിംഗ്-കെയർ ടീം എന്നിവരുടെ സഹായം പ്രധാനമാണ്.
വിദഗ്ധപരിചരണത്തിന്റെ ലക്ഷ്യം രോഗിയെ കുടുംബത്തിൽ നിന്ന് അകറ്റുക എന്നതല്ല.. കൂടുതൽ സുരക്ഷിതവും മാന്യവുമായ ജീവിതം ഉറപ്പാക്കുകയും കുടുംബത്തിന്റെ പരിചരണഭാരം കുറയ്ക്കുകയും ചെയ്യുക എന്നതാണ്.
അതുകൊണ്ട്, ഒരു കെയർ സെന്ററിലേക്ക് മാറ്റേണ്ടിവന്നാൽ അതിനെ “മക്കൾ ഉപേക്ഷിച്ചു” എന്ന് കാണേണ്ടതില്ല. ശരിയായ കെയർ സെന്റർ സുരക്ഷിതമായ അന്തരീക്ഷം, ക്രമമായ ദിനചര്യ, സാമൂഹിക ഇടപെടൽ, ശാരീരിക-മാനസിക പ്രവർത്തനങ്ങൾ, വിദഗ്ധ നിരീക്ഷണം എന്നിവ നൽകാൻ സഹായിക്കും.
അവരെ കെയർ സെന്ററിലേക്ക് കൊണ്ടുപോകുന്നത് സ്നേഹം കുറവായതുകൊണ്ടല്ല…
ചിലപ്പോൾ സ്നേഹത്തിന്റെ ഏറ്റവും സുരക്ഷിതമായ രൂപം ശരിയായ പരിചരണം ഉറപ്പാക്കുന്നതാണ്.
“രോഗനിർണയം ഒരു അവസാനമല്ല… തയ്യാറെടുപ്പിന്റെ തുടക്കമാണ്.
മറവിയെ “പ്രായമായതല്ലേ…” എന്ന് പറഞ്ഞ് അവഗണിക്കരുത്.
- നേരത്തെ തിരിച്ചറിയൂ.
- ശരിയായ വിലയിരുത്തൽ നടത്തൂ.
- കഴിയുന്നത്ര നേരത്തെ പ്രവർത്തിക്കൂ.
കാരണം ചില അവസരങ്ങൾ… കാത്തിരുന്നാൽ തിരികെ ലഭിക്കണമെന്നില്ല.
"ഒരിക്കൽ നമ്മളെ ഓർമ്മിപ്പിച്ച മാതാപിതാക്കളെ… ഇന്ന് നമ്മൾ ഓർമ്മിപ്പിക്കേണ്ട സമയമാണ്.
നേരത്തെ അറിയൂ… കൂടുതൽ ചെയ്യൂ."
എഴുത്ത്: Dr Arun Oommen, Neurosurgeon