മകൾ ഐശ്വര്യയ്ക്കെതിരെ സോഷ്യല് മീഡിയയില് നടക്കുന്ന വ്യക്തിഹത്യയ്ക്കെതിരെ രൂക്ഷമായ ഭാഷയില് പ്രതികരിച്ച് നടൻ അർജുൻ. അടിസ്ഥാനരഹിതവും അപകീർത്തികരവുമായ ആരോപണങ്ങൾ മകൾക്കെതിരെ ഉയർന്നുവരുമ്പോൾ ഒരു അച്ഛനെന്ന നിലയിൽ തനിക്ക് നിശ്ശബ്ദനായിരിക്കാൻ കഴിയില്ലെന്ന് അർജുൻ പറയുന്നു. ഇതിനെതിരെ കർശനമായ നിയമ നടപടികള് സ്വീകരിക്കുമെന്നും താരം വ്യക്തമാക്കി.
അർജുന് പങ്കുവച്ച കുറിപ്പ് വായിക്കാം;
‘‘ആദ്യമായി, മകൾ അഞ്ജനയുടെ വിവാഹത്തോടനുബന്ധിച്ച് അവൾക്കും ഞങ്ങളുടെ കുടുംബത്തിനും ആശംസകളേകിയ ഏവർക്കും ഹൃദയം നിറഞ്ഞ നന്ദി അറിയിക്കുന്നു. നിങ്ങളുടെ സ്നേഹവും കരുതലും എന്നും ഞങ്ങൾ ഏറെ വിലമതിക്കുന്ന ഒന്നാണ്; പ്രാർഥനകളിലും മനസ്സിലും ഞങ്ങളെ ചേർത്തുവെച്ച എല്ലാവരോടും എന്നും കടപ്പെട്ടിരിക്കുന്നു. എന്നിരുന്നാലും, ഇങ്ങനെയൊരു വിഷയത്തിൽ പരസ്യമായി പ്രതികരിക്കേണ്ടി വരുമെന്ന് ഞാൻ ഒരിക്കലും കരുതിയിരുന്നതല്ല.
എന്റെ ഇളയ മകളുടെ വിവാഹസമയത്ത്, മൂത്തമകൾ ഐശ്വര്യ അർജുന്റെ വ്യക്തിജീവിതത്തെക്കുറിച്ച് ഒട്ടേറെ ഊഹാപോഹങ്ങൾ പ്രചരിക്കുകയുണ്ടായി. അവളുടെ സ്വകാര്യതയെ പൂർണമായും മാനിച്ചുകൊണ്ട്, അവൾ മാത്രം പറയേണ്ട കാര്യങ്ങളിൽ ഇടപെടരുതെന്ന് ഞാൻ ബോധപൂർവം തീരുമാനിച്ചതായിരുന്നു. സ്വന്തം ഇഷ്ടാനുസരണം ജീവിക്കാനും സ്വതന്ത്രമായ തീരുമാനങ്ങളെടുക്കാനും ഏതൊരു സ്ത്രീക്കും അവകാശമുണ്ട്. താല്പര്യമുണ്ടെങ്കിൽ, ഉചിതമായ സമയത്ത് അവൾ തന്നെ അതിനെക്കുറിച്ച് സംസാരിച്ചുകൊള്ളും.
എന്നാൽ, എന്റെ മകളെയും അവളുടെ സ്വഭാവത്തെയും വ്യക്തിജീവിതത്തെയും കുറിച്ച് തികച്ചും അടിസ്ഥാനരഹിതവും അപകീർത്തികരവുമായ ആരോപണങ്ങൾ ഉയർന്നുവരുമ്പോൾ ഒരു അച്ഛനെന്ന നിലയിൽ എനിക്ക് നിശ്ശബ്ദനായിരിക്കാൻ കഴിയില്ല.
അഭിനേതാക്കൾ എന്ന നിലയിൽ, പൊതുജീവിതത്തിൽ പലതരത്തിലുള്ള നിരീക്ഷണങ്ങളും ഊഹാപോഹങ്ങളും സ്വാഭാവികമാണെന്ന് ഞങ്ങൾക്കറിയാം. എന്നാൽ, വെറും അഭ്യൂഹങ്ങളും മനഃപൂർവം പടച്ചുവിടുന്ന അടിസ്ഥാനരഹിതമായ ആരോപണങ്ങളും തമ്മിൽ വലിയ വ്യത്യാസമുണ്ട്. പൊതുശ്രദ്ധയിലുള്ളവരാണ് എന്നതുകൊണ്ട് ആർക്കും കഥകൾ മെനഞ്ഞെടുക്കാനോ വ്യക്തിഹത്യ നടത്താനോ ഉള്ള അവകാശമില്ല. യാതൊരു തെളിവുമില്ലാതെ, ഒരു സ്ത്രീയെ 'മദ്യപാനി' എന്ന് മുദ്രകുത്തുന്നതുൾപ്പെടെയുള്ള ഹീനമായ പരാമർശങ്ങൾ നടത്തുന്നത് അങ്ങേയറ്റം നിരുത്തരവാദപരവും ഒരു തരത്തിലും അംഗീകരിക്കാൻ കഴിയാത്തതുമാണ്.
മൗനമാണ് പലപ്പോഴും ഏറ്റവും മാന്യമായ മറുപടിയെന്നാണ് ഞങ്ങൾ എപ്പോഴും കരുതിയിരുന്നത്. എന്നാൽ ആ മൗനം കുറ്റസമ്മതമായി ആരും തെറ്റിദ്ധരിക്കരുത്; നുണകൾ വീണ്ടും വീണ്ടും പ്രചരിപ്പിക്കാനുള്ള അനുവാദവുമായി അതിനെ കാണരുത്. അതുകൊണ്ടുതന്നെ, ബന്ധപ്പെട്ട അധികാരികൾക്ക് ഔദ്യോഗികമായി പരാതി നൽകിക്കൊണ്ട് ഞങ്ങൾ ഇതിനെതിരെ ഉചിതമായ നിയമനടപടികൾ സ്വീകരിച്ചിട്ടുണ്ട്.
മാധ്യമപ്രവർത്തനത്തെ ഏറെ ബഹുമാനിക്കുന്ന വ്യക്തിയാണ് ഞാൻ. എന്നാൽ മാധ്യമരംഗത്തെ ചിലരെങ്കിലും സത്യത്തോടോ വിശ്വാസ്യതയോടോ തെല്ലും കൂറില്ലാതെ, വാർത്തകൾ വിറ്റഴിക്കാൻ വേണ്ടി മാത്രം അടിസ്ഥാനമില്ലാത്ത ആരോപണങ്ങളെയും വ്യക്തിപരമായ അധിക്ഷേപങ്ങളെയും പർവ്വതീകരിക്കുന്നത് നിർഭാഗ്യകരമാണ്.
ഇത് എന്റെ മകളുടെ മാത്രം കാര്യമല്ല. ആത്മാഭിമാനം ചോദ്യം ചെയ്യപ്പെടുകയും, വ്യക്തിപരമായ തെരഞ്ഞെടുപ്പുകൾ പരസ്യവിചാരണയ്ക്ക് ഇരയാവുകയും ചെയ്യുന്ന ഓരോ സ്ത്രീയുടെയും പ്രശ്നമാണിത്. കുടുംബത്തിന്റെ പിന്തുണയില്ലാത്ത സ്ത്രീകളെ സംബന്ധിച്ച് ഇത്തരം ആരോപണങ്ങൾ അവരുടെ ജീവിതം കൂടുതൽ ദുസ്സഹമാക്കും. ഒരു സ്ത്രീയും ഇത് ഒറ്റയ്ക്ക് നേരിടേണ്ടി വരരുത്, സ്വന്തം ജീവിതരീതിയെ മറ്റുള്ളവർക്ക് മുന്നിൽ ന്യായീകരിക്കേണ്ട അവസ്ഥയും അവർക്കുണ്ടാകരുത്.
ആത്മാഭിമാനത്തോടും സ്വാതന്ത്ര്യത്തോടും കൂടി ജീവിക്കാനുള്ള എന്റെ മകളുടെ അവകാശത്തിനൊപ്പം ഒരു അച്ഛനെന്ന നിലയിൽ ഞാൻ എപ്പോഴും ഉറച്ചുനിൽക്കും. ഉത്തരവാദപ്പെട്ടവർ ഇനിമുതൽ ഇത്തരം കാര്യങ്ങളിൽ ജാഗ്രത പുലർത്തുമെന്ന് ഞാൻ വിശ്വസിക്കുന്നു. അടിസ്ഥാനരഹിതവും അപകീർത്തികരവുമായ ഇത്തരം വ്യാജവാർത്തകൾ ഇനിയും പ്രചരിപ്പിക്കുകയോ പങ്കുവെക്കുകയോ ചെയ്താൽ കർശനമായ നിയമനടപടികൾ നേരിടേണ്ടി വരും.''
അര്ജുന്റെ ഇളയ മകൾ അഞ്ജനയുടെ വിവാഹത്തോടെയാണ് മൂത്ത മകളുടെ സ്വകാര്യ ജീവിതത്തെക്കുറിച്ചുള്ള ഗോസിപ്പുകള് ചർച്ചയായത്. ഐശ്വര്യയുടെ ഭർത്താവ് ഉമാപതിയെ വിവാഹാഘോഷവേളയിൽ കണ്ടിരുന്നില്ല. അർജുന്റെ കുടുംബ ഫോട്ടോയിലും ഉമാപതിയുടെ സാന്നിധ്യമില്ല. ഇതോടെ ഐശ്വര്യയും ഉമാപതിയും വേര്പിരിഞ്ഞു എന്നും, ഐശ്വര്യയുടെ മദ്യപാനമാണ് വിവാഹമോചനത്തിലേക്ക് നയിച്ചത് എന്നുമൊക്കെയുള്ള യൂട്യൂബ് ചാനല് ചര്ച്ചകള് സജീവമായി.
‘ഭാര്യയുടെ സഹോദരിയുടെ വിവാഹം എന്നത് വളരെ പ്രധാനപ്പെട്ടൊരു ചടങ്ങല്ലേ എന്നിട്ടും എന്തുകൊണ്ട് മൂത്ത മകളുടെ ഭർത്താവ് പങ്കെടുത്തില്ല’ എന്ന തരത്തിലുള്ളതായിരുന്നു ചര്ച്ചകള്. എന്നാൽ അത്തരം കമന്റുകളോട് അർജുന്റെ കുടുംബത്തിൽ നിന്ന് ആരും തന്നെ പ്രതികരിച്ചിട്ടില്ല. ദീർഘ നാളത്തെ പ്രണയത്തിന് ശേഷമാണ് ഐശ്വര്യയും ഉമാപതിയും 2024ൽ വിവാഹിതരായത്. നടൻ തമ്പി രാമയ്യയുടെ മകനാണ് നടനായ ഉമാപതി.