രുചികരമായ ചിക്കൻ മന്തി തയാറാക്കി വീട്ടുകാരെ ഒന്നു ഞെട്ടിച്ചാലോ? വീട്ടില്‍ എളുപ്പത്തില്‍ തയാറാക്കാവുന്ന കുക്കര്‍ റെസിപ്പി ഇതാ.
ചിക്കൻ മന്തി
1. യെല്ലോ ബസ്മതി അരി – ഒരു കിലോ
2. ചിക്കൻ – ഒരു കിലോ
3. കുരുമുളകുപൊടി – രണ്ടു വലിയ സ്പൂൺ
പെരുംജീരകംപൊടി – ഒരു വലിയ സ്പൂൺ
സൂപ്പ്ക്യൂബ് – രണ്ട്
ചുവന്ന ഫൂഡ് കളർ – ആവശ്യമെങ്കിൽ
തക്കാളി – ഒന്ന്, പൊടിയായി അരിഞ്ഞത്
ഉപ്പ് – ആവശ്യമെങ്കിൽ മാത്രം
4. എണ്ണ – 200 ഗ്രാം
5. വെള്ളം – പാകത്തിന്
6. കറുവാപ്പട്ട – രണ്ട്
ഗ്രാമ്പൂ – നാല്
ജീരകം – ഒരു ചെറിയ സ്പൂൺ
കുരുമുളക് – ഒരു ചെറിയ സ്പൂൺ
ഉപ്പ് – പാകത്തിന്
എണ്ണ – ഒരു വലിയ സ്പൂൺ
7. മഞ്ഞൾപ്പൊടി – ഒരു ചെറിയ സ്പൂൺ
പാൽ – ഒരു വലിയ സ്പൂൺ
8. പച്ചമുളക് – നാല്
പാകം ചെയ്യുന്ന വിധം
∙ അരി കഴുകി, ഒരു മണിക്കൂർ കുതിർത്ത ശേഷം ഊറ്റി മാറ്റി വയ്ക്കണം.
∙ ചിക്കൻ കഷണങ്ങളാക്കി മൂന്നാമത്തെ ചേരുവ പുരട്ടി കുക്കറിൽ നിരത്തുക. ഇതിനു മുകളിലേക്ക് എണ്ണയും ഒഴിച്ച ശേഷം 30 മിനിറ്റ് അനക്കാതെ മാറ്റി വയ്ക്കുക.
∙ അരി വേവിക്കാനുള്ള വെള്ളം തിളപ്പിച്ച് അതിലേക്ക് ആറാമത്തെ ചേരുവ ചേർത്തു തിളപ്പിക്കുക. തിളയ്ക്കുമ്പോൾ അരി ചേർത്തിളക്കി മുക്കാൽ വേവിൽ ഊറ്റി മാറ്റി വയ്ക്കുക.
∙ വേവിച്ച ചോറ് കുക്കറിൽ ഇരിക്കുന്ന ചിക്കനു മുകളിൽ നിരത്തണം.
∙ മഞ്ഞൾപ്പൊടി പാലില്‍ കലക്കിയതു ചോറിനു മുകളിൽ തളിച്ച ശേഷം പച്ചമുളകും മുകളിൽ കുത്തി വയ്ക്കുക.
∙ ഒരു ചെറിയ പാത്രത്തിൽ കനൽ വച്ച് അതിൽ എണ്ണയൊഴിച്ചു ചോറിനു മുകളിൽ വച്ച ശേഷം കുക്കർ അടച്ചു വെയ്റ്റ് വയ്ക്കണം.
∙ കുക്കര്‍ നല്ല തീയിൽ വച്ച് ആവി നിറഞ്ഞ് വിസിൽ വരുന്നതിനു മുൻപു തന്നെ ചെറുതീയിലാക്കി 45 മിനിറ്റ് വയ്ക്കുക.
∙ ചെറുതീയിലാക്കുമ്പോള്‍ കുക്കർ പഴയ ദോശത്തവയുടെ മുകളിൽ വച്ചാൽ ഒട്ടും അടിയിൽ പിടിക്കാതെ കിട്ടും. ആവി മുഴുവനും പോയ ശേഷം കുക്കർ തുറന്നു ചോറും ചിക്കനും നന്നായി ഇളക്കി യോജിപ്പിക്കണം.
∙ ചൂടോടെ വിളമ്പാം.
തയാറാക്കിയത്: മെര്‍ലി എം. എൽദോ, ഫോട്ടോ : അസീം കൊമാച്ചി. പാചകക്കുറിപ്പുകള്‍ക്കും ഫോട്ടോയ്ക്കു വേണ്ടി വിഭവങ്ങള്‍ തയാറാക്കിയതിനും കടപ്പാട്: റാഫിയ സി. കെ, ദ് ബേക്കിങ് കമ്പനി, താനൂർ, മലപ്പുറം